Песните на Дилан се секако меѓу најобработуваните во историјата на музиката. Па сепак, тешко дека би претпоставилe дека е можен и ваков кавер.

Неодамна беше објавена за фановите долго очекуваната збирка преписки на Курт Вонегат, со неговите пријатели, колеги и читатели. Зборуваме за време кога луѓето навистина пишувале писма, во кои навистина нешто кажувале. А Вонегат има што да каже, дури и кога зборува за сосема обични работи.

Џармуш, освен што режира и пишува сценарија, се занимава и со музика. Слушнете го неговиот нов албум со холандскиот минималист Џозеф ван Визем, „Мистеријата на рајот".

Во продолжение на темата „текстот вели едно, друго ти се слуша", се потсетуваме на една песна која намерно си игра со овој феномен. Таа во 1972 стана хит во Италија иако не беше на италијански. А ни на англиски. Всушност, на ништо.

Aко сте помислиле дека меѓу нашите професори има дрски, а дека кафанските вербални дуели се врв на софистицираност во споредба со стилот на некои академски преписки, прочитајте што се случува во Хрватска. Стварно нема смисла во сè да се пред нас!

Вчерашната изјава на министерот Попоски, која во медиумите беше пренесена како „историјата треба да остане во минатото" е фала богу спротивна на логиката и на Фокнер, а и на Вуди Ален. Во спротивно можеби ќе нè тужеа.

Џефри Чосер, познат како „татко на англиската литература", најголем англиски поет на средниот век, алхемичар, астроном и дипломат, е заслужен и за еден збор, кој 612 години по неговата смрт добива малку поинакво значење од она кое тој го имал на ум.

На 1. ноември почна проектот NaNoWriMo - идејата е секој од учесниците за еден месец да напише 50,000 зборови или 175 страници краток роман. Еве мнооогу добар совет за оние кои се одлучиле да го направат ова. Не е доцна да се придружите.

Додека трае „филмскиот бутик" во Менада - проекции на филмови кои или биле инспирирани од модата, или самите покренале некаква модна промена - еве го нашиот прилог: колекција која ја одбележува премиерата на новата филмска верзија на „Ана Каренина".

Придонесот на Маги кон звукот и идеологијата на ЕКВ е јасен. Она што е помалку познато е дека таа има дизајнирано и повеќе плакати и обвивки на плочи на групата. На 5. ноември се отвара изложба посветена токму на оваа тема.

Авион полн со хобити, орки и други чудни суштества лета накај Средна Земја, и добива инструкции за безбедност на летот од стујардеса-елфка. Не, не е извадок од новиот „Хобит". Видео за безбедност на лет е.

Со блага грижа на совест дека во светот повеќе се крева џева за правата и благосостојбата на жените, денес, на 1. ноември, решивме постов да го посветиме на мажите и нивните мустаќи, а сè за добробит и на друг значаен дел од нивното тело.

Изгледа петте минути, кои се протегнаа на пет часа, на 50 нијанси сиво, изминуваат. Еротскиот роман на јапонско-американската авторка Силвија Деј за само шест дена се продаде во 80,000 примероци.

Во јуни 1956., човекот кој постхумно го нарекоа „најголем американски архитект на сите времиња", добил необично писмо од 12-годишно момче, со молба тој својата експертиза да ја вложи во проектирање на куќа за неговиот најдобар пријател, Еди.

Пред да удри ураганот, освен вода, конзервирана храна и свеќи, медиумите ги советуваа жителите на источниот брег на САД да складираат и доволно литература. 

Убава приказна за првиот југословенски космонаут, кој пет пати ја обиколил земјата. Во своето фичо.

Едно од трогателните својства на човечкиот род е да верува во моќта на сопствените изуми дури и во ситуации кога тие се очигледно бескорисни. Како морална поддршка на нашите пријатели заглавени во ураганот, но и како потсетување на кршливоста на цивилизацијата пред налетот на природна непогода со име и карактеристики на лоша жена.

Филмот е истовремено и „feel-good" и „feel-bad" - комбинација карактеристична за скандинавските филмови. Критика на културата која се обидува да вкалапи, контролира, да наметне чувство на вина и грев дури и тогаш кога го нема, ова е ода на човековата страст по животот, и обидот тој достоинствено да се живее. Убав, убав филм.

Вестта дека Кларк Кент а.к.а Супермен го напушта печатеното новинарство потресе многумина кои сè уште негуваат нежни чувства кон новинската хартија и мирисот на олово. Една новинарка со рубрика за градинарство почнува да се сомнева во својата професија по шокантната постапка на нејзиниот идол. Д-р Остојиќ од booksa.hr повторно има добар коментар - времињата се менуваат, а со него и нашите идоли.

Драган Чалина, млад српски џез пијанист, преслушувајќи ги говорите на локалните политичари, почнал да си ги „преведува" во музика. После ова секој говор на Бранко ќе ви звучи ко концерт на Телониус Монк.

Пред некое време пишувавме за родово ориентираните Бик пенкала „за неа". Бидејќи рачното пишување е цивилизациска практика која одумира, Фуџицу смислиле технолошки поисплатлива варијанта - лап топ „само за дами".

Сè почна кога на телевизија ми се појави нов канал – 24 Kitchen – посветен на храна и готвење. Многу бргу лутеницата на Алачка падна во сенка на белите пецива на бланшираниот Рудолф, на Spezzatino di carne con patate на Џовани и на „шоколадовите клавиши" на Јулисима.

Според важечките норми, мажите не се допираат многу-многу. Ракување, кратка прегратка - тоа е прифатливо. Но хетеросексуални мажи да се држат за раце или да се фаќаат околу струкот? Тоа е во најмала рака необично. Сепак, не било отсекогаш така.