Џон Кејџ експериментираше со тишината, која во неговата верзија траеше четири минути и 33 секунди. Но оваа на Раул Хаспел, во траење од една минута, има поинаква порака. Посветена е на мигрантите и бегалците кои престојуваат во главниот австриски центар за азиланти, Трајскиршен, каде владеат нехумани услови.

Њутновата Principia Mathematica била напишана на латински, првите позначајни статии на Ајнштајн на германски, оние на Марија Кири на француски. Но денес речиси сите научни резултати се објавуваат на еден единствен јазик - англискиот, кој парадоксално станува научниот „лингва франка".

На локација на напуштен базен во Вестон-Супер-Маре во Британија, се отвори она што го најавивме тука - Дисмаленд, апокалиптичен тематски парк, чии карактеристики на моменти ќе ви се видат необично познати. Банкси или на суд, или за почесен граѓанин на Скопје, трето нема.

Вчера пишувавме за омилените книги на пејачот на РЕМ, а денес за оние кои ги препорачува уште еден славен музичар. Ама овој ги дава и на заем.

Црното технички е отсуство: визуелно искуство на недостаток на светлина. Во „Светла Земја: откривањето на боите", авторот Филип Бал детално ја следи историјата на употребата и производството на црната боја, која нема врска само со технологијата, хемијата и сликарството, туку и со промена на цели светогледи.

Најпознат како некогашен вокал на Р.Е.М., Стајп е автор на фотографии и дизајни на албумите на бендот, го има осмислувано осветлувањето на нивните настапи, а режирал и неколку од нивните видеа. Од неодамна работи како визитинг професор на одделението за уметност на Њујоршкиот универзитет. Еве кои се неговите 10 омилени книги, со краток коментар.

Замислуваме како би изгледало кога ваков проект би требало да помине пред Наставно-научниот совет на некој од нашите факултети.

Од почетоците на земјоделството до современото производство на пиво, оваа книга чие објавување се планира за октомври, покрива цели 9000 години историја на пијалокот на којшто се насладуваме додека ги пишуваме овие редови (добро де, радлерче).

Текст на Светлана Слапшак во „Пешчаник" за еден артефакт од урбаниот, градинарскиот, кафанскиот и руралниот пејсаж, кој постојано ни е пред очите и под задникот, а за кого ретко размислуваме.

На што можеш да се надеваш во свет кој е генерално неправичен и зол? На тоа дека ако се грижиш за него, едно дрво може да ти роди доволно за од јаболката да направиш пита, за тебе и твоите пријатели. Убав филм, со многу крв, хумор и крај кој успокојува.

Eдна од биографиите-бестселери по која ќе остане запаметена 2015 е „Елон Маск: Тесла, СпејсИкс и потрагата по фантастична иднина", посветена на најуспешниот и најзначаен бизнисмен во светот во моментов.

Ако постои бенд низ чија судбина би можел да се сними политички филм за Југославија, тоа е Забрането пушење. Од перспектива на накнадна памет, кога е сосема јасно дека сите „важни утакмици" за кои зборуваше Хасе се загубени, овој албум е потсетување на времето кога некои седеа со шејтанот и чекаа мугра, додека други во мугра седеа сами и го чекаа шејтанот, па на крајот и го дочекаа.

Интернет деновиве се запали по „откритието" дека Шекспир сакал да дува. Светските медиуми се тркаа во објавување на форензички анализи од лулињата кои ги користел Бардот. Како што обично бива, она што останува откако разбрануваните онлајн води ќе се повлечат, е по некој скелет од информација, кој само покажува колку сме суштински некритични кон она што ни се сервира како „вест".

Кога сакаат да создадат чувство на „сторија" - новинарски жанр кој не е чисто информативен, туку навлегува подлабоко во опишаните ликови и настани, нашите новинари обично го почнуваат текстот (или ТВ сторијата) со човек со име и презиме, полека воведувајќи нè во контекстот преку неговото доживување на нештата.

„Само деца", бестселерот кој раскажува за доаѓањето на славната музичарка во Њујорк со неполни 21, и нејзиното пријателство со фотографот Роберт Мејплтроп, ќе послужи како основа за телевизиска серија, во продукција на американската телевизиска мрежа Showtime.

Во загрепската галерија „Нова" во тек е изложба под наслов „Отпишаните" со која хрватскиот колектив WHW, по повод 20-годишнината од „Бура", потсетува на книгите кои во текот на 1990-тите биле насилно исфрлени од книжарниците и од библиотеките.

За необичниот наплив на нешто што на прво слушање звучи ко оксиморон - „смерни љубовни романчиња" - пишувавме и претходно. Но деновиве нишата е „збогатена" со ново дело, кое можеби ќе останеше незабележано доколку не беше кандидирано за награда којашто се смета за пандан на филмскиот Оскар во овој жанр.

Во ерата на Гугл транслејт човечките полиглоти не престануваат да го привлекуваат вниманието и да предизвикуваат восхит. Еден од нив е Грк кој работи како преведувач во Европската комисија во Брисел. Не знаеме дали зборува македонски, но веруваме дека многу бргу би го научил. 

Ја знаете сцената во „Американска убавина", во која летањето на една пластична ќеса на ветерот треба да ја симболизира бесмисленоста на животот. Оваа пак приказна е раскажана од аспект на една слична (жолта) ќеса, и тоа со глас кој не остава рамнодушен. На крај може ќе пуштите и солза.

Андреас Елпидору е професор по филозофија на Универзитетот Лусвил во Кентаки. Неговата книга која ќе излезе во 2016 се вика „Физикализмот и магијата на свеста", а во неа, меѓу другото, тој се занимава со споредбата на здодевноста и болката. Обете, вели тој, еволутивно ни овозможуваат не само да опстанеме, туку и подобро да живееме.

Уште не ни се верува дека ќе може да ги дофати сите „помеѓу редови" нијанси и повеќекратни значења за кои некои од нас се способни, но IBM тврди дека една нивна програма би можела да ве спаси од тоа да бидете погрешно сфатени, или од тоа да промашите важен подтекст на она што вам ви го порачале.

Роден пред 223 години, славниот романтичарски поет Перси Шели имал спартански навики - не јадел месо, а и генерално бил индиферентен кон храната, јадејќи колку да преживее додека вистински ги „голтал" античките автори. Но едно нешто го мачело - неговата зависност од чај.

Понекогаш среде сите локални „дна" на интернет, човек ќе наиде и на ризница. На сајтот oldprilep.com, на којшто се објавуваат текстови поврзани со историјата и културата на градот „под Марковите кули", има рубрика „новинарство" и подрубрика „црна хроника".