Не се во право оние кои тврдат дека Израел нема кого нема нападнато во поблизок или подалечен комшилук: Египет, Сирија, Јордан, Либан, Судан, Тунис, Ирак, Иран... Сепак - има. Северен Кипар. За осомничениот воен злосторник Нетанјаху и злотворите во неговиот кабинет, Смотрич и Бен-Гвир, израелски аналитичари сега почнуваат да ја динстаат и темата за опасноста од Северен Кипар.

Трговскиот договор на САД и ЕУ буквално е „фантастичен“. Во очајнички обиди да избегне царини од 30% и општа трговска војна со САД, Урсула фон дер Лејен прифати сè што од неа побара Доналд Трамп и вети дека Унијата за три години ќе купи американски енергенси за 750 милијарди долари. Ниту Америка има толку нафта и гас на продажба ниту Европа има капацитет да ја купи и обработи.

Агенцијата за заштита на природата официјално побара поништување на клучниот документ за стакленичките гасови од 2009 година, кој послужи да се воведат строги „зелени“ регулативи и да се оптоварат Американците со стотици милијарди долари годишно. ЕПА тврди дека намерно се манипулирало со научни студии за да се озлогласат фосилните горива и да се исфрлат од употреба.

Две влијателни израелски групи за човекови права се охрабрија да ја наречат со вистинското име  - Нашиот геноцид - израелската операција за изгладнување на Палестинците и за уништување на Газа. Свесно ризикуваат екстремни реакции од властите и од јавноста поради изразот што ги отвора раните од холокаустот. И предупредуваат дека геноцидот врз Палестинците нема да запре во Газа.

Пекинг може уште повеќе да го зголеми своето влијание врз сообраќајот низ двете клучни пристаништа на Панамскиот канал, кои му беа ветени на американскиот инвеститор БлекРок. Хонконшкиот приватен сопственик што ги продава пристаништата се премисли и сега инсистира во групата купувачи да биде и Коско, компанија што е под целосна контрола на кинеските власти.

Британски детективи денес изгубија секаква допирна точка со Шерлок Холмс. Наместо да патролираат, да решаваат криминални случаи и да гонат убијци, наредено им е да бараат и да цензурираат антиимигрантски пораки и повици на протести по социјалните мрежи. „Дволичниот Кир не може да ги контролира улиците, па се обидува да ги контролира мислењата“, обвинува опозицијата.

Десетици европратеници од разни политички блокови се здружија во притисок врз Европската комисија конечно да преземе решителни мерки против владата на Нетанјаху и барем да се обиде да ја спречи хуманитарната катастрофа во Газа. Бараат од ЕУ со дејства, а не само со зборови, да ги брани основните вредности што ги промовира пред светот: „Времето за морален кукавичлук заврши“.

Истражувачи поддржани од милијардери, тајно планирале геоинженерски проект од пренаменет носач на авиони да создадат вештачки облаци кои со својата сенка би го спречиле глобалното затоплување. Локални власти лани им го пресекле планот во старт. Тоа, всушност било само пилот-проект за многу поголема операција, да создадат облаци со површина колку третина Македонија.

За да ја амортизираат популациската катастрофа од повеќедецениската политика „едно дете“, комунистичките власти на Кина сега им даваат на семејствата помош од по 500 долари годишно. Сумата едвај може да ги покрие трошоците за пелени и без посериозни структурни иницијативи тешко дека ќе ги охрабри Кинезите имаат повеќе деца, чие израснување до матура ќе ги чини 75.000 долари.

Дури сега, две и пол години по катастрофалните земјотреси во Турција во кои загинаа десетици илјади луѓе, Гугл призна дека потфрлил системот што требало автоматски да испрати предупредување до милиони луѓе и да им даде доволно време за да се засолнат. Многу земји се потпираат на системот АЕА, верувајќи слепо на технологија што не е доволно тестирана.

Хрватска јавност деновиве е шокирана од бруталноста и дрскоста на едно сексуално силување што на девојка во еден хотел ѝ го приредиле „тројца британски државјани.“ Идентификувани се како Ами Арифи (28), Гезим Џафа (28) и Сохиб Шакиби (24). Згрозени се и Британците, кои со децении трпат злосторства од албанските банди, кои ги контролираат проституцијата и трговијата со луѓе.

Британските власти имале добра причина зошто четири години не дозволувале да се спомне ни збор за тајната операција за згрижување десетици илјади Авганистанци. Меѓу луѓето што добиле азил има многумина талибанци, џихадисти, злосторници, кои корумпирани службеници во Кабул ги запишувале како блиски роднини на вистинските соработници на британските трупи.

После неколкумесечна неизвесност и опасност од непредвидлива трговска војна меѓу двата економски блока, Доналд Трамп и Урсула фон дер Лајен постигнаа договор. Базичната линија на царинење на европскиот извоз во САД е утврдена на 15 проценти. Многу стоци милијарди ЕУ ќе мора да дава за енергенси од САД.

Преземајќи си улога на „господар на војната“, Илон Маск во 2022 година наредил да се исклучи пристапот на неговите сателити до Херсон за да ги остави украинските сили без комуникација и така да ја запре нивната голема контраофанзива за ослободување на окупираните територии, тврди Ројтерс. Наводно се исплашил од заканите од Путин дека Русија ќе возврати со нуклеарно оружје.

Притиснати од строгите климатски политики, европски земји сериозно планираат да воведат „јалеродни пасоши“ со кои секој човек ќе добие годишни кредити за патување, врз основа на километражата и превозното средство. На пример: два лета до Њујорк и назад би ги потрошиле сите кредити. Ќе има уште построги ограничувања за крстосувања со брод, а се препорачуваат тури со воз и автобус.

Глобалниот пад на цените поради зголеменото производство од Кина и високите царини што ги наметна американскиот претседател Трамп го направи производството на челик неисплатливо во Европа. Се затвораат погони и се укинуваат работни места, но ниедна земја не сака да престане да го произведува суштинскиот материјал за нејзината економска и национална безбедност.

Главната обвинителка Пам Бонди ќе формира специјална група за да истражи колку длабоко поранешниот претседател Барак Обама заглавил во обидите да му го подметне „руското мешање“ во кампањата на Доналд Трамп во 2016 година. Тулси Габард пред една недела тоа го опиша како „предавнички заговор“. Сега објави нови папки со докази и побара кривично гонење на Обама.

Блискоста со Гислејн Максвел долго време му беше слабост на Трамп. Сега таа може да го спаси од тврдењата дека е вмешан во злосторничката шема на нејзиниот сопруг Епстин. Максвел во затвор деновиве лично ќе ја посети висок обвинител, а во август ќе сведочи пред Конгресот како соработник. Идеална шанса за да се спогоди, но прашање е дали некој ќе ѝ поверува на сведоштвото.

Откако НАТО скептицизмот беше издриблан со сите мерки што можеа да им текнат, Романија се враќа на посакуваниот колосек; купува израелско оружје вредно милијарди долари. Ова го прави во период на длабока финансиска криза, кога ќе мора да ги крене даноците и да отпушти една петтина од јавната администрација за да ја затне рекордно длабоката дупка во буџетот.

Привршува апсолутната доминација на гигантите како Рајнметал во воената индустрија во Германија. Владата на Мерц ги менува законите за да им го олесни патот на стартапите до огромниот буџет за одбрана. Малите креативни компании полесно го следат брзиот развој на вештачката интелигенција, дроновите и роботите. Ќе има пари и за луди иновации како бубашваби на далечинско. 

Додека пука по своите соседи, Израел троши милиони долари дневно за да ги бомбардира Европејците со страшни пораки дека Иран ќе ги збрише со нуклеарни проектили. Геноцидот во Газа го претставува како „хуманитарна операција“. Платените реклами на пет јазици на YouTube во изминатиот месец биле претставени пред најмалку 45 милиони луѓе. Скапо е да оправдаш геноцид.

Илјадници луѓе синоќа низ Украина протестираа против ненадејната одлука на претседателот Володимир Зеленски да ја ограничи автономијата на две антикорупциски агенции кои се од централно значење за спроведување на реформите. Справувањето со ендемската корупција е услов за Киев да ѝ се приклучи на ЕУ и да добива милијарди долари помош од Западот.

Бриселските бирократи не дозволуваат некој да им ги нарушува строгите правила на единствениот пазар, дури ни кога тоа се водечки светски еколошки регулативи. Французите педантно со повеќегодишна кампања создавале култура граѓаните правилно да го сортираат отпадот. Брисел на суд ќе се бори против француските етикети на производите за да ги прилагоди на своите стандарди.

Кинеската хидроцентрала Три клисури ги собори сите рекорди според големината и произведената струја. На Кинезите и тоа им е малку, па сега градат нова брана на Тибет, три пати поголема. Вложија 167 милијарди долари за систем од пет брани и 20 тунели под планина. Индија и Бангладеш се жалат дека ќе останат без вода или може да бидат збришани ако Кина ги одврти вентилите.