Сè попопуларен станува еден бањски третман во кој набрзинка ви ги замрзнуваат гениталиите (на минус 160 степени!) за да му се пратат сигнали на мозокот да обрвне внимание на овој напатен (или запоставен) регион. А по аналогија на принципот „камче во кондура“, веројатно има ќеиф и во тоа кога ќе ви ги одмрзнат. 

Замислата на Итали (во оригинал Eataly, игра со зборот Italy) е тоа да биде дел забавен парк, дел учење преку забава, дел манџа. Локацијата на паркот е Болоња, а отворањето е во септември 2017.

Прашањето што пред три години го решава софтверската компанија Крисп е - дали стварно ти треба некој да ти каже што да работиш? Одговорот до кој стигнале е - не.

Неодамна откриен есеј (сред американски музеј) од 1939 покажува дека британскиот премиер бил отворен кон можноста за постоење на живот на други планети, и тоа речиси под истите услови кои и денес се сметаат за неопходни.

Човекот што сака да ја освои вселената и да ја припитоми сончевата енергија за човечки потреби, едно попладне враќајќи се од работа се заглави на идејата за копање тунели. На таа пара, почна и да го остварува ова, копајќи кратер во дворот на својата компанија во близина на меѓународниот аеродром во Лос Анџелес.

Тоа што некои стануваат зависници од кокаин првично беше објаснето со погрешни проценки, односно дека начинот на кој дрогата зафаќа одредени делови од мозокот спречува одредени луѓе правилно да расудат меѓу минатите грешки или да разликуваат што е добро, а што е погрешно. Сега позицијата е ревидирана на - некои луѓе имаат генетски предиспозиции за зависност од дрога.

Најбогатиот Американец со македонско потекло кој деновиве почина на 87 годишна возраст со години ѝ плаќал стан на Роза Паркс, жената која ја започна борбата за граѓански права во САД. Човекот бил богат, ама не и шконтар.

Прво да кажеме дека станува збор за мала студија, второ да кажеме дека во неа истражувачите имаат откриено дека безглутенската храна содржи зголемени нивоа на отровни метали.

Фамозниот и не помалку контроверзен американски економист Џефри Сакс вели дека САД се зрели за нов бум на работни места. Само што тоа нема да бидат нови фабрички места. И нема да се платени баш најдобро.

Денот кога Викторија Елдер го раѓа своето дете, во истиот момент кога ѝ го ставаат бебето во раце таа „чувствувала и сè уште чувствува дека направи грешка“. Важната дистинкција е дека таа ја сака ќерка си, ама сепак мисли дека направила грешка.

Келиен Конвеј веројатно е единствениот човек од новата американска администрација што предизвикува поголема алергиска реакција кај медиумите од самиот Трамп.

Откако ја извади голотијата заради зголемување на рекламниот опсег, Плејбој мудро реши дека е глупо да се откаже од својот идентитет. Потег кој заслужува аплауз, само што, за аплауз требаат две раце, а Плејбој е магазин кој се чита со една.

Најмладата британска добитничка на главната добивка на европската лотарија вели дека планира да ги тужи организaторите на играта. Ѝ го упропастиле животот што дозволиле да има толку пари на млади години. Плачеме.

Како што стареат така расте желбата кај мажите за врски со помлади жени, од друга страна жените од најразлични возрасти немаат против да се во врска со мажи што се постари или помлади од нив, и ова е според бројки од 2015 од сајтот за лични контакти Оккјупид. Сега нова студија вика дека не е така, старите мажи не сакаат млади жени.

28 годишниот Тимур Гареев симултано изиграл 48 партии шах. Со врзани очи. Додека возел точак.

По подолго време ПС-от (Правила на службата) на американската војска околу изгледот на нејзините припадници малку од малку се либерализираше. На жените им е дозволено да носат дредлокс. 

Впрегнувајќи од тоа неисцрпна моќ за перпетуум-незадоволство, веган бара забранување на стара детска песна за "човек што убива лисица".

Едно време беа Бурди, бележења со сапунче и шпенадли со топчиња во различни бои. Сега на ред е апликација што една недела ќе собира податоци за вас за на крај да ви го понуди идеалниот дизајн на она што треба да го облечете.

550 најдобри грчки новинари прво останаа 7 месеци без плата, а сега се и без работа откако еден од главните медиумски столбови во Грција, групацијата ДОЛ, издавач на Та Неа и То Вима, прогласи стечај. Според податоците на Асошиејтед прес, Та Неа го имаше и најголемиот тираж во земјата, од околу 14.000 примероци.

По речиси 20 дена непрестанати битки со медиумите портпаролот на американскиот претседател, Шон Спајсер, завршил на пеглање кај шефот за тоа како бил исмеан во еден скеч на Сатурдеј најт лајв во кој беше глумен од Мелиса Меккарти.

Руската академија на науки ја обележа хомеопатијата како здравствена опасност и сега бара од руското министерство за здравје да престане со користење хомеопатска медицина во државните болници низ земјата.

Захер за Виена и за остатокот од благородниот свет е она што овде долго време беше Васина торта (пред човечката мрза да ја тронизира Нутелата), најраскошната убавина со која можете да го погалите своето непце. Иако приказната за Захер тортата е по малку горчлива, тоа на бечлии (ок, виенчанци) им донесе дупло (ок, двојно) благо.

Американски судија му наредил на 19-годишен дечко да нема никаков секс, со никого, пред да се ожени. Ова му е дел од казната што силувал малолетничка.

Гледањето порно доведува до групен секс, е еден од главните аргументи на законодавците на Вирџинија, кои разгледуваат резолуција со која порнографијата ќе биде прогласена за штетна и токсична.