Без разлика колку го доживува како мрачно ваквото предвидување, Мур објаснува дека има план како да го спречи ова. Иако стратегијата е ширење активизам, таа не опфаќа обраќање или разубедување на симпатизерите на Трамп, бидејќи "Хилари и онака освои 3 милиони гласови повеќе од него".
И покрај постојните иницијативи за укинување на електорскиот систем, на Мур му е јасно дека тоа нема да се случи, барем не во скоро време.
Она што според него треба да се направи за да се спречи реизборот (по негови зборови – реназначувањето на Трамп, затоа што победата не се базира на вкупниот број гласови, туку на гласовите од изборниот колеџ) е левицата да ги прибере луѓето кои и' се одметнале на последните избори. Ова се однесува на 8-те милиони гласачи кои во 2012 гласаа за Обама а сега за Трамп, и околу 7,5 милиони гласачи кои на овие избори го дадоа својот глас за Зелените и Либертаријанците.
Друг важен блок според него се младите, "секоја година 3 милиони 18-годишни стануваат потенцијални гласачи, а ние ги има израснато овие деца. Имаме израснато генерација на деца кои не ги мразат луѓето врз основа на раса или затоа што некој е заљубен во човек од ист пол".
Во општата демографија што тој очекува да биде на спротивната страна на Трамп, Мајкл Мур објаснува дека речиси 70% од популацијата во земјата се "или жени, или луѓе што не се белци, или млади на возраст од 18 до 35 години, или комбинација од трите."
