Луѓето се социјални суштества. Како и сите социјални животни, ние низ милениумите сме еволуирале да се потпираме на комплексни социјални интеракции со другите од нашиот вид. Ова е клучен дел од нашата еволуција и е основа за најголемиот дел од општествата.
Како што се воведува се поголем број на строги социјални рестрикции, експертите за ментално здравје предупредуваат дека губењето на овие важни врски може да има висока психолошка цена.
Има разлика меѓу социјално изолирање и осаменост.
Социјално изолирање е објективна физичка одделеност од други луѓе - на пример, живеење сам - додека осаменост е субјективно вознемирувачко чувство од тоа што си осамен и одделен.
Можно е да се чувствуваш осамен и во присуство на други луѓе, а можеш и да бидеш сам а да не се чувствуваш осамен. Меѓутоа осаменоста не е само чувство; таа е биолошко предупредување кое доаѓа до твоето тело дека треба да бараш други луѓе. Човековите врски се важни за преживување и прогрес, и твоето тело го знае ова.
Физичкото дистанцирање и мерките за само изолација кои се воведени за ограничување на ширењето на коронавирусот резултираа со се поголем број на луѓе кои се чувствуваат осамено.
Многу пред коронавирусот, ние знаевме дека осаменоста, посебно, се поврзува со повеќе штетни здравствени последици.
КОШМАРИ
Има анегдотални извештаи дека луѓе имале кошмари или проблеми со спиење како последица на стресот од коронавирусот.
Ова не е за изненадување. Според истражувањата на овој феномен, сè што може да предизвика стрес или вознемиреност го зголемува вашиот ризик од кошмари. Траума и вознемирувачки настани исто така можат да имаат слично влијание на твоето спиење и соништа.
ОСАМЕНОСТ
Старите лица се посебно ранливи за време на изолација. Истражувањата ја поврзуваат социјалната изолација и осаменоста кај старите со повисок ризик од повеќе физички и ментални проблеми, како и со когнитивно слабеење и Алцхајмер, дури и порана смрт.
Се смета дека осамените луѓе не се вклучуваат во активност како разговори со други луѓе, минуваат помалку време надвор и физички се помалку активни отколку нивните не осамени врсници, и сето ова предизвикува значителен ментален стрес кој може да доведе до зголемен ризик од Алцхајмер.
Сепак ефектите на социјалната изолација не се ограничени само на постарите. Како што луѓето помалку се гушкаат и поздравуваат за време на пандемија, така ние губиме една од нашите главни човечки врски - допирот.
Човековиот допир ослободува хормон во телото кој се нарекува окситоцин. Окситоцинот е хормонот што ја активира врската меѓу мајката и новороденчето, и тој може да игра и важна улога во препознавање, сексуална возбуда, доверба и вознемиреност. Некои истражувања покажаа дека пониските нивоа на окситоцин резултирале со повисоки нивоа на стрес и вознемиреност.
„Чувството на осаменост и социјална изолација, засилено од сегашната криза на јавно здравје, може да има здравствени последици за повеќе социоекономски групи.
Дополнително, ограничувањето на пристапот до нормални дневни активности, не само одењето на работа, туку и нормалните социјални интеракции со другите предизвикуваат проблеми со менталното здравје, и го слабеат физичкото здравје за оние кои веќе имаат проблем да одржат добро здравје и добробит,“ порачува Европската алијанса за јавно здравје.
РУТИНАТА ПОМАГА
Луѓето зависат од рутини за одржување на своето ментално здравје. Ова може да вклучува активности како одење на работа или зборување со децата на училиште или одење на вежбање.
Кога нивната рутина е изместена и тие се присилени во изолација - со дополнителна закана дека сериозно ќе се разболат од вирусот - постои реална опасност дека проблемите со ментално здравје ќе почнат да се појавуваат.
Како доктор имав зголемен број на повици од моите пациенти околу нивното ментално здравје. За луѓето со постоечки проблеми со менталното здравје моменталната ситуација е посебно тешка, и важно е тие за тоа да разговараат со професионалец.
Тоа што не го сакаме е од пандемијата да излеземе со голем број луѓе кои како колатерална штета ќе страдаат од проблеми со ментално здравје.
Ако имате мака со вашето менталното здравје, колку можете поскоро разговарајте со професионалец.
