- Лондон почнал преговори со Македонија за депортирање мигранти на кои им е одбиено барањето за азил во Британија, пишува „Тајмс“. Според планот, Британија би ѝ плаќала на Македонија за секој мигрант што ќе го прифати и би ѝ помогнала со инвестиции и безбедносни гаранции.
- Мигрантите депортирани во Македонија нема да бидат притворени и ќе можат слободно да се движат и да ја напуштат земјата, пишува Тајмс. Ќе бидат охрабрени да побараат азил или работни визи во секторите каде што има големи недостатоци, како градежништвото.
- „Македонија можеби има некаков интерес, бидејќи нејзината сегашна влада има затегнати односи со делови од ЕУ... Билатерален договор со Британија би можел да ѝ овозможи да демонстрира нови меѓународни партнерства“, изјавил за Тајмс Анди Хоџај, експерт за Балканот на Кралскиот колеџ во Лондон.
- За Британија, земјите од Западен Балкан се привлечни за депортирање мигранти, бидејќи нема големи правни пречки и сите ја имаат потпишано Европската конвенција за човекови права. Лондон води слични преговори и со Косово, кое тврди дека има ограничени капацитети. Босна и Херцеговина ја отфрлила понудата, оценувајќи ја како спротивна на националните интереси.
- Најавувајќи го договорот за стратешко партнерство во мај, премиерот Христијан Мицкоски и британскиот амбасадор Метју Лосон ги демантираа вестите дека во нашата земја ќе се градат кампови за мигранти. „Суштината на ова стратешко партнерство се инвестиции и раст на економијата“, изјави Лосон.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
