Старбакс своевремено беше шик место и компанијата многу држеше до тој премиум имиџ (за тоа колку се водело сметка за навидум небитни финеси во внатрешниот дизајн, читнете го одличниот текст "Зошто ја напуштив архитектурата").
Следните децении компанијата драстично расте и денес има 22.000 дуќани ширум светот. Истовремено, тоа е денес нивниот најголем проблем. Едноставно, толку се општо популарни да не важат веќе за шик.
Порано им беа важни културошки влијателните корисници, денес примарна конкуренција им се Данкин донатс и Мекдоналдс.
Некои нивни популарни пијачки денес важат за општи места, на англиски "basic bitch," термин со кој пежоративно се опишуваат масовниот вкус за популарни меинстрим работи во поп културата (Пауло Коељо, 50 нијанси сиво...)
А првично посакуваната публика полека заминува кон конкурентите од типот Blue Bottle coffee, кои неодамна собраа 25 милиони долари за дополнителни инвестиции.
"Широката популарност е бакнеж на смртта за тренди брендовите, особено оние кои се позиционирани како скапи марки за младешкиот сектор" потсетува експертот Робин Луис.
За да го задржи својот премиум статус, компанијата пред три години ја купи тренди пекарата La Boulange но за веќе сменетата публика нивната храна беше премногу фенси па се вратија на продажба на старите колачиња од типот на лимун торта.
Последниот обид во тој правец е обединет во хаштагот (македонски тараба) "#racetogether" со која се охрабрува дијалогот околу расните прашања. Со тоа Старбакс се обидува да се одлепи од своите конкуренти и да ја зголеми културната релевантност на својот бренд.
Овде немаат дуќан ама немаат ни потреба да се секираат за тие напредни проблеми. Јер:
"Една во читална пиеше вода во Старбакс чаша. Сто посто во ќесата Зара носи кромид" - @FStojanovski1
