Обединетото Кралство, заедно со Канада, Австралија и Португалија, официјално ја признаа Палестина како суверена држава, како увертира во поширокото признавање од Франција и многу други земји на Генералното собрание на Обединетите нации.
Уште кога Париз и Лондон ја соопштија таа намера пред неколку месеци, палестински адвокати од иницијативата „Британија ѝ е должна на Палестина“ ги разгледуваа можните правни потези. Поради чувствителноста на ситуацијата и притисокот од признавањето врз Израел, малку е веројатно дека ова прашање ќе биде отворено веднаш, но идејата е добро да се подготви случајот.
Групата на 7 септември поднесе петиција во која бара Британија да биде обвинета за „сериски прекршувања на меѓународното право“ за време на британската управа врз Палестина помеѓу 1920 и 1948 година. Во документот од 400 страници се бара владата да ја прифати одговорноста за „векот на угнетувањето“ нанесено врз Палестинците. Претставени се седум специфични барања до британската влада, вклучувајќи формално признавање на историските грешки, јавно извинување во Долниот дом и обезбедување „значајни репарации за палестинскиот народ“ преку финансиска компензација и други мерки.
Претседателот на Палестинската самоуправа, Махмуд Абас, долго време се залага за вакви барања, користејќи меѓународни форуми за да изврши притисок врз Британија за одговорност. При неговото обраќање пред Генералното собрание на ОН во 2023 година, Абас вети дека „ќе продолжи со барањето за одговорност и правда“ од Обединетото Кралство и од Америка за нивните улоги во Балфуровата декларација од 1917 година, со која историската Палестина беше признаена како национален дом за Евреите.
Бараме признание, бараме извинување. Бараме репарации, бараме компензација во согласност со меѓународното право, изјави тогаш Абас.
Тој побара репарации и од Израел, прашање што би можело да биде отворено ако конфликтот се реши според принципот на „две држави“.
Иако подносителите на петицијата ги дефинираат репарациите во широка смисла како „реституција, компензација и задоволување, поединечно или во комбинација“, тие избегнаа да наведат точни финансиски бројки. Како „добра почетна основа“, правни експерти за британскиот Дејли Меил ја пресметале сумата на околу 2.000 милијарди фунти, што е приближно еквивалентно на целата национална економија на Велика Британија.
Покрај потенцијалните финансиски последици од признавањето на палестинската државност, владата на Кир Стармер е соочена и со политичките последици. Америка и Израел го осудија потегот како награда за Хамас за масакрот на 7 октомври.
На домашната сцена, секретарката за надворешни работи во сенка, Прити Пател, го обвини Стармер дека „испраќа опасна порака, каде што насилството и екстремизмот се толерираат и наградуваат“, додека лидерот на реформистите Најџел Фараж ја окарактеризира одлуката како „капитулација пред тероризмот и предавство на Израел“.
