Кога старечките домови се места за живеење а не за умирање

Статистичкиот просек меѓу многу стари и многу мали луѓе е зрелост. Токму таква е оваа идеја за среќавање на двата света, но нејзината зрелост не е ни во статистиката ни во просекот туку во можноста да се уживаат моментите кои го прават животот.

Наместо да ги штитиш децата од идејата за старост и умирање, а на старците да им го ускратуваш задоволството од дружењето со оние на кои тие набрзо ќе им ја предадат штафетата, зошто да не ги искомбинираш овие два света, кои толку природно си се надополнуваат? Првите на почетокот, вторите при крајот, и на едните и на другите им е сосема јасно - дека радоста е во моментот.

Токму ова се случува во дом за стари лица во Сиетл, каде пет дена во неделата оние многу старите и оние многу младите прават силен тим, кој пее, слика, раскажува и се дружи. Програмата е дел од Центарот за меѓугенерациско учење, чија цел е да ги подучи децата за стареењето, за тоа како изгледа да живееш изнемоштен или со хендикеп и да им даде можност „да добијат и да дадат безусловна љубов".

Цели 20 години, колку што трае „проектот", посетата на децата за старите претставува најважниот дел од денот. Учеството во заедничките активности им ја намалува осаменоста и им го подобрува самочувството. Во домот за стари има 400 лица чија просечна возраст е 92, а во градинката, која се наоѓа во истата зграда, има 125 дечиња. Мотото на домот е дека тоа е институција за живеење, а не за умирање.

Еве како изгледа тоа. Рачето на малото врз старечката рака - бесценето затворање на кругот на животот:

24 октомври 2015 - 18:45