Кога почна агресијата ние почнавме само да го спроведуваме она што го знаевме, уште од 2014, и искуството и вештините што ги научивме од тогаш. А најважното искуство што го имавме и она што го практикуваме како религија е дека Русите и секој друг непријател мора да биде убиен, само убиен, и уште поважно не треба да се плашиме да го правиме тоа, порачува првиот човек на украинските воени сили Валери Залужни во интервјуто за британски Економист.

Напредувањето на Украинците периодов е забавено што заради лошото време, што заради консолидацијата на руските одбранбени линии, меѓутоа интензитетот на борбите не е ни најмалку стишен и тие упорно ги празнат залихите и на луѓе и на муниција на двете страни.

Сем Банкман-Фрид парите, кои не се негови и му се украдени од корисниците, ги дал и на демократски и на републикански кандидати, а со цел да влијае на правецот во кој се движат политиките и законите околу криптоиндустријата.

Клаудиа Диаз Гиен од 2003 како медицинска сестра е дел од тимот на телохранители што лично го обезбедува тогашниот венецуелски претседател. Во 2011 таа со своето медицинско резиме е именувана за прв човек на државната благајна. Деновиве ја осудија во Мајами за примање десетици милиони долари мито.

Со најава „што е многу, многу е“ премиерот на Британија, Риши Сунак, објави план од пет точки за борба со имиграцијата, со посебна точка за имиграцијата што им доаѓа од Албанија.

Кина нема да и ги испорача на Русија компјутерските процесори Лoнгсон на кои руската индустрија се надеваше дека ќе ја пополнат дупката во снабдување со чиповите за производство на напредни оружја и муниција кои ги троши во војната со Украина.

Круна на и онака историскиот договор што го постигнаа двете држави е дека тие „ќе се поддржуваат една со друга но во меѓувреме нема да си се мешаат во своите внатрешни работи.“

Гркинката Ева Кали инспиративно говореше како спортската дипломатија довела до историски промени во Катар. Сега е уапсена за корупција и перење пари поврзани со Катар. Дека е убава - убава е. Ама и дека лакома - лакома е. Дури и нашата капитулација да си го смениме името ѝ беше малку.  

На многумина им делува чудно што марокански фудбалери се сликаат со знамето на Палестина, а мароканските навивачи скандираат пароли и за Палестина. Толку западниот меинстрим го познава арапскиот свет и фактот колку Палестина е симбол за непокор и анти-колонијален стремеж. 

Бројот на имигранти што влегуваат во Франција севкупно има негативно влијание на колективниот живот во земјата, порачува поранешниот прв човек на Генералниот директорат за надворешна безбедност, француската ЦИА, Пјер Брошан.

Руските бомбардери што неодамна беа погодени од украински дронови беа паркирани во руска воена база на нешто повеќе од 482 километри од украинската границата. Москва е на само 400 километри од Украина.

На најголемата европска економија секоја година ѝ се потребни стотици илјади нови работници за да ги заменат оние кои одат во пензија. Канцеларот Олаф Шолц сега ги повикува оние над 60 години да не бидат себични и брзо-брзо да уплаќаат одмори по Тајланди. Криза доаѓа.

Како дочекот на Бајден сам по себе да не беше доволно недостоинствен, Саудијците извонредно многу се потрудија дочекот на кинескиот претседател да го направат што е можно поспектакуларен, за пораката да биде уште појасна.

Гледајќи по номиналната вредност, вчерашната размена на Бут за Грајнер за Русија се толкува како зделка паралелна на онаа во која САД ја купува Аљаска пред повеќе од 150 години.

А да ти помогнеме да се убиеш, е отприлика предлогот што канадските власти го имаат за канадската параолимпијка и воен ветеран, Кристин Готје, кога им се пожалила колку време чека да и биде инсталиран лифтот за инвалидска количка во нејзиниот дома.

Русија се согласи да ја ослободи од затвор американската кошаркарка, Бритни Грајнер, и да ја замени за Виктор Бут, озогласениот руски дилер на оружје кој повеќе од една деценија служи затвор во Америка.

Најмалку една од руските КХ-101 крстосувачки ракети што во ноември удри на Киев, е произведена не порано од октомври годинава тврдат независни инспектори за оружје што ги анализирале останките. И ова е проблем затоа што Русија до сега не требаше да има чипови за да произведува нови ракети.

Американската армија, тајно, без знаење на Украинците, ги модификувала ХИМАРС ракетните системи што ги испраќа во Украина за истите да не можат да бидат употребени за лансирање ракети со голем домет кои би стигнале до Русија.

Бајден може да му помогне на Зеленски, и на Украина, со тоа што ќе притиска за мир, е пораката на колумнистот на Пост до актуелната американска администрација, која од март годинава инсистира дека ќе ја остави Украина сама да ги донесе своите одлуки.

Најдобро е во моментов да се укине Уставот на САД за да се поништат резултатите од претседателските избори 2020 и Доналд Трамп да се врати на власт во Белата куќа, препорачува Доналд Трамп.

Ако на Швајцарија зимава почнува да и снемува струја и почне да воведува рестрикции, државата, меѓу другото, ќе го забрани користењето на електрични возила за натаму-наваму.

Европратеничката од Ирска Клер Дали гласаше против резолуцијата на Европскиот парламент Русија да се прогласи за држава спонзор на тероризмот, затоа што нејзините не го гледаат сопствениот тероризам.

По изјавата на австралискиот премиер Албанезе, дека отворено побарал од владата на САД да го помилува Жулијан Асанж, уследи отворено писмо на пет големи медиумски имиња. Тие бараат нивниот поранешен соработник да биде ослободен. Меѓу нив е и Гардијан, а долгото паметење на австралиската новинарка Кетлин Џонстон не дозволува тоа да им помине само така.

Директорот на руското странско разузнавање, Сергеј Наришкин, кој јавно беше прекоруван од Путин дека не си ја завршил работата, тврди дека Полска се подготвува за анектирање на украинска територија.