Учениците во почетните одделенија во просек губат по една третина од времето за учење затоа што наставниците своето време го користат за да им помогнат на децата кои не се подготвени за на училиште, пример, уште се во пелени.

Пишувањето пораки на мобилен додека се вози предизвикува илјадници смртни случаи секоја година. И покрај тоа што возачите ги знаат опасностите, голем дел од нив упорно ги користат своите телефони додека се зад волан. Едукативните програми имаат ограничен ефект, ама затоа врши работа една друга цака.

Манчестер, фудбал, пабови, пиво. Во таква еко-средина дечко од Манчестер помислил дека има победничка идеја за нешто ново - да отвори безалкохолен паб. Ене го, затвора дуќан. Во иднина ќе држел безалкохолни поп-ап шанкови по венчавки. Немој некој да го излажал дека на наши венчавки пари би намлатил со таа идеја. 

Меркур е најмалата (откако го дисквалификуваа кутар Плутон) и најблиската планета до Сонцето во нашиот планетарен систем, но преку ноќ стана интересен откако научници сугерираа дека под неговата површина има огромен, повеќекилометарски слој дијаманти. Ок, не дека е баш блиску до нас (77 милиони километри) и не е дека е баш пријатно место за копање (430 целзиусови степени).

Познато е дека дека здравјето и долгиот живот се во тесна врска со БДП по глава на жител онаму каде што се живее. Но, проекции за очекуваниот животен век на средината на овој век велат дека просечниот животен век во Шпанија ќе биде подолг од оној во далеку побогатата Данска. Исхраната и движењето се битни, но не се сè. Шпанците ги држи (долго) во живот и тоа што се дружат и смеат, макар седеле и јаделе чипс. 

Сите посетители на плажите на градот Калпе се потсетени дека им е забрането поставување на каква било опрема за резервирање место на плажа, од пешкир до лежалка, пред 9 часот наутро.

Екипи на Непал, составени од војници и шерпи/шерпаси имаа задача оваа пролет да го исчистат највисокиот алпинистички камп на Монт Еверест. Работеле тие цела сезона со една третина кислород колку што му треба на човек и на крај порачаа дека, за да ја завршат работата, ќе им бидат потребни уште години.

Сем Бринтон, своевремено првата нон-бајнери личност со лидерска позиција во администрацијата на Бајден (во Департментот за енергетика, одделот за нуклеарен отпад) нема да лежи затвор поради неговата навика од аеродром да заминува со туѓи куфери. Не му е првпат, третпат му е. Договорот е да ја врати облеката, да се извини и да замине на третман за ментално здравје. 

Пензионерските домови во Кина почнаа да нудат сместување за млади, истрошени, професионалци кои бараат место за екстремно рано „пензионирање“, обично некаде во 30-те години.

Во Белгија заврши изборот на Топ жена фокусиран на внатрешната убавина и телесната позитивност на учесничките.

Локална гатачка во еден француски град го убедила градоначалникот дека може да разговара со мртви, меѓу кои и неговиот татко. Градоначалникот се навлекол на тие сеанси па имал стотици муабети со мртви, понекогаш и со ангели. По некое време, сосема очекувано, ангелите почнале да го убедуваат градоначалникот да ѝ помогне на гатачката да ја реновира куќата.

Њујорк е град во кој живеат најмногу милионери на светот. САД имаат 11 свои во глобалните топ 50-те, но, Кинезите брзо стигнуваат. Постојат градови во Кина чија милионерска популација има пораснато за преку 140% во изминатите десет години. Лондон и натаму паѓа а Москва е издишана и таму бројот на милионери е намален за една четвртина. 

Во извештајот “Information is Beautiful” темелен на 3,4 милијарда ПИН-ови, се наведуваат најчесто користените комбинации на бројки. Некои од нив толку често се користат што глупо е прво нив да не ги пробате ако сакате да отворите нечиј мобилен или да пробиете картичка. На пример, „1234“ го користат дури 11% од луѓето.

Мажот од Мејн кој освои еден од најголемите џекпоти во историјата на САД, заврши на суд со најблиското семејство кое го обвинува дека се шконтарел и не им ги дал парите кои ветил дека ќе им ги даде.

200 години откако Лудвиг Ван Бетовен падна на смртна постела и на неа пиеше вино со лажица, истражувачите веруваат дека го имаат последниот збор за да ја објаснат неговата абдоминална болка, надуеност, дијареа и губење на слухот: труење со олово. Велат дека такви концентрации на  олово немаат видено. Џабе пиел тон лекови кога се труел со евтино вино, убеден дека му годи. А пиел и до 75 лека.

Во прв таков експеримент во ЕУ, Полска одлучи да престане со давање домашни задачи на своите ученици, бидејќи дел од истражувањата покажале дека за децата имало многу малку корист од пишување домашни задачи.

Најсеверниот регион на Норвешка побарал од Европската комисија да му даде дозвола да воведе временска зона со 26 часа, бидејќи овие 24 не вршат работа таму горе.

Основно училиште од Бленфорд, Англија, планира од септември за учениците да нуди од оние базичните мобилни телефони, бидејќи со смартфони и сите опции кои со нив ги имаат, децава не можат да се спастрат и да се фокусираат на школото, часовите и лекциите. Родителите се за, за нивните деца не сме сигурни. 

13 годишен тинејџер од Оклахома е првиот човек кој успеа да победи во Тетрис, прочуената Нинтендо игрица, која постои цели 34 години. Интересно е што до пред неколку години се веруваше дека на Тетрис има најмногу 29 нивоа. Малиот стигна до 157 ниво по што играта се скрши.

Вечно недоразбирање има меѓу Американците и остатокот од светот околу бакшишиот во кафана. Во држави во кои келнерите се платени прописно, бакшишот е само доброволно частење заради задоволството од услугата. Од друга страна. американскиот кафанџија не го плаќа персоналот ко што треба, па без парите од башишите, едноставно не се преживува.

После три операции на срцето и замена на уморните и расходувани срцеви залистоци, на Арнолд Шварценегер му е забрането баш она по што стана познат, да дига тегови, бенчови - менчови. Јака животна иронија е тоа, на рамниште на она кога на просечен Македонец би му било забрането после третата ракија да зборува за политика.

Читањето печатен текст може да ве унапреди за што и да читате шест до осум пати повеќе отколку читањето на истиот текст ама во дигитална верзија. Читањето печатен наспроти дигитален материјал излегло дека е посебно важно за деца.

Робот кој без проблеми се користел пет години за сортирање зеленчук, решиле да го подобрат и да го направат уште поефикасен. Му додале екстра сензори и дополнителен софтвер па техничар сакал да провери дали системот работи добро. Очигледно не, бидејќи роботот помислил дека не се работи за човек туку за кутија пиперки.    

Од сите стресови кои со себе ги носи возењето кола (од идиоти кои сакаат да се пикнат во твоја лента, до идиоти кои не ти даваат да им се пикнеш во нивна лента), се чини организмот најмногу го вознемирува паралелното паркирање. Им мереле пулс на луѓе кои паркираат паралелно. Срцето забрзувало речиси 60 проценти.