Дваесет и осумте деца и стотината луѓе што загинаа во поплавите во Тексас, не се жртви само на поројните дождови и надојдените реки, туку и на згрозувачката неодговорност на окружните власти. Со години отфрлале да се инсталираат системи за предупредување и тревога во камповите за деца во критичниот регион со кобно име Долина на поплави. Сирените чинеле по 1.000 долари.

Дури и пред војната, Украина беше општо признаена како една од најкорумпираните во Европа. Откако почнаа битките, десетиците милијарди евра што се долеваат како помош уште повеќе ја засилија корупцијата. Швајцарски весник опишува како се збогатиле клика олигарси, најчесто преку зделки што им ги овозможил претседателот Зеленски. Мирот може да биде уште попрофитабилен.

Администрацијата на Трамп најави дека ќе ги објави списокот клиенти на сексуалниот предатор Џефри Епстин и вистината за неговата смрт, но сега соопшти дека таков список немало и дека тој се самоубил. Шокирана од пресвртот, јавноста реагира дека властите решиле да ја прикријат вмешаноста на врвни ѕверки од светската политичка и естрадна елита во мрежата на Епстин.

Пекинг ги смета податоците како основен фактор за производство, изедначувајќи ги со работната сила, капиталот и земјиштето. Со зацврстување на контролата врз базите, Големиот кинески Брат ќе има целосен увид во животот и навиките на граѓаните, бизнисот и владините служби. Со тој океан од информации во исто време ќе се хранат и тренираат моделите со вештачка интелигенција.

Додека израелскиот премиер Бенјамин Нетанјаху во Вашингтон го предложи Доналд Трамп за Нобелова награда за мир и дискутира за прекин на огнот со Хамас, неговиот министер за одбрана објасни за каков „мир“ се работи. Палестинците од Газа треба да бидат концентрирани во „логор“ во Рафа од кој нема да може да излезат до времето кога ќе треба да бидат депортирани.

Институтот на Тони Блер го искористил неговото влијание како поранешен државник за да се вклучи во процесите во Газа, ама не за да го запре геноцидот, туку за повоената изградба на златната ривиера што таму ја гледа Трамп. Војната, во која беа убиени десетици илјади луѓе, „создала можност што се отвора еднаш во векот за обнова на Газа“, се наведува во документите.

Спротивно на мислењето на либералите, низа анкети покажуваат дека мнозинството Американци ја поддржуваат депортацијата на сите имигранти што нелегално престојуваат во САД. Сите дојденци не се криминалци, но бандити и шверцери ги злоупотребуваат отворените граници. Загрозени се чувствуваат и легалните мигранти, кои поминале мачни процедури за да се интегрираат.

Повеќето членоки на Северноатлантската алијанса сега ќе инвестираат поголем дел од својот БДП во војска отколку што инвестирале, на пример, во 1970 година, за време на Студената војна, пред детантот, односно ублажувањето на тензиите меѓу суперсилите, што го договорија Никсон и Брежњев. За победа над моќниот Советски Сојуз им требале помалку пари отколку за парирање на денешна Русија, која е само сенка на СССР.

Наведувајќи ранливост од напади и кризи, Брисел планира да создаде големи европски резерви од основни производи и стратегиски материјали за случаи на воен напад, саботажа или природна катастрофа. Ги повикува членките да складираат се, од храна и лекови, па до ретки минерали и алати за поправка кабли. Граѓаните уште во март беа повикани да направат залихи за најмалку три дена.

Израелските сили од октомври 2023 година убија близу 60.000 Палестинци во Газа. Уште безброј се заробени под урнатините, умираат од глад или биле застрелани додека чекале храна. Паралелно со крвопролевањето, забранети се меѓународни медиуми и се води системска кампања за истребување на оние што останаа да го документираат и да го разоткријат геноцидот во Газа и Западниот Брег.

Од Азија преку Европа и Блискиот Исток до Америка се водат спорови, конфликти и војни за пристап до вода. Русите ја разнесоа браната Каховка во Украина. Индија ја запре реката Ченаб како притисок врз Пакистан. Се пречкаа Тексас и Мексико. Израел ја дозира водата за Западниот Брег. Новиот случај е етиопската мегабрана на Нил, која Египет ја смета за егзистенцијална закана.

Едвај нешто повеќе од половината млади во Европа се уште веруваат дека демократијата е најдобрата форма на владеење. Една петтина би прифатиле автократска власт. Мнозинството е убедено дека Европската Унија премногу се занимава со тривијални прашања, како климатската агенда, наместо да се посвети на суштинското - да обезбеди поквалитетен живот, безбедност и економски раст.

Австрија објави дека ќе го депортира во матичната земја првиот сириски мигрант. Тоа со огромен интерес го следат другите европски земји, кои во изминатите години примија речиси 1,7 милион Сиријци, а не можеа да ги депортираат ни криминалците меѓу нив, зашто беа заштитени како бегалци. Сега се смета дека не се под закана, бидејќи е соборен режимот на Асад од кој побегнаа.

И конзервативците и екологистите жестоко го критикуваат новиот климатски план на Европската комисија за 2040 година. Едните тврдат дека преамбициозните и неостварливи цели ќе го зголемат товарот врз економијата и граѓаните, давајќи им предност на САД и Кина. Другите се жалат дека не е доволно строг и дека е разводнета веќе прифатената цел за намалување на емисиите на CO2.

Иранската морнарица за време на судирот со Израел натоварила подводни мини на бродови за да го блокира транспортот низ Ормуз, протокот до Персискиот Залив низ кој поминува една петтина од глобалната трговија со нафта и гас. Американскиот удар врз нуклеарните капацитети на Иран ја крена цената на нафтата за 10%. Блокадата на Ормускиот теснец би предизвикала светски хаос.

Во денови кога Франција гори од топлотниот бран со температури над 40 Целзиусови степени, властите го отфрлија барањето на десничарската лидерка Марин ле Пен за масовно инсталирање клима-уреди во училиштата и јавните установи низ земјата. Аргументот на властите е дека климите ослободуваат топлина што ги загрева улиците и им го прави животот пекол на комшиите.

Наместо да биде депортиран, албански мигрант со дебело криминално досие доби право да остане во Британија. Трибунал оценил дека речиси 50 пресуди за грабеж и провали „не се доволно екстремни дела што би ја револтирале британската јавност“. Може само да се нагаѓа каде е границата за „екстремно“. 100? 200? Згрозени од вакви пресуди, и власта и опозицијата бараат итни реформи.

Четворица новинари од турското сатирично списание Леман се уапсени поради карикатура на која наводно е прикажан пророкот Мухамед. Главниот уредник попусто се извини и објаснува дека на карикатурата не е прикажан Пророкот, туку жртва на израелско бомбардирање. Полицијата едвај ја запре групата религиозни демонстранти што го нападна седиштето на Леман и повика на „одмазда“.

Соочени со огромниот финансиски товар што Трамп им го наметна на членките на НАТО, владини функционери во Рим планираат како „трошок за одбрана“ да подметнат амбициозен инфраструктурен проект што го планирале Берлускони, Бенито Мусолини, дури и старите Римјани. Да се изгради мост од 13,5 милијарди евра што би ја поврзал италијанската „чизма“ со Сицилија. 

Откако Трамп ѝ објави трговска војна, Кина строго го ограничи извозот на ретки минерали и магнети, кои се клучни суровини за индустријата за автомобили, авиони и медицинска опрема. Постигнат е нов дил со САД, но Пекинг го кочи извозот со бавни бирократски процедури за издавање лиценци. Американски компании се жалат дека им останале резерви за само три месеци. 

На својот 90-ти роденден на 6 јули, 14-от Далај Лама ќе ја објави одлуката кој ќе биде неговата нова инкарнација. Најави дека детето што му се јавило во визиите нема да биде од Кина, а може да биде и девојче. Целта е јасна, да се спречи Пекинг да ја искористи смртта на Далај Лама за да наметне свое дете не негово место и да го задуши влијателното будистичко движење на Тибет.

Генералниот секретар на Обединетите нации, Антонио Гутереш, оцени дека новиот систем за дистрибуција на помош во Газа е „суштински небезбеден и „убива луѓе“. Иако израелската војска досега тврдеше дека пукале само предупредувачки врз главите на луѓето, заради растечкиот број на индиции и докази, во војската е покрената истрага да се проверат инцидентите. Досега над 400 луѓе изгубиле живот барајќи помош. 

Трамп имаше импозантна поддршка на почетокот на неговиот втор мандат но реалноста не може да ги задржи тие бројки, особено што тој не успеа да одржи неколку клучни предизборни ветувања, дека брзо ќе ѝ стави крај на војната во Украина или дека Америка веќе нема да се плетка во странски конфликти. Сепак, рејтинзите и натаму не му се лоши, особено ако се знае дека Буш едно време имаше 25% а Труман само 22% поддршка за време на мандатот. 

Според дојава на ЦИА, британската разузнавачка агенција имала двоен шпион во своите редови кој работел за Русите. Ја започнале најобемната и најскапа нивна истрага после Студената војна за да ја најдат кртицата. Дваесет години го барале, ништо. Човекот кој им бил сомнителен во меѓувреме заминал во пензија. Руските шпионски операции тогаш ги водел Владимир Путин.