Русија го блокираше и Снепчет
5 декември 2025
- Руските власти го блокираа пристапот до Snapchat, откако оцениле дека преку оваа апликација за комуницирање биле загрозени безбедноста на државата и на граѓаните. Од истите причини, воведени се и ограничувања на услугата за видео-повици FaceTime.
- „Овие апликации се користат за организирање и спроведување терористички активности во земјата, за регрутирање на сторители, за измами и за други злосторства против нашите граѓани“, објави државниот регулатор Роскомнадзор. Мерката била одобрена уште во октомври.
- Пред една недела во Русија беше блокиран и Roblox, популарна платформа за онлајн игри, со цел „да се заштитат децата од пристап до недозволена содржина и до педофили кои воспоставуваат контакти со малолетници во играта и закажуваат реални средби.
- Откако почна војната во Украина и судирот со Западот, Русија воведе ограничувања за популарните платформи YouTube, WhatsApp, X и Telegram. Лани беа блокирани апликациите за комуникации Signal и Viber, поради користење за криминални активности.
- Властите во исто време ја проширија новата национална апликација Max, која ја промовираат како универзална платформа за пораки, владини услуги, плаќање сметки и купување. Корисниците на Max отворено се предупредени дека нивните податоци може да бидат дадени на увид на властите.
