Извршниот директор на Фејсбук се самообврза во 2015 да прочита книга секоја втора недела, со акцент на таквите кои опишуваат различни верувања, култури и технологии. За таа цел, нормално на Фејсбук, ја формира групата „Година на книги" (Year of Books) на која ги кани неговите пријатели да му се придружат во проектот. Таа е формирана на 3. јануари, а до денес (5.1) има 129,433 лајка.
Во групата, во стилот на читателскиот клуб на Опра, се поттикнува дискусија за книгата којашто се чита, а првата е „Крајот на моќта" од Моизес Наим, која по објавувањето на повикот е распродадена на Амазон. Авторот, инаку поранешен уредник во Foreign Policy, зборува не само за промената на центрите на моќ од запад кон исток и од север кон југ, од претседателските палати до јавните плоштади, од мажите кон жените, туку и за генералното опаѓање на моќта, тврдејќи дека дури и оние најмоќните денес се поограничени во она што можат да го направат и ризикуваат многу повеќе отколку кога и да е во историјата.
