Кина го блокира пристапот до OnlyFans, наведувајќи го како „закана за националниот морал, културните вредности и општествениот поредок“. Прашање е како оваа платформа на која главно се споделуваат порно содржини од домашна изработка, воопшто се протнала преку строгите кинески цензури кои одамна ги забранија и побезопасни канали како Јутјуб, Фејсбук и Инстаграм. 

Пандемијата, со сите стресови од затворање по домовите, наметнувањето маски и одржување растојание, откажувањето спортски, културни и естрадни настани... практично целосното уништување на социјалните навики, оставиле белези врз мозокот на сите луѓе, без оглед дали прележале корона. Мозоците ни старееле побрзо. Сè уште е рано за да се утврди дали последиците се долготрајни.

Стартап од Сан Франциско тврди дека конечно ја решил милениумската тајна на алхемијата – како да се направи злато од некој друг метал. Магијата е во нуклеарната фузија, која досега е постигната само во термонуклеарни бомби. Фузиските нуклеарни реактори во иднината би можеле да прават тони злато годишно и така двојно да го зголемат ќарот од произведената струја. 

За разлика од нивните родители, денешните се бомбардирани со совети и филозофии како да ги воспитаат своите деца. Тоа прерасна во бизнис. Пазарот на апликации за родители се проценува дека вреди 600 милиони долари. Студија што цела деценија следела развој на речиси 6.000 деца, нуди докази кое воспитување е поврзано со најдобрите резултати: Авторитативно, со доза на нежност.

Ако се чувствувате раздразливо, пробајте омега-3. Веќе е докажано дека овие масни киселини, достапни како додатоци во исхраната преку капсули од рибино масло, смируваат шизофренија и го намалуваат ризикот од мозочни и од срцеви удари. Сега е потврдено дека може да ја намалат и агресивноста за 28%. За смирување агресија кај деца се препорачува најмалку две порции риба неделно.

Ози Озборн почина на 76 години. Принцот на темнината беше икона на британскиот хевиметал и не ни се очекуваше да доживее толку, да не беше една ретка генетска деформација која огромните количини алкохол и дроги кои со децении ги истураше во себе не му ги поништуваше многи поефикасно отколку кај нормален човек. Ози Озборн се одјави само три недели по прошталниот концерт на Блек Сабат. „Mama, I’m Coming Home“, најави тој од бината.

Иако постојано е напаѓан во својата земја поради смелите ставови, британскиот доктор Асим Малхотра ги убеди властите да го намалат нивото на шеќер во храната. Вакцините со мРНА ги смета за апсолутна катастрофа и го критикува масовното препишување статини како превентива од срцеви заболувања. Сега тргна во битка против „инјекцијата за слабеење“ што ја воведе NHS.

Вообичаениот третман со хемотерапија насочен кон примарниот тумор може да ги разбуди неактивните клетки на ракот што веќе се вгнездиле во други органи од пациентот, предупредуваат научници од Кинеската академија на науки. Во тек се клинички испитувања дали овие несакани последици може да се спречат со додавање лекови што го запираат стареењето на клетките.

Мозочни активности кај оптимистите и песимистите го потврдуваат Принципот на Ана Каренина, кој Толстој го дефинира на почетокот на романот: „Сите среќни семејства се слични; секое несреќно семејство е несреќно на свој начин“. Сличната бранова должина ги групира оптимистите во јадро на социјални групи, а секој песимист има сопствени стравови што го водат кон црно сценарио.

Мајкрософт ќе собира милиони тони човечки измет од канализации, животински лепешки и арски гној за да ги спакува длабоко под земја и така да добие прошка за ѓубрето што во воздухот го испуштаат огромните центри за податоци со кои се напојува вештачката интелигенција. Нема да ги извалка рацете, туку ќе ѝ плати на специјализирана компанија за безбедно складирање отпад.

Од жаришта во Азија повторно на светот му се заканува тифусната треска, од која луѓето страдале со милениуми, сè додека не ја искорениле со едноставни апчиња. Бактеријата salmonella typhi сега покажува отпорност на речиси секој антибиотик што лекарите го користат против неа. Мутации се шират и се вгнездуваат во Африка, но и во земји со развиени здравствени системи како САД и Британија.

Агенции за изнајмување автомобили сè почесто користат скенери со вештачка интелигенција што темелно го снимаат возилото и пронаоѓаат и најситни оштетувања. Гребнатинка на бандаж може да чини повеќе од изнајмувањето. Чаре нема. Корисниците немаат можност ни да се пожалат дека можеби им е накалемена туѓа штета. Слаба одбрана им се осигурувањето или снимањето на колата.

Научници откриле дека ковид вакцината на Фајзер може да води кон оштетување на окото и губење на видот. Во случаите кои ги следеле и мереле, двете дози на Фајзер доведуваат до здебелена рожница и помалку ендотелни клетки во окото. На краток рок ништо страшно, но ако ваквите ефекти траат подолго, може да настанат сериозни проблеми.

Квантна состојба на светлина успешно била телепортирана на далечина од триесетина километри преку вообичаен оптички кабел за интернет, отповарен со бура од сообраќај со пораки, извештаи и клипчиња. Ова е далеку од телепортерот на Скоти од Стартрек или од транспорт на каков било предмет, но дозволува во обичен кабел да се вклучат компјутерите од идната генерација.

Она што почна како збир на длабоки претпоставки за поврзување на апстрактните гранки на математиката, еволуираше во просперитетен, мултидисциплинарен напор што се протега од темелите на Теоријата на броеви до границите на квантната физика. Доказот на хипотеза од пред половина век создаде мрежа од идеи што веројатно ќе ја обликуваат областа во годините што доаѓаат.

Не само што веганското млеко не му е нутритивно еквивалентно на кравјото, туку и растителните суплементи може да предизвикаат токсиколошки проблеми, особено кај малите деца. Препораката од експертите е децата да пијат полномасно или полуобезмастено кравјо млеко. Оние на растителна основа се прифатлива алтернатива само ако се незасладени и збогатени со витамини.

Администрацијата во Вашингтон е на прагот да ја прифати иницијативата за одобрување на забранетите супстанции како ЛСД и екстази за третман на депресија, траума и други тешки состојби. Министерот за здравство Роберт Ф. Кенеди најави одобрување за 12 месеци. Тексас одобри проект за проучување на моќниот психоделичен ибогаин како третман за зависност од опиоиди.

Со испитувања, мерења и анализи, науката само го потврди она што одамна е врежано во многу култури, традиции и бабини совети низ светот – супата помага полесно да се оздрави од настинка или грип, па и од ковид. Анализа на десетици илјади записи и тестирања кај стотици доброволци покажале дека дејството на супата е особено ефикасно ако е топла, пилешка и ако е зачинета со лук.

Осум здрави бебиња се родени во Британија со револуционерна процедура на комбинација на генетски материјал од три лица за да се спречи пренесување на наследни болести за кои нема лек. Мајките на овие бебиња имале мутации во митохондриите и имало висок ризик да пренесат генетски нарушувања кај своите деца. Тоа било спречено со додавање митохондрии од друга жена.

Билките и животните мошне веројатно несвесно комуницираат. Научниот тим што откри дека растенијата испуштаат звуци, сега тврди дека тоа го слушаат инсектите и дека ја разбираат пораката. Женските молци, на пример, избегнувале да положуваат јајца на растенија од домати ако испуштале звуци што ги поврзувале со страдање, што укажува дека се дехидрирани и нездрави.

Хранењето на невроните со бакар драматично помага да се намалат оштетувањата на мозочните клетки, покажува ново истражување спроведено кај лабораториски глувци. За експертите тоа е ветувачки знак дека додавањето бакар во организмот може да биде ефикасен за луѓето што страдаат од Паркинсонова болест, слично на инсулинот или додатоците од железо против анемија.

Јазичен модел со вештачка интелигенција на ОпенАИ ги оставил вџашени врвните математичари што тајно се состанале за да го тестираат. Без проблем ги решавал сите равенки и задачи што му ги составиле, дури и некои од најтешките проблеми во математиката. Генијалците договориле награда од по 7.500 долари за секоја задача која ботот нема да може да ја реши. Не се опариле многу.

Дури и кога се прочистени со стандардните процедури, зелените салати на продажба во супермаркети низ цела Европа содржат отпорни паразити. Кога ќе се навлезат во човек, трајно се вгнездуваат и ги нагризуваат мозочните клетки. Сегашните европски прописи за безбедност на храната се фокусираат на бактериска контаминација и не налагаат тестирање за паразити во свежи производи.

Глобалното затоплување се забрза од околу 2010 година, што доведе до неодамнешната низа рекордно топли години. Но, причините за тоа не се само во загадувањето предизвикано од луѓето, покажува ново истражување. Напротив. Со чистењето на смогот од големите градови и индустриските центри се отстранува вештачкиот чадор што ја штити површината од сончево зрачење.