Италијанската премиерка, најпрецизно од сите други ЕУ лидери досега, порача дека зелената агенда на Европската унија не е баш најпаметна стратегија ако значи губење на илјадници работни места и затворање на доходовни индустрии. Жената која уште го носи товарот на нео-фашист, покажа дека форсирањето на некои јавни политики денес, може да е поавторитарно од некои страшила од минатото.

Експлозиите на пејџери и останати уреди за кои се верува дека ги носеле милитанти на Хезболах, Пентагон го толкува како можен почеток на копнена војна во Јужен Либан меѓу Израел и Хезболах.

Во Шенген зоната се создаде дупка со облик на Германија, откако земјата реши да воведе гранични контроли на сите свои копнени граници. Ако можат тие, зошто не и ние?, бргу потоа праша холандскиот десничар Геерт Виклдерс. А потегот на Берлин е малку театар за покажување мускули: тие воопшто и немаат доволно полицајци да ги чуваат сите граници.

Дел од највисокото украинско воено раководство го преиспитувало планот за извршување на инвазија преку руската граница и освојување на руска територија, пренесува магазинот Политико.

Застрашувачка демонстрација на моќта и оперативната ефикасност на израелски МОСАД. Пресретнале илјадници пејџери нарачани од непријателскиот Хезболах во Либан, ставиле што треба да стават во уредите, почекале да бидат поделени меѓу борците во Либан и Сирија и истовремено им ги експлодираа со лажна порака. Кому в рака, кому в џеб. Јој!

Основачот и актуелен господар на медиумската империја и богатство проценето на 14,9 милијарди фунти, Руперт Мурдок деновиве на суд во САД треба да се објасни со своите три најстари деца чии се парите.

Оние кои после првиот атентат врз Доналд Трамп не веруваа дека тоа е дело на осамен лудак туку-така качен на покрив со пушка, беа убедени дека моќните структури кои го извеле тоа, нема да се откажат после првиот неуспех. Ете, се случи и втор обид. А големите медиуми поставуваат брилијантно погрешни прашања, од типот, мора ли Трамп толку да игра голф?

По процените на една од најголемите потрошувачки асоцијации во земјата, Асоутенти, цената на шолја еспресо во земјата од 2021 е покачена за 15%, и денес на одредени локации таа знае да чини и до 2 евра. Мхм, за 2 евра еспресо ќе се фаќаат за кука и мотика.

Колапсот на стапката на новороденчиња која почнува во Европа по Втората светска војна, во изминатите децении е проширена низ цел свет. Да, вклучително и Кина.

На повидок ново продлабочување на јазот меѓу Унгарија и централата во Брисел. Земјата ги разгледува правните решенија за тужење на Европската комисија откако беше казнета со 200 милиони евра заради нејзините рестриктивни миграциски политики. Унгарија вика дека дала многу повеќе за да се заштити себе и Европа и планира да си ги врати парите.

Како што тоа обично бива, фановите на Камала се убедени дека таа победила на првото соочување со Трамп а фановите на Трамп пак, никој не може да ги разубеди дека тој не ја растурил неа. Потрезвените посматрачи велат дека дебатата не направила никаков сериозен пресврт. Се нафрлат сега цитати и мемиња но најголемата поука, особено за Трамп, е да се пази на кој  медиум се оди на дебата. 

Истите овие што за сега се главни осомничени за неуспехот на мировните преговори во Истанбул меѓу Русија и Украина, кои според сведоштва стигнале до отворање на шампањско пред да се јави Борис Џонсон, сега почнаа отворено да навиваат за војна меѓу Русија и Кина.

Украина има сè поголем проблем со моралот и дезертерството. Воени офицери кои воделе некои од најжестоките битки веќе не можат да гледаат како им умираат луѓето. Дезертерството особено е зачестено меѓу новодојдените војници. Ќе отидат еднаш на позиција, ако преживеат, веќе не се  враќаат. 

Откако ја предаде претседателска номинација на Камала, снимките и фотографиите од Бајден главно се како одмара на лежалка на плажа. Излезе дека и добар дел од мандатот така му минал.

ЕУ ќе треба масовно да инвесртира за да го запре сè поголемото заостанување зад САД и Кина, порача Марио Драги, претставувајќи го долгоочекуваниот извештај за конкурентноста на европската економија. Неговиот документ ќе биде стратешка насока за новата Европска комисија и во него има 170 препораки од кои клучна е дека на ЕУ ѝ требаат 800 милијарди инвестиции годишно.

Шефот на американската разузнавачка агенција, Вилијам Барнс, првпат јавно призна дека навистина постоел ризик Русија да употреби тактичко нуклеарно оружје. Било тоа есента 2022 година, во текот на првите месеци од војната во Украина. Итно отишол да се види со рускиот колега.

На изборите во две германски покраини резултатите беа аларманти за меинстрим партиите. Социјалдемократите едвај го минаа изборниот праг за влегување во парламентот, Зелените веќе ги нема во едниот од нив. Предолго молчеа за проблемите на луѓето, оставајќи ѝ отворен простор на крајната десница која тоа знаеше да го искористи. Прв проблем - имиграцијата. 

Апликациите за изнајмување е-скутери, заедно сосе скутерите, повеќе не се дозволени на територијата на Мадрид, затоа што не успеале да воведат ред каде истите да се изнајмуваат и  паркираат низ градот. Освен што на сегашните оператори ќе им бидат одземени лиценците, градот не планира да дава нови.

Владејачките талибанци неодамна издадоа низа брутални забрани за жените. Не им е дозволено да зборуваат јавно. Комплетно е забрането пеење и читање на глас. Не смееат да се видат со машко ако не им е маж или роднина. Од глава до петици мора да бидат покриени во црно. Какба е реакцијата на „меѓународниот поредок заснован на вредности“? Штурци.

Како ретко кога во изминативе децении, висока шведска функционерка, и тоа потпретседателка на влада, јавно изјави дека во Шведска нема место за муслиманите кои не ги прифаќаат шведските вредности.

Во прилично уникатен инцидент и за вон Грција, неименувана Гркинка потпалува пожар на Пелопонез затоа што „уживала во гледањето пожарникари и во флертувањето со истите.“

Кога повозрасен шеф и кажува на својата 20-годишна вработена дека во зборот „hamster“ нема буква „P“, таа му враќа дека секогаш така го пишува зборот. Кога овој и предлага да проверат во речник, таа и се јавува на својата мајка ставајќи ја на спикерфон и низ солзи бара од мајката да му каже на шефот да не биде толку лош со нејзе.

Гревот на Телеграм е што не успеал да направи разлика меѓу барањата на автократски режими и барањата на легитимни слободарски демократски режими, со цела своја сериозност порачува Џон Торнхил во својата колумна за Фајненшл тајмс.

Изминативе две години Путин и руската држава успеваат да ја прошират својата позиција како снабдувач со енергија на Европа, па сега Унијата увезува многу повеќе гас од соседна Русија, отколку да го тегне со бродови од САД.