„Зошто Хокинг ја одбил титулата витез од кралицата?" - со доза на чудење прашав на одјавата на филмот. „Затоа што не можел да клекне" - објасни присутниот физичар во собата.

Говорите на ТЕД си имаат фатено некаков терк, кој деконструиран истовремено делува и прелесен за изведување, и некако глупо. Ама лесно е да се потсмеваш со структури, оди создади содржина да те видам...

Мураками-сан но токоро (Местото на Мураками) е сајт покренат од издавачката куќа Шинчоша, на кој авторот одговара на прашања на фановите. Меѓу другото за тоа како треба да се воспитуваат деца и какво е чувството да си роден на ист ден со Геринг.

Научната фантастика често претставува цели планети на кои се зборува само еден јазик. Но наместо да се радуваме на таквата иднина, тука на Земјата сме загрижени дека англискиот јазично ќе асимилира неколку илјади постоечки јазици. Дали овој страв е оправдан?

Хелен Мирен ја игра внуката на Адел Блох-Бауер, музата на Климт, во нов филм со наслов „Жената во злато". Тој е посветен на долгиот судски процес за враќање на одземениот портрет од страна на нацистите, кој траел повеќе од десет години, и кој открива интересни детали за судбината на австриските Евреи.

Je suis Charlie - извикуваа со патос „урбаните" фаци од регионот, протестирајќи против фундаменталистичките идеи од секаков вид. Во исто време, некои од нив среде Нови Сад лепеа плакати за бојкот на концерт, доживувајќи го како естетско-етичка закана. Дали било чие поимање на светот е доволно да делегитимизира нечие право на јавен настап, било кога, било каде?

Дејвид Седарис, за чијашто збирка раскази „Јас зборам добро еден ден" пишувавме тука, освен по урнебесниот хумор е познат и по една негова опсесија - чистењето ѓубре од јавни површини. Сега таа негова пасија го донесе пред британска владина комисија задолжена за животната средина.

Прв пат во неговата долга кариера Ален ќе режира ТВ серија. Иако засега не се знае ниту насловот, ниту темата, со неговото ангажирање Амазон сигнализира дека е подготвен да продолжи со развивањето на своите интернет видео услуги.

Првиот успешен обид да се слика снежен кристал се случил пред повеќе од сто години, а денес за истото се користи многу слична технологија. Кога повторно ќе заглавите на нерасчистен пат или на лизгав коловоз, обидете се да се сетите на микроскопската убавина скриена во секоја снегулка.

Има нешто бизарно во тоа фатен од ишијас, цела недела неизлезен од дома и под седативи, паралелно да следиш снимки од седници на Собраниски комисии, и серија каква што е оваа. Дури и откако ќе се кренеш на нога, сè уште не ти е баш избистрено - што е тука (негативна) утопија, а што реалност.

По нападот на Шарли Ебдо, една книга почна вртоглаво да се искачува на листата бестселери на францускиот Амазон. Насловот е „Покорување", се случува во иднината, а темата е - исламската закана на која е изложена Европа. Планираната промотивна турнеја мораше да се одложи.

Во 1994 членови на редакцијата на Шарли Ебдо доаѓаат во Сплит и прават репортажа за градот и за колегите од Ферал Трибјун. Дежуловиќ сега им ја посветува оваа колумна на своите соборци, сè уште тврдоглаво верувајќи - дека љубовта е посилна од омразата.

Родена како Мабинту Бангура во 1995, Микела Де Принс минала тешко детство, обележано со воено насилство. Во нејзината нова книга, таа објаснува како од сираче од Сиера Леоне станала една од ретките црни балерини во САД, за којашто допрва ќе слушаме.

Дан Банино е италијански фотограф, чиј живот бил променет дента кога го вдомил неговото куче Ротко, земен од прифатилиште за кучиња-скитници.

Меѓу другите работи кои се сведоа изминатата година е и бројот и видот на грешки кои се правеа по медиумите, за што некои од нив имаат чуден обичај да се извинуваат. Не дека и ние сме им имуни (сте чуле за градот Колоњ?), ама тоа не нè спречува да му фаќаме сеир на еден Њујорк Тајмс.

70-годишниот социолог почина на првиот ден од Новата година, оставајќи ја зад себе необјавената студија „Метаморфоза на светот". Исто како што гасеницата нема поим што се случува додека таа минува низ промени во својата чаура, така и ние реагираме на трансформациите на нашето општество, неподготвени за неговите ризици. 

12 мртви, меѓу кои и четворица од карикатуристите-основачи, е моменталниот биланс на нападот на сатиричниот француски весник Шарли Ебдо, кој претседателот на Франција Оланд го нарече „терористички". Франција има долга традиција на сатира, која денес се покажа како погубна за оние кои се занимаваат со неа.

Борис Џонсон, познат по својата креативна употреба на мајчиниот англиски, особено за навреди („големи мрзливи протоплазмични безрбетни амеби"), има експертска дијагноза зошто голем број жители на Британија не зборуваат англиски. Ако е нешто лошо, мора да има врска со Балканот.

Различните режими ги имаат менувано со сила. Невестите го земаат она на мажот со мило. А на владите им се важни за да знаат кој сте, каде сте и колку да ве оданочат. Но дали презимето и понатаму ќе биде толку значајно за идентитетот како што било до сега?

Самообвинувачката флоскула „заради ова интернетов" за многумина стана главен изговор што долго време не зеле книга в рака. Тоа станува уште поиронично имајќи го предвид „бук"-от во името на Фејсбук. Но Закерберг сега ќе ја оправа работата.

Како, макар и со задоцнување, пошироко да се промовира имиџот на професорите како реално трудољубиви, чесни и упатени, а да се нагласи аматеризмот и агресивното незнаење на оние кои сакаат да ги „зауздаат"? Aко не помагаат сложени таблици, формули, учени дискусии и отворени писма, можеби ќе помогне ова.

Писателот Остин Клеон, нам познат по бестселерот „Кради како уметник", манифест за креативноста во дигиталното доба, состави листа на сопствени ветувања во врска со читањето. Ни изгледа како фин вовед во Новата, иако повеќето од спомнатите работи веќе ги правиме. Ама бр. 5 ќе мора да гo вежбаме.

Само ден по Нова година, кога француската држава традиционално ја доделува престижната награда, еден од добитниците им порача на политичарите - не туку кажувајте кој е заслужен а кој не, фатете се за работа.

2014 меѓу другото ја одбележаа два настани: 100 годишнината од раѓањето на велшкиот поет Дилан Томас и епскиот научно-фантастичен филм „Интерстелар". Нивната точка на средба е славната песна на Томас, Do not go gentle into that good night, која во филмот се цитира неколку пати.