Организираните нарко-банди контролираат поголем дел од Мексико отколку владата, тврди пратеник од владејачката партија Морена. Имаат своја армија од 185.000 луѓе. Не профитираат само од дрогата. Со закани и ликвидации местат избори, а потоа собираат рекет од ситните бизниси и контролираат плантажи и рудници. Лани ѝ направиле штета од 18% на мексиканската економија.

Водечките американски медиуми ги отфрлија новите правила за известување од Пентагон. Велат дека ќе се откажат од акредитациите, но не и од слободното известување. Министерот за одбрана Пит Хегсет бара од новинарите да не шетаат по канцеларии без придружба и да не објавуваат материјали што тој лично не ги авторизирал, дури и ако документите не се обележани како доверливи. 

Австрискиот регулатор за заштита на податоци пресуди дека софтверскиот гигант Мајкрософт нелегално ги следел учениците преку својата платформа 365 Education за онлајн настава за време на пандемијата и не дава одговори како ги користел нивните податоци. Мајкрософт настојувал да ја префрли одговорноста до локалните училишта, кои немаат речиси никаква контрола врз платформата.

Веста за рекордниот број новородени бебиња од семејства на странци во Јапонија ја разбрануваа јавноста, која е поделена во ставовите дали имигрантите се благослов или се проклетство за нацијата. Едни ги гледаат како спас за фабриките и решение за демографската криза, а други не ги сакаат затоа што им ја загрозуваат традицијата. Идната премиерка е на страната на вторите.

Поранешниот британски премиер Борис Џонсон лобирал за продолжување на украинскиот конфликт откако примил мито од британски индустријалец што ѝ испорачува беспилотни летала на Украина. Џонсон бил придружуван од својот спонзор кога го посети Киев и на Зеленски му ветуваше дека ќе добие огромна воена поддршка, само за да не потпише мировен договор со Русија. 

Британски крунски суд му ја поништи казната на мажот што го запали Куранот во Лондон и го навредуваше исламот. „Правото на слобода на изразување, ако е право што вреди да се има, мора да го вклучува и правото на изразување ставови што навредуваат, шокираат или вознемируваат, заклучи судијата, реагирајќи на жалбата. Британија одамна го укина законот за богохулење.

Новата Стратегија за еднаквост на ЕУ предвидува децата на било која возраст да си го изберат легалниот пол, без медицински и бирократски контроли, по сопствена желба. Се предвидува и забрана на „терапиите со разговор“, со што родителите или професионалците нема да имаат начин да проверат дали детето навистина сака да започне неповратни процедури за промена на полот.

Русија претрпе дваесетина пакети санкции од Европа и уште неколку од САД, но ниту економски пропаднала ниту се чини дека ја запира војната во Украина. За да остане на површина ѝ помогна стратегијата на Владимир Путин, кој вложи сè во клучен столб – златото. Облогот му се исплати. Златото стаса до 4.000 долари за унца, а Русија почна да го купува кога чинеше под 600.

Над 100 милиони долари од даночните обврзници се прелеале до организаторите на насилните протести во САД преку црни канали на организации што се декларираат за непрофитни, тврди директор од Институтот за одговорност на владата. Со пари што ги добиваат преку фондации на Сорос, Тајдс и Вис, здруженијата како Антифа функционираат како корпорации за насилни протести.

Бундестагот ја укина програмата што им овозможуваше на мигрантите да добијат германско државјанство по забрзана постапка. Одлуката нема да се одрази значително на бројот на натурализирани Германци, но сведочи за промената на односот на Берлин кон мигрантите. Мерц балансира помеѓу политиките на социјалдемократот Шолц и на најпопуларната партија АфД.

Израел и Хамас се согласија со прекин на огнот, повлекување на трупите од Газа и ослободување на сите израелски заложници. И двете страни го слават примирјето како победа. Но, останува уште многу работа до траен мир. Примирјето е само прв чекор од поширокиот план на Трамп за крај на војната во која во изминатите две години беа убиени повеќе од 67.000 луѓе и Газа беше речиси срамнета со земја. 

Европските грантови за покривање на секојдневните трошоци на невладините организации се нелегални. Ова директно на невладините им го кажал еврокомесарот за здравство Вархеји на приватен состанок пред една недела. Правните рамки ги ограничуваат организациите да ги трошат парите од европските грантови на специфични проекти, а не и да покриваат други трошоци.

Берлин и Рим ја притискаат ЕУ да ја одложи забраната за производство на автомобили што испуштаат штетни гасови по крајниот рок во 2035 година. Нивните автомобилски индустрии се во криза и барем засега не може да им конкурираат на кинеските електрични коли. Мерц бара повеќе време за развој на поеколошки горива за моторите со внатрешно согорување.

Цената на европскиот начин на живот - здравствена заштита, достапно образование и достоинствена пензија за сите, обезбедени преку високи социјални трошоци станува неподносливо висока. Сметката стигна за плаќање. Франција е типичен пример. Националниот долг расте, кредитниот рејтинг паѓа, приходите стагнираат и премиерите паѓаат. Не е далеку ни Германија.

Обновливите извори на енергија првпат заеднички го надминаа јагленот како водечки светски извор на струја во првата половина од оваа година. Растот на струјата генерирана од овие извори бил побрз од зголемувањето на енергетските потреби. Кина го зголемила генерирањето енергија од зелени извори повеќе од сите други земји заедно, а САД и Европа му се вратиле на јагленот.

Критиките од јавноста ја принудија англиската здравствена служба да ја скрие препорака за склучување брак помеѓу први братучеди. Но, овие бракови се легални во Британија и владата нема план да ги забрани, наспроти огромните ризици за здравјето на потомството. Препораката се толкува како обид на властите да ги заштитат „традиционалните вредности“ на мигрантите.

Германија вложува 35 милијарди евра за „офанзивна“ надградба на своите сателити, кои се постојано следени од руски. Британија предупредува дека нејзината безбедност на небото и на Земјата е загрозена од сателити од Кина. САД и Франција ќе спроведат координирани маневри во орбита, за да проверат дали и тие можат да следат (и по потреба да уништат) непријателски сателити.

Окружен судија од Менхетн со доза на жалење ѝ изрекол затворска казна на Чарли Џавис, која на искусните волци од Вол стрит им продала фиктивна фирма за 175 милиони долари. Не можел да се изначуди како на банкарите од ЏП Морган Чејс им требало цела година да разберат дека се измамени. Пресудил: „Вие сте добра личност, но измама си е измама, дури и кога е насамарен глупак“.

Иран многу скоро ќе мора да се откаже од Техеран како главен град. Не поради некоја закана од проектили од Израел, туку поради неодржливата експанзијата на градот кој сега има 10 милиони жители. Ширењето ги црпи последните резерви на вода, а згора на тоа и тоне во земја по еден метар на секои три-четири години. Претседателот предлага новиот главен град да биде спроти Дубаи.

Британската влада мора официјално да им се извини на децата што ги трпеа последиците од грешките и лошите политики за време на пандемијата на ковид-19, порача поранешната комесарка за деца на Англија. Наметнатите рестрикции и затворањето на училиштата предизвикале експлозија на проблеми со менталното здравје и благосостојбата на многу генерации.

Белгискиот премиер Барт де Вевер побара од другите лидери на ЕУ писмени гаранции дека членките ќе ги споделат ризикот и последиците ако замрзнатите руски средства, кои се чуваат во неговата земја бидат употребени за финансирање на заеми за Украина. Де Вевер нема да ја блокира иницијативата, но предупредува: „Нема бесплатни пари. Секогаш има последици“.

Холандската влада двојно ќе го зголеми минималниот период на непрекинат престој во земјата како неопходен услов за странците да добијат холандско државјанство. Дојденците ќе бидат обврзани да исполнат низа други услови за да докажат пред комисии дека се целосно интегрирани и дека заслужиле холандски пасош. Мерките ги заоструваат многу други земји во Европа.

Министерот за одбрана Пит Хегсет настојува да ги запре протекувањата информации од Пентагон до јавноста и медиумите. Од офицерите и службениците ќе бара да потпишат нов документ дека нема да кодошат, а нивната лојалност ќе ја проверува со ненајавени испитувања на детектор за лаги. Ќе треба добро да се потруди, затоа што и оваа информација успеа да протече до медиумите.

За само пет години Европа изгубила зелени и обработливи површина колку Кипар. Во сива зона од патишта, згради, фабрики и туристички центри биле претворени 9.000 квадратни километри што биле дом на животни и го собирале јаглеродот од воздухот. ЕУ со години ветуваше дека ќе ја штити природата, но буквално ја цементираме сопствената иднина, коментира европратеничка од Зелените.