- Српскиот претседател Александар Вучиќ е обвинет дека бил вмешан во „Сараевското сафари“ за време на војната во Босна – организирањето тури за странци што плаќале големи суми за да пукаат од снајпери врз цивили во опколено Сараево.
- Хрватскиот новинар Домагој Маргетиќ поднесол пријава за Вучиќ до обвинителството во Милано, кое спроведува истрага за случајот. „Ги приложив сите докази, видео материјали, фото документација, аудио и видео снимки, како и извештаи од медиуми од тоа време“, вели Маргетиќ.
- Новинарот тврди дека Вучиќ бил член на паравоен одред под контрола на Српската радикална партија, кој бил стациониран на позиција на Еврејските гробишта, од каде што снајперисти пукале во Сараево.
- Како доказ тој приложил и снимка од 1993 година, на која се гледа Вучиќ како наводно носи пушка со телескопски нишан. Негови приврзаници тврдат дека Вучиќ тогаш бил новинар и носел триножец за камера.
- „Тврдењата изнесени од хрватскиот новинар Домагој Маргетиќ претставуваат школски пример за злонамерна дезинформација, создадена со цел да го еродира институционалниот кредибилитет на Србија и нејзиниот претседател“, изјави за „Телеграф“ Сузана Васиљевиќ, портпаролка на претседателот.
- Цената на кутија цигари во Германија ќе се зголеми од 8 на 12 евра до 2030 година, поради најавеното драстично зголемување на даноците - за 40% повеќе отколку што досега беше најавено.
- Ќе се зголемат и даноците за тутунот за луле, за пури и за наргиле, а за течностите за е-цигари ќе се зголемуваат за по 1 цент за милилитар.
- Причината е едноставна – да се пополни поголемата дупка во федералниот буџет, известува RND. Проектирано е повисоките даночни стапки да генерираат дополнителни приходи од приближно 756 милиони евра во 2027 година, односно 3.589 милијарди евра во 2030 година.
- „Зголемувањето на даноците е заради заштита на јавното здравје и е во согласност со целта на федералната влада за намалување на стапките на пушење кај младите и возрасните“, изјавиле владини извори за RND.
- Министерството за внатрешни работи на својата официјална фејсбук-страница објави фотографија генерирана со вештачка интелигенција, без притоа да ја означи како таква.
- Фотографијата беше објавена како илустрација на информација за спасување планинар на Матка. Корисниците на социјалните мрежи брзо забележаа очигледна грешка – раката на еден од полицајците беше неприродно издолжена, што е една од честите аномалии кај сликите создадени со вештачка интелигенција.
- По реакциите во јавноста, МВР ја повлече спорната фотографија и ја замени со друга.
