Првиот човек на водечката научна институција на ЕУ, професор Мауро Ферари, поднесе оставка на својата позиција во знак на протест за начинот на кој ЕУ реагираше околу ковид-19 кризата.

„Секоја пролет е некој вирус, така и сега е некој коронавирус“, оптимистички ќе каже белорускиот асимптоматски лидер кој „лично ги анализирал податоците“ (има човекот завршено Земјоделско) и видел дека тука нема ништо страшно. Во отсуство на официјални бројки на кои им се верува, луѓето во Белорусија почнуваат меѓусебно да се информираат за состојбата со испишување графити со тоа колку жртви има во маало.  

Рускиот претседател се тестира секој ден откако пред некое време беше објавено дека еден доктор со кој имаше личен контакт е позитивен на ковид-19. Исто така рускиот претседател се уште држи состаноци во Кремљ како на времето.

Кој е Чарлс Либер, уапсениот професор од Харвард за кого на многу интернет инстанци ќе сретнете дека е тоа е злотворот кој го создал коронавирусот и потоа им го продал на Кинезите?

Секоја земја има свои специфики на пулот инфицирани од коронавирус и ќе треба уште долго време сите тие податоци да се соберат, спастрат и анализираат за да се извлечат некакви поуки. Во Русија на пример, оние преку 60 години се само 15% од вкупниот број заразени. Интересно е и зошто Русија не ги тестира веднаш оние што се враќаат со авион.

Наредбата за карантин во Индија важи за цела држава, само што пред наредбата цела држава не се наоѓаше на место на живеење според лична карта, ниту пак баш цел држава има „домашна адреса“.

Гневни што нивните страдања се игнорираат, надополнето со повторно ЕУ финансиско ценкање (повторно посебно од Германија), на Италијанците моментално не им е потребен Салвини за да се чувствуваат предадени од Унијата која до пред неколку недели се колнеше во единство и солидарност.

Оптимизмот на ваквата порака на англиската кралица Елизабета Втора до јавноста има посебна драж: жената има 94 години.

Ги бркаат од маaло, ги каменуват, ги плукаат. Сето тоа уплашената раја од некои заедници го прават за да не се заразат од лекарите и медицинските сестри. Кога ќе затропа корона во нивно маало, ќе нема кој да ги опули. Дарвин пуштен на најјако.  

Земјата до сега има тестирано вкупно 47.000 луѓе, а се организира за наскоро да може да тестира по 30.000 луѓе на ден. До сега имаат само 5 потврдени смртни случаи од ковид-19, и околу 1400 заразени. Реакцијата на Јужна Африка се опишува како „побрза, поефикасна и побезмилосна“ од најголемиот дел од остатокот на светот.

Авион натоварен со маски и спремен да полета за Франција, на аеродромот во Шангај е пресретнат од неколку ликови кои нудат три пати повеќе пари за маските отколку што платиле Французите. Понудата е прифатена на лице место и наместо во Франција, пратката завршува во САД.

Со оваа стапка на тестирања од почетокот на ширењето на коронавирусот во Германија се опфатени речиси 920.000 лица.

Враќање на „старото нормално“ кое важеше до пред пандемијата нема да има и сите треба да се подготват за „новото нормално“ е пораката од гувернерот на Њујорк, Ендру Куомо, до остатокот на земјата.

12,5 милионскиот Шензен ќе стане првиот кинески град што ќе забрани продажба и јадење месо од мачки и кучиња.

Како што имаат право на лице место да убијат нарко-дилери, така властите на Филипини сега имаат право на лице место да убијат секој што ќе се побуни или ќе се обиде да го наруши делењето храна за време карантинот во земјата.

Одреден број влади од Европа ја одбија кинеската опрема за справување со коронавирусот затоа што била подстандардна или дефектна.

Капетанот на нуклеарниот носач на авиони УСС Теодор Рузвелт во очајнички апел побара од американската морнарица да му испрати медицинска опрема која ќе дозволи третман на над 100-те заразени морнари и нивна изолација за да се избегне ширење на болеста на целата посада. На бродот во моментов има 4.000 лица.

Секаква употреба на зборот „коронавирус“ од сега е забранет во Туркменистан, а заедно со тоа се забранува и носење маски во јавност. Може ќе изгледа како коинциденција, ама Туркменистан е и една од ретките држави кои до сега немаат пријавено ниту еден случај на коронавирус.

И претходно кога даваше прогнози, американскиот претседател зборуваше за 100.000 жртви како оптимистички исход, и дека ако им успее таму да го запрат вирусот дека ќе треба да си честитаат. Вчера за прв пат спомна дека по ново се пресметале дека вирусот може да однесе 240.000 животи.

Во моментов во ЕУ не е можна ниту слобода на движење на луѓе, ниту слобода на движење на производи, а и двете се едни од главните столбови на кои се базира Унијата. Паралелно со ваквата идеолошка трагедија на Унијата, во Шпанија и Италија се одвива и човечка трагедија за која Унијата допрва ќе треба да одговара.

По неколку месеци карантин и комплетна изолација на земјата и сите можни индустрии во неа, народот почна да снемува пари за подмирување на најосновните потреби. Како што снема пари, така се случија серија грабежи на супермаркети, па сега италијанската полиција е распоредена пред нив.

„Може ли маж ми да се гледа со швалерката?“ е едно од прашањата околу коронавирусот што деновиве е поставено на телефонскиот број на француската полиција.

Кога жариштето на заразата беше во Кина, Твитер забележа 900% зголемување на хејтспич кон Кина и Кинезите. Ама, тркалото се врти. Сега таму кога ќе видат плави очи, домородците ги фаќа паника.  

Цела Европа е угасена и стишана. Свети и бучи само Шведска (ок, таа не бучи и онака). Таму решија да ги остават отворени училиштата, угостителските објекти, теретаните, бизнисите. Надлежните процениле така, луѓето им веруваат. А си веруваат и меѓусебе.