„Да, многу луѓе ни умреа но сепак помалку од просекот на ЕУ а го спасивме менталното здравје на нацијата и домашната економија“, резимираше државниот шведски епидемиолог Андерс Тегнел, творецот на опуштениот шведски модел за справување со пандемијата.

Пред година дена, дилемата прележување или вакцина беше бааги еретичка. Сега не почнуваме од нула па може да се прелистаат некои опции, иако, со оваа болештија, постојат многу малку константи. Со исклучок на онаа дека мерките и не-мерките кои ги спроведува нашата влада се константно фушерски и идиотски. Караџовски, не е смешно.

На почетокот од вакцинирањето имаше логика меѓу првата и втората доза од вакцината да минат само 3 до 4 недели за да може што повеќе луѓе што побрзо целосно да се заштитат. Меѓутоа процената е дека заради тоа сега има потреба од 3-та доза.

Иако единствено понеразумно од ова е Порнхаб да забрани порно, Онлифанс објави дека излегува од бизнисот со порнографија и од 1-ви октомври целосно забранува порно на својата платформа.

Авганистанските документи се збирка на интервјуа што американската влада ги прави со стотици функционери кои имаат клучни улоги во 20-годишната војна во Авганистан. Вашингтон пост повеќе од 3 години е на суд со американската влада за да ги извади истите интервјуа на виделина и да ги објави. Документите веќе некое време се објавени, а Крег Витлок од Вашингтон пост е автор на книга на темата.

Ефикасноста на вакцината на Фајзер против делта сојот трае само 90 дена по целосната вакцинација, покажуваат резултатите на Универзитетот Оксфорд кој спроведува една од најобемните студии во светот.

Крајно неблагодарно само еден ден откако директно од фронт завршија во Луна парк и испробаа се што има да се проба, талибанците се вратија и до темел го запалија цел парк.

Над земја Авганистан нема речиси никакво богатство, меѓутоа ако се за верување американски воени функционери и геолози, под земја имаат над 1.000 милијарди долари во минерали.

Без разлика на неброените злодела што ги има направено организацијата што ја преставуваат, на комплетната медиумска машинерија на талибанците дозволено и е слободно да твита колку и е мерак.

Чисто колку да не може да има поголема симболика, портпаролот на талибанците изјави дека последниот Американец треба да се исчисти од Авганистан точно на денот на 20-годишнината од нападите на Њујорк.

САД во овие 20 години имаат потрошено повеќе пари на Авганистан (со пресметана инфлација) отколку што имаат потрошено за целиот Маршаловиот план со кој ја реизградија цела Западна Европа. И покрај тоа авганистанската влада ја изгуби целата држава во рок од 3 недели.

Шаблонот секогаш е ист. Одиме на места на кои не сме добредојдени, на јавноста ѝ кажуваме дека проблемот може воено да се реши и лажеме за нашите мотиви за окупирањето на земјата. Потоа избираме да поддржиме локален цивилен политички авторитет кој неизбежно се покажува дека е корумпиран и репресивен, само зголемувајќи ја локалната одбивност кон американското присуство.

Додека Западот уште се пакува во Авганистан, кинескиот Глобал тајмс во едиторијал му порачува на Тајван дека поуката што треба да ја извади од Авганистан е дека кога ќе избие војна во теснецот, одбраната на островот ќе колабира за неколку часа, а американската војска нема да дојде да помогне.

Кога на почетокот на годинава повеќе држави предводени од Индија и Јужна Африка бараа да им се дозволи да почнат да произведуваат генерички верзии од вакцините на Фајзер и слични, како побрзо би се спречило ширењето и мутирањето на вирусот, тоа беше одбиено затоа што фармацевтските компании под никакви околности немаа намера да го споделат своето знаење. Делта сојот кој пустошува низ светот потекна токму од најсиромашните краеви на Индија.

Спектакуларниот колапс на авганистанската армија која по милијарди долари помош и 20 години обука од Американците им дозволи на талибанците да се прошетаат низ земјата и да влезат во престолнината, започна со серија на договори постигнати во селата на Авганистан меѓу талибанците и некои на најниските чиновници на авганистанската влада.

Мула Барадар на барање на американската влада пред три години беше ослободен од затвор во Пакистан како дел од „мировниот процес“ во земјата.

Талибанското освојување на Авганистан не е неизбежно, бидејќи сега имате авганистанска армија со 300.000 припадници кои се добро опремени како која било армија во светот и воена авијација, наспроти некои си 75.000 Талибанци,  порача Бајден на 8 јули 2021.

Многу внимателно медиумите објавуваат дека иако не се поврзува со настанот, од роденденот на Обама минатиот петок, до денес, во Мартас винјард има 74 позитивни на ковид-19 што е најголема бројка од април годинава.

И Талибанците побрзо стигнаа до Кандахар отколку што некој очекуваше, и вториот по големина град падна далеку побрзо отколку што некој очекуваше.

Ако Доналд Трамп претседателствуваше сред дебаклот во Авганистан, американскиот дипломатски естаблишмент на цел глас ќе ја осудуваше неодговорноста и неморалноста на американската стратегија. Бидејќи во Белата куќа е Џо Бајден, наместо тоа, главно, има срамен молк.

Од 71 медал што го имаат освоено Русите на Олимпијадата во Токио, нешто помалку од половина ги добиваат луѓе од војската, полицијата и националната гарда.

Главниот инспектор на СЗО за истрагата во Кина тврди дека пандемијата може започнала заради човечка грешка и Кина не е „многу волна да го признае тоа“.

Кога Шведска реши да дозволи приватни телевизии, истовремено тргна да ги заштити и најмалите, забранувајќи реклами во кои тие се таргетот. Причината е едноставна: за децата не постои јасна линија меѓу она што им се нуди како телевизиска програма и она што им се нуди како на конзументи.

Медицинска сестра од северна Германија измамила илјадници луѓе кои верувале дека примаат вакцина против ковид, а всушност добивале само обичен солен раствор. Можно е да се работи за преку 8.000 луѓе.