За тие што не знаат, Страва е една крајно лагодна и корисна фитнес апликација за мерење колку кардио (трчање, точак, планинарење...) си направил. Меѓу останатото на профилот што го води за тебе ти покажува мапа од секој твој „подвиг“. И сето ова е интересно, добро и корисно исклучиво ако не си војник кој решил да користи Страва додека прави кардио во воена база за која никој не знае дека постои, а не па каде се наоѓа и каков и е ГУП-от.

Во време кога Трамп успева да ја ужаснува целата своја околина однесувајќи се како што се однесува 70 и кусур годишен богаташ кому сите претходни претседатели и влади му дозволувале да прави што ќе посака и да заработува во систем што го наместиле во корист на побогатите, Вил Фарел го воскреснува ликот на Џорџ Буш помладиот, на кого дури и криво му паѓа колку брзо сè му заборавиле.

Човекот кој моментално раководи со САД како услов за службено патување во Лондон од британската премиерка побарал да им се забрани на сите да демонстрираат против него.

Белата куќа од музејот Гугенхајм побарала да позајми една слика од Ван Гог. Овие им рекле дека не може сликата, ама имаат една златна веце шоља ако им врши работа. 

За следните избори во Италија се пријавени 98 партии и движења, и колку и да изгледа голема бројката ова е над 50% помалку од 219-те партии и движења кои беа пријавени на претходните избори. Сепак она по што последниот италијански парламентарен состав влегува во историјата е бројот на селења на пратеници од една во друга партија.

На планетарно ниво Источна Европа ги има топ 10-те држави чија популација најбрзо се намалува, покажуваат бројките на Обединетите нации.

Сè што организирано е против Трамп не може да дочека конечно да се докаже целата афера околу руското мешање во американските избори и победата на Трамп, нешто што исто така може да се толкува како колективен мелем за стравот и паниките од времето во кое се најдоа и сите промени што се случуваат. Исто така веројатно е и дека е претерано со доделувањето супермоќи на Путин и неговата способност за глобален куклар.

Убавиците дефилираат по патеката а публиката со спуштени вилици го проследува нивниот грациозен од, загледана во нивните усни, обравчиња, долги нозе и другите вообичаени атрибути на нивната убавина. За жал, некои од најубавите годинава биле дисквалификувани, не затоа што биле грбави, туку заради употреба на недозволени средства за разубавување.

По фамозното интервју во кое професорски ги деконструираше големите приказни на амбициозната и воинствена новинарка, да фрлиме поглед во багажникот на овој клинички психолог кој полека добива статус на рок ѕвезда, а кој, иако е далеку од десничар, моментално е најголемиот трн во очите на денешната -  политички коректна а ужасно нетолерантна - крајна левица.   

Со оглед на тоа што модерниот начин на живот создаде пандемија на осаменост и армија изолирани луѓе кои немаат со кого муабет да скршат, неодамнешниот потег на британската Премиерка да назначи министер за осаменост се чини кул. Ама, сега политиката ќе треба и пријателчиња да ни наоѓа? Уште што сè нема да префрлиме во рацете на државата дадилка?

За време на годишниот систематски преглед, на лично барање на Трамп направено е испитување на неговите когнитивни способности. Исто на негово барање и резултатите се објавени што е можно побрзо.

Иако станува збор за масовно сериозен пропуст и грешка, не станува збор за лоша намера туку само ужасен дизајн.

По експозето околу Азиз Ансари објавено на феминистичкиот сајт Babe.com, во која неименувана девојка го опишува своето непријатно сексуално искуство во холивудскиот актер, во одбрана на овој вториов излегоа две авторки, едната феминистка од Њујорк тајмс, другата феминистка од Атлантик. И веројатно целата работа не е толку одбрана на Ансари, колку апел за сите девојки во иднина да не го резилат феминистичкото движење и вистинските жртви на сексуалното насилство со слични примери.

УФЦ веќе ги размислува своите следни потези доколку Ирецот не се врати во октагон. Последен пат УФЦ шампионот во лесна категорија се бореше во декември 2016.

Ирскиот актер смета дека се претера со обвинувањата за сексуално малтретирање бидејќи дел од нив почнуваат да наликуваат како да се од лов на вештерки.

Во 130-та година п.н.е. Хан династијата го воспоставува Патот на свилата, кој се простира од Кина до денешна Турција. Во 2013-та кинескиот претседател објави дека Патот на свилата ќе биде возобновен, и тоа како најголемиот и најскапиот инфраструктурен проект во светот.

Не е чудно астронаут во вселената да порасне пар сантима поради недостатокот од гравитација што му овозможува на р'бетот да се издолжи. Но, јапонскиот астронаут кој моментално се наоѓа на Меѓународната вселенска станица ја претерал. И сега се секира дали ќе го собере во седиштето во кое треба да се врати на Земјата. 

Во Велика Британија ветерници главно поседуваат големи енергетски компании. Лани најмногу се офајдиле кога - не работеле.

Во некои други земји, ваква глупа забрана евентуално би се правдала со климатски причини, глобални затоплувања и слични модерности. Во Туркменистан нема потреба од тоа. Таму претседателот, просто, сака бели автомобили.

Зборувајќи на Ен-би-си за својата книга, Мајкл Волф изјавува дека „луѓето на Трамп го сметаат него за дете“ објаснувајќи дека американскиот претседател има постојана потреба од инстантно задоволство, „ниту чита, ниту слуша, тој е како флипер, само мава на сите страни.“

За време на божиќните и новогодишни празници, Германија имаше толку многу енергија добиена од обновливи извори што граѓаните практично добиваа пари за струјата што ја трошат. Цената на струјата да отиде во минус и не е така редок случај во (нормални) земји. 

Битката за рамноправност и родова застапеност знае да произведе чудни нуспојави. Додека машката затворска популација го следи општиот прираст на населението, бројот на жени зад решетки постигнува галопирачки трендови.

Последниот извештај за внатрешната миграција во САД покажува дека источниот брег се напушта и луѓето одат на западниот, каде што е поевтино, потопло и полесно за наоѓање работа. Популарноста најмногу му расте на Ајдахо а од Илиноис е општа бежанија.

Историјата да им ја оставиме на историчарите? Не ќе да е таа безбедна ни со нив. Во архива на познат археолог, после неговата смрт, пронајдени се ракописи кои внесуваат револуција во теориите за Троја, Хомер, Грците и сето тоа. Проблемот е што некои од неговите колеги се сомневаат дека се фалсификат, поставени од него, за да ги зацврсти своите видувања и после смртта.