Премиерот Бенјамин Нетанјаху, неговите генерали и уште помилитантните министри отворено кажуваат дека целта им е воените сили да останат во јужен Либан сè додека не биде целосно уништена инфраструктурата на проиранската милиција Хезболах. Тоа може да се смета за најава за трајна окупација, ако се има предвид дека воено надмоќните израелски сили по три години брутални бомбардирања не успеаја да го уништат Хамас на многу помала територија, како Газа.
За своите цели во Либан, Израелците добиваат политичка, финансиска и воена поддршка од САД, не само на фронтот.
Во август 2024 година, Централната команда на американските сили објави реклами на Тиндер во Либан со повик до корисниците на платформата да не се приклучуваат во отпорот против континуираниот израелски геноциден напад врз земјата.
Тиндер, најпопуларната апликација за „запознавање“ во светот, има над 75 милиони активни корисници во повеќе од 190 земји. Нејзиниот сопственик е Match Group - конгломерат од повеќе милијарди долари кој поседува најголем пазарен удел на платформи за запознавање, вклучувајќи ги Hinge, Match, OkCupid. Plenty of Fish и Salams.
Сопственичкиот дел овозможува пристап во еден од најголемите дигитални рудници - лични и интимни кориснички податоци, пораки, видео повици, препознавање на лица и податоци за локација на потенцијално стотици милиони корисници низ десетиците апликации за запознавање на Match Group. Кориснички податоци на Tinder беа пронајдени при упад во Gravy Analytics - компанија за брокерски податоци која продава податоци на владини агенции за да се користат за следење на локацијата на полицијата и војската.
Стратегијата на Match Group се милитаризира откако ционистичкиот милијардер Пол Сингер и неговата група Elliot Management во јануари 2024 година купија акции за 1 милијарда долари.
Сингер, донатор во кампањата за Трамп, е коосновач на Start-Up Nation Central (SUNC) - непрофитна организација со седиште во Тел Авив, која работи на промовирање на израелска технологија и уфрла офицери од елитната разузнавачка Единицата 8200 во сите големи американски технолошки фирми како Google, Microsoft, OpenAI и Palantir.
Во февруари 2024 година, само еден месец по инвестицијата од Сингер, Match Group објави ново партнерство со OpenAI. Технологијата на OpenAI беше важна за операцијата во Газа.
Во март 2024 година, Спенсер Раскоф - коосновачот на Zillow и член на одборот на Palantir, се приклучи во управниот одбор на Match Group. Израелските сили ја користеа технологијата на Palantir за надзор, таргетирање цели и геноцид во Газа. Раскоф подоцна беше назначен за извршен директор.
Во тој период почна и психолошката офанзива во Либан.
Не кревајте оружје против САД или нивните партнери, пишуваше во рекламата на арапски јазик до корисници на Тиндер, придружена со слики од воени авиони и логото на ЦЕНТКОМ.
Match Group во 2024 година се соочи со тужба и обвинувања дека нејзините платформи се дизајнирани да ги претворат корисниците во „коцкари заглавени во потрага по психолошки награди“.
Сепак, и покрај партнерството со Пол Сингер и OpenAI, поставувањето на поранешен член на одборот на Палантир за извршен директор и водењето реклами за американската војска во Либан - Match Group вели дека нејзината мисија е „да поттикне значајни врски за секој човек низ целиот свет“.
