Кој порано, кој подоцна, осудени на смрт се сите енергетски проекти што не се рентабилни, а добиваат големи субвенции само поради тоа што се „зелени“. Инвеститори се откажуваат од американски проекти за генерирање струја од ветер и сонце, на задоволство на домаќинствата и бизнисите, чии сметки нема да поскапат до 15 отсто. И на уште поголемо задоволство на птиците.

Старата гарда сицилијански босови се жалат дека на мафијашите од новата генерација не им е света заклетвата и веднаш се пријавуваат за заштитени сведоци ако бидат приведени. Полиција се фали со рации и апсења, но предупредува дека Коза ностра се реорганизира, купува оружје преку даркнет и регрутира нови војници. А во Палермо се враќаат и старите волци осудени на доживотни робии, но ослободени поради „примерно однесување“. Имало значи надеж.

Иако европските квази-либерални елити главно се шокирани од дрскоста на американскиот потретседател да им каже дека слободата не се брани со замолчување на оние кои мислат поинаку или пак со ставање во карантин на идеите кои некому не одговараат, не се малку и оние кои отворено се гордеат со ограничувањето на слободата како добра работа. Патем се доволно неуки да потегнат и плашење со Хитлер.

Метлата на Одделението за владина ефикасност ги подбра и инженерите од агенцијата за нуклеарна безбедност, за на одделот на Илон Маск отпосле да му стане јасно дека без нив нема кој да се грижи за нуклеарниот арсенал. Сега ги молат инженерите да се вратат на работните места, ама имаат мал проблем: не можат да ги најдат.

Неодамнешно истражување на Империал колеџот во Лондон откри дека модерните комерцијални авиони кои летаат на големи височини создаваат подолготрајни „опашки“ (попознати од теориите на заговор како кемтрејлс) отколку постарите авиони. Ова сугерира дека иако модерните летала испуштаат помалку јаглерод, може да имаат поголемо влијание врз климатските промени.

Астрофизичари од целиот свет последниве месец и половина внимателно „гледаат нагоре“ поради  астероидот наречен 2024 YR4 откриен за време на католичките божиќни празници кој би можел да ја погоди Земјата за околу седум години. Добрата вест е дека веројатноста да нè зачука е мала, лошата дека таа веројатност расте.

Викиликс обелодени дека УСАИД има уфрлено речиси половина милијарда долари со кои  финансирале 4.291 медиум ширум светот кои во една година произведувале по 4.799 часа програма што допрела до 778 милиони луѓе. Попат, имаат тренирано (дресирано?) преку 9.000 новинари. Со таква армија на располагање станува јасно - парите на УСАИД не беа да се нахранат гладните туку да се нахрани наративот пожелен за Вашингтон.

Американскиот претседател Доналд Трамп на својата социјална мрежа „Truth“ објави дека ќе потпише извршна наредба за ставање крај на „бесмислената промоција на хартиени сламки“ од неговиот претходник Џо Бајден. Главната порака на новиот шериф е: „Се враќаме на пластика!“ А тие хартиените сламки Трамп до толку не ги можеше, што дури и продаваше пластични.

Заробена во неолибералниот затвор, ЕУ може да се прости од своите перспективи во иднината. Додека Кина и САД се во жестока трка за технолошка супериорност, ЕУ вади Пауер поинт презентации. Дури и да ги зголеми инвестициите, како што им препорачуваат сите анализи, тоа нема да ја зајакне самата европска економија туку наднационалните и бирократски структури кои владеат со блокот.

Органската храна отсекогаш се поврзувала со поимоќните урбани слоеви кои по правило инклинирале кон леви идеи и Демократската партија. Но, најмоќен поборник на органското производство станува човек од бааги десна влада, Кенеди Јуниор, кому ова му е особено битна тема. Ама па сега некои стравуваат дека неговото инсистирање на органско производство може да ѝ наштети на климата. 

Секој шести човек е огорчен. Многумина се уплашени за својата егзистенција, се чувствуваат дискриминирани и отуѓени па дури и богатите стравуваат дека ќе станат жртви на системот. Така светот влегува во 2025-та година, со изгубен оптимизам и верба дека ќе биде подобро а политичката поларизација која беше лоша, е заменета со нешто полошо: сега секој е само за себе.   

И во минатите и во сегашните пожари во Лос Анџелес, полека исплива еден невообичаен бизнис, приватни пожарникари и служби, составени главно од пожарникари ветерани кои ги наплаќаат своите услуги кога се најмени. А ги ангажираат не само богати поединци туку и осигурителни компании кои ќе изгорат ако треба да обештетат некои скапо осигурени објекти.   

ПејПал призна дека истакната активист за правата на децата, во  време на пандемијата останала без можност да располга со своите финансиски средства, откако „погрешно“ се изјаснила против затворањето на училиштата и задолжителните вакцини. „Ме исплукаа како екстремист ама времето покажа дека сум во право,“ вели Моли Кингсли.

Новиот претседател најави дека брзо и со укази ќе ги укине политиките на Бајден, особено околу климата и  животната средина. Но, тие се преточени во стотици прописи а од првиот мандат Трамп знае дека шорткатите не минуваа баш најдобро подоцна, кога неговите потези биваа обжалени на суд. А тогаш имаше и многу повеќе простор за кадровски смени во судството отколку сега.

Не требаше да мине долго време па Марк Закерберг од новиот американски претседател да проба да ја наплати својата одлука за отстранување од Фејсбук и Инстаграм на керберите на јавниот збор, нагалено наречени факт-чекери. Шефот на Мета, компанија вредна 1.500 милијарди долари, се  пожали дека Европската Унија неправедно го глоби и побара интервенција на Белата куќа.

Пожарите во Лос Анџелес и пеплосувањето на некои од најбогатите делови на градот, на прогресивците им покажаа дека лошото управување и спроведувањето политики во кои поважни ќе бидат идеолошките каузи наместо обичните потреби на луѓето, не маваат секогаш само по сиромашните туку и по нивната база. Многу битни работи се менуваат во Америка. 

Прво ладно ги откачи факт-чекерите со оценка дека со својата политичка пристрасност направиле повеќе штета отколку ќар за довербата кон неговите платформи. Потоа гостуваше кај „омразениот“ Џо Роган за да се поплака како досегашните власти им се дереле кога барале да кинат содржини од Фејсбук а сега наредил да се отстранат тампоните за менструација од машките тоалети во Мета. Марче, ако си киднапиран, трепни.

Пакистанската национална авиокомпанија (ПИА), на која во 2020 година ѝ беше забрането да лета за за Англија, САД и ЕУ поради безбедносна загриженост, објави дека ги обновува летовите за Европа. И како паднати од Марс да не чуле за 11 септември, пуштија реклама во која се гледа авион како лета директно кон Ајфеловата кула. Префинето.

Во 2024 година, во САД без дом биле 770.000 луѓе. Тоа е пораст од дури 18% од претходната годиина и рекорден број откако нивниот „СИЗ за становање“ почна да ги брои бездомнициите пред 18 години. Како што најави пред 10-тина години озлогласениот Светски економски форум: „Нема да мие ништо и ќе бидете среќни.“ Можеби Илон Маск може и тука да помогне?

Гардијан беше еден од неколкуте медиуми кои се одважија да се дознае што има Едвард Сноуден инсајдерски да каже за постоењето на огромен државен апарат впрегнат во мониторирање и контрола на граѓаните и јавноста. Не постои веќе тој Гардијан. Сегашниот Гардијан се залага за регулатива, ставајќи се меѓу оние кои мислат дека слободата на говорот може да биде многу опасна работа. 

Години се изгубија во прочуената афера „russian hoax“ која американските демократи и нивните медиумски појачала ја пумпаа за да ја објаснат првата победа на Трамп со руско мешање во претседателските избори. Приказната заврши со едно големо ништо, но матрицата останува иста. Сега Илон Маск ќе им биде крив ако во Германија победи „страшилото“ Алтернатива за Германија.    

Свиркач инсајдер од најпопуларната и највредна компанија за вештачка интелигенција на светот е најден мртов во својот стан. Њујорк Тајмс, една од многуте компании кои го тужат ОпенАИ за крадење на нивните авторски дела додека го обучуваат четботот, тврдеше дека тој поседува драгоцени информации и материјали кои ќе го подржат нивниот случај пред федералниот суд.

Норвешка се смета себе за жртва на ценовна инфекција од европските цени на струјата и планира да поработи на својот енергетски суверенитет. Владеачките партии најавуваат гаснење на интерконекцијата со Данска а се спомнува и репреговарање на договорите со Англија и Германија. Без норвешката струја, дури тогаш на европскиот енергетски пазар ќе биде (не)весело.  

Државниците и политичарите во најсилната европска економија се надеваа дека Германија може да стане глобален лидер во две клучни области: климатските промени и миграциската и социјална политика. Можеби убави но скапи и економски убиствени елементи. Ја имаат најглупавата енергетска политика на светот а дарежливите социјални програми им одат на мигранти.