Досега знаевме за инфекции, па за реинфекции па дознавме и за тнр брејктру инфекции, тоест за оние кои закачиле ковид иако комплетно вакцинирани. Излезе првата студија за пациент кој трипати закачил ковид. Некои бре, женска не можат толку пати да фатат.

Податоците околу ефикасноста и безбедноста на засилувачот на вакцината за ковид-19 се уште не се доволно убедливи, објави директорот на СЗО, Гебрејесус.

Веќе шеста седмица по ред, Велика Британија бележи смртност поголема од просекот, но најголем удел во тоа нема ковидот. Стручњаци велат дека една ипол година пореметено давање здравствени услуги, почнува да го наплаќа долгот.

Науката секогаш со право е горда на вградената опција за саморегулација и можноста во секое време нешто да се корегира, поправи или комплетно отфрли. Само што за тоа некогаш за тоа требаат десетина години. 

Спенсер Елден ја тужи групата за сексуално злоупотребување на дете, бидејќи на времето не бил во можност да даде согласност неговата фотографија да биде искористена за омотот на клучниот албум на Нирвана. Со оглед на лудото време кое ни се падна за живеење, ич не сме зачудени.

Петнаесет кучиња, од кои десет биле кутриња, од еден стационар во Австралија се убиени од властите како би се спречиле волонтерите во стационарот да патуваат до таму за да ги земат и притоа потенцијално да го рашират вирусот.

На њујоршкиот гувернер Ендрју Куомо не само што му е одземена Еми наградата туку е и избришан од листата на добитници. Како да не постоел човекот кој до вчера беше политички херој на културната елита која во него гледаше потенцијален криптонит за некогаш семоќниот Трамп.

Заглавен во својот автомобил во некоја бескрајна сообраќајна колона, дечко решил да го хакне билбордот кој бил во близина и на него да стрима порно. За негова голема несреќа, сето тоа се случува во Индонезија.

„Нема дилема дека антителата што се создаваат кај пациентите по прележаниот вирус штитат одреден период, но имунитетот стекнат од вакцината е многу подолготраен и поефикасен“, ќе рече министерот за здравство Венко Филипче. Голема студија на тема антитела и нивно одржување во телото ќе рече сосема поинаку.

Пред година дена, дилемата прележување или вакцина беше бааги еретичка. Сега не почнуваме од нула па може да се прелистаат некои опции, иако, со оваа болештија, постојат многу малку константи. Со исклучок на онаа дека мерките и не-мерките кои ги спроведува нашата влада се константно фушерски и идиотски. Караџовски, не е смешно.

На почетокот од вакцинирањето имаше логика меѓу првата и втората доза од вакцината да минат само 3 до 4 недели за да може што повеќе луѓе што побрзо целосно да се заштитат. Меѓутоа процената е дека заради тоа сега има потреба од 3-та доза.

Ефикасноста на вакцината на Фајзер против делта сојот трае само 90 дена по целосната вакцинација, покажуваат резултатите на Универзитетот Оксфорд кој спроведува една од најобемните студии во светот.

Кога на почетокот на годинава повеќе држави предводени од Индија и Јужна Африка бараа да им се дозволи да почнат да произведуваат генерички верзии од вакцините на Фајзер и слични, како побрзо би се спречило ширењето и мутирањето на вирусот, тоа беше одбиено затоа што фармацевтските компании под никакви околности немаа намера да го споделат своето знаење. Делта сојот кој пустошува низ светот потекна токму од најсиромашните краеви на Индија.

Од 71 медал што го имаат освоено Русите на Олимпијадата во Токио, нешто помалку од половина ги добиваат луѓе од војската, полицијата и националната гарда.

Главниот инспектор на СЗО за истрагата во Кина тврди дека пандемијата може започнала заради човечка грешка и Кина не е „многу волна да го признае тоа“.

Кога Шведска реши да дозволи приватни телевизии, истовремено тргна да ги заштити и најмалите, забранувајќи реклами во кои тие се таргетот. Причината е едноставна: за децата не постои јасна линија меѓу она што им се нуди како телевизиска програма и она што им се нуди како на конзументи.

Медицинска сестра од северна Германија измамила илјадници луѓе кои верувале дека примаат вакцина против ковид, а всушност добивале само обичен солен раствор. Можно е да се работи за преку 8.000 луѓе.

Мирот на староседелците богаташи од Хемптонс моментално е нарушен од најголемиот проблем што го имале до сега - уште побогати луѓе од нив.

Три нови состојби кои се пријавени од мал број луѓе што ги имаат примено вакцините на Фајзер и Модерна ќе бидат истражувани од ЕМА за да се утврди дали се можни нус-појави од вакцинирањето.

Човекот што го напиша филмот „Јас сум легенда“ со Вил Смит деновиве мораше јавно да објасни дека филмот е фантастика а не документарец за луѓе кои по вакцинирање се претвориле во зомбија... ако некој воопшто му верува.

Најдобро платените креаторки на Онлифанс заработуваат 270 пати повеќе пари отколку просечниот Британец кој се решил на потрадиционална професија.

Ако веќе се доживуваш себе како сојузник на жените, време е со дела да застанеш зад своите ставови и да направиш вазектомија, порачува колумнистката на Гардијан, Џил Филипович.

Балтиморската филхармонија ја отпушти својата прва флејтистка. Емили Скала нема утнато ниту една нота и нема пропуштено проба на оркестарот. Ама затоа пишувала постови за потеклото на коронавирусот и се сомневала во ефикасноста на вакцините.

Треј Паркер и Мет Стоун ќе прават нови епизоди и филмови од Саут парк за Комеди централ, а за возврат ќе добијат едно брдо пари од телевизиската мрежа.