Компанијата која успешно го организираше "светот на информациите“ се зафаќа со прашање кое постои веќе извесно време но никој не знаеше што да прави со него: техничкото образование. Не е тајна дека факултетите и универзитетите очајно се борат да останат релевантни во технолошките сфери. Баби и дедовци денес тешко разбираат дека еден паметно изработен профил на ЛинкдИн може да биде помоќна алатка од факултетска диплома и како може да се добие работа без неа.
Сепак, истражување од 2016 година покажа дека 56% од програмерите немаат диплома од компјутерски науки или сродни области и дека нивното портфолио на проекти и продукти на кои имаат работено е повредно отколку тие години да ги минале на студирање.
Две години подоцна почнува лавината: десетици глобално звучни фирми, меѓу кои Старбакс, Гугл, Епл, Интел, Хилтон, Костко, Банката на Америка и други, почнуваат да објавуваат огласи за добри позиции за кои веќе не се бара факултетска диплома.
Годинава и Елон Маск ќе порача дека не ти треба факултетска диплома за да работиш во Тесла и ќе додаде дека „студирањето на факултет и онака повеќе е за забава отколку за учење.“
Гугл го препознава предизвикот и е на праг да лансира 6 месечен курс од 300 и нешто долари кој ќе завршува со „сертификат за кариера“ за кој не е потребно претходно ниво на образование. Гугл веќе има лансирано два курса за почетнички позиции: Google IT Support и Google IT Automation со Пајтон. Околу 85% од преку 600.000 курсисти му имаат дадено пет ѕвездички. Врз основа на овој успех, Гугл планира да лансира уште три курса, за анализа на податоци, за продукт менаџери и за UX дизајнери.
Гугл ќе ги признава своите сертифкати во своите вработувања. Се ветува дека овие курсеви ефикасно заменуваат 4 годишно студирање а се работи за програми кои траат меѓу 3 и 6 месеци и за кои се потребни само 5 часа неделно за да се завршат. Како за крај, достапни се: курсот за IT Support чини само 49 долари месечно а компанијата објави дека сама ќе субвенционира околу 100.000 курсисти.
Спиј мирно, УКИМ, спиј мирно.
