Јер овдешнава влада е страшно ревносна во битката против пушењето (истовремено во нашиот Апсурдистан се субвенционира производството на тутун), еве еден фин и научно валидизиран пристап кон решавање на проблемот: покачете им плати на луѓето кои ги контролирате. Или тие ако пушат? 

Меган Вилијамс е 177 сантиметри висока Британка која службено е заштитно лице за брендот Guess, а во слободно време е на насловни страни на најразлични модни магазини. По нејзини зборови ова е нејзината во текот на еден ден.

Иако има луѓе кои само тоа и го прават, особено додека се на работа, за еден во 50 луѓе тоа е невозможна мисија. Може да замислите да не можете да замислите?

Нилуфер Демир од новинската агенција Доган ја направи фотографијата од мртвото тело на 3-годишниот Ајлан Курди, исфрлено на брегот во близина на Бодрум, и последователната фотографија од турскиот полицаец кој на раце го носи телото на момчето.

Истрагата е по основа на сериозно прекршување на човекови права, откако во рок од 6 недели по укинувањето на статусот неспособен за работа и правото на социјалната помош, починаа 2.380 лица со инвалидитет.

На 27-ми септември годинава, Париз на еден ден го забранува возењето на моторизирани возила, a улиците на градот ќе им бидат достапни само на пешаците, велосипедистите и слични превозни опции.

39-годишна Французинка доби право на месечен надомест од државата бидејќи не може да работи заради електромагнетска хиперсензибилност -  сака да каже алергична е на ВиФи. Од наша перспектива ова може да е прв чекор кон конечно воведување на бенифициран стаж за луѓе што сурфаат на интернет.

На американски пазар, по бројки од неколку организации, органската храна е 47% поскапа од регуларна храна. Тоа не значи и дека поскапата храна е и за толку поквалитетна, ниту пак дека нејзиното производство е толку поскапо.

САД има над 4.000 култови, кои вкупно имаат приближно 4 милиони членови. За разлика од употребата кај нас, секта е поинаква организација од култ и не е ни приближно толку штетна.

Нова студија (научна, со универзитетски професори и се останато) открива дека единствен начин да се спасиш од мамурлак е - помалку да пиеш.

По 16 години дремење пред камери, на 6-ти август беше последното појавување на Џон Стујарт како водител на Дејли шоу. Истата вечер, МСНБЦ објави документарец за него.

Пар дечишта, од онакво братство на американските факултети поставуваат натписи во стилот "Добредојдовте бруцошки", демек безобразно. Сељачки? Ок. Меѓутоа веста се појавува низ сите водечки медиуми, натписите се забранети и тоа во земја која им дозволува на нацистички групи слободно да маршираат.

Според последната листа на трошоци за живот во светските градови, најскап е главниот град на Ангола кој води пред вообичаените скапџии Хонг Конг, Цирих или Сингапур. Како е тоа можно?

Според една многу лабава теорија неочекуваниот скок на бројот на заразени постари деца во споредба со пред 5 години е последица на "вошки од социјални медиуми".

Следејќи го примерот на Шкотска, Германија е на пат да воведе комплетна забрана за ГМО семиња и да излезе од блокот од ЕУ кој ќе почитува позитивните листи на генетски модифицирани организми.

Ако салата останеше на својот почетен статус, како прв чекор на една долга неколкучасовна дружба, никој немаше да и се настрви да ја критикува, па да и ги реди сите можни глобални проблеми што ги создава. Откако запнаа да ја направат нутриционистичка светиња, почна и контра-ударот.

Будењето деца за на школо зимно време (во погрешната временска зона во која упорно остануваме) личи на будење јадни фабрички работници. Данокот го плаќа нивното здравје и образовниот успех. Америка мисли да поместува.

Во 1945-та, американскиот борд за Храна и нутриција објавува препорака дека на луѓето им се потребни 2,5 литри вода на ден. Ова станува мантра на секој доктор и нутриционист. Она што сите тие го имаат пропуштено е дека препораката продолжува со "најголемиот дел од оваа количина е содржана во храната што ја јадеме."

Автомобилите се агресивни суверени на градските улици додека пешаците треба да бараат пешачки премини и таму трпеливо да чекаат некој да се смилува и да застане. А бидејќи се сè подисциплинирани, сè почесто и гинат по зебрите. Индустријализација + пешацизација = раат?

Првото патување на Папата во странство е во Рио. Пред тргање од аеродромот во Рим, новинарите се веќе во авионот и го чекаат Папата кој необјасниво одбива да влезе. Во позадина, Франциско се објаснува со својот протокол и бара од нив да му ја вратат актовката која веќе ја однеле во авионот. "Не разбираш. Оди во авион. Земи ја, и те молам донеси ја тука." Она што помошниците не разбираат е дека до тогаш папите никогаш не го носеле својот багаж.

Некогаш длабоко верувавме дека во иднината роботите ќе работат а ние ќе уживаме. Зошто тогаш денес 'рмбаме ко коњи? Целата статија на Њујоркер можеби би можела да се сведе на она: "If you're busy, you seem important."

За оние кои планираат годинава да здуваат на Октобер фест, потсетување дека постирањето фотки од некој фино аранжиран оброк може да донесе и есап за кршење на авторски права и злоупотреба на уметничко дело. 

Како наследство од Француската револуција, на париските фурнаџии уште од 1790-та им беше забрането летно време да ги затвораат пекарите, со цел да се осигури дека градот и во овој период од годината ќе има пристап до багет.

Наш човек уште од старт има еден шлепер ментални препреки кои би го спречиле да го посака / смисли ова: кој ќе го чисти од бигор, да не им прска на комшиите, да не ми го маваат со камчиња, да не прокапе, па што ќе речат комшиите...