Како што наближува крајот на годината, така почнуваат да се појавуваат списоци на „нај" книги за 2013. Но најзначајната можеби никој нема да ја спомене. Зошто? Затоа што таа не е книга туку - видео игра.

На денот кога се одбележуваат 90 години од раѓањето на Марија Калас, за несудениот биографски филм за неа режиран од една - актерка.

Утре, 1.12, во Хрватска ќе се одржи референдум за бракот, кој доколку помине успешно ќе овозможи Парламентот да покрене постапка за уставни промени, според кои бракот во него ќе биде дефиниран како заедница на еден маж и една жена. Каква врска имаат со ова писателите? Епа имаат...

На 70-годишнината од создавањето на некогашна Југославија останаа куп (што добри, што лоши) спомени на оние кои живееа во неа, но и исто толку етно-културолошки НЗС-а за нешто што сега еуфемистично го нарекуваме „на овие простори", кога мислиме на оние делови од Балканот кои некогаш не ги делеа граници. Една песна на Хладно пиво пее токму за нив.

Германскиот издавач на речници Langenscheidt организираше гласање за „Најмладешки збор на годината“. Меѓу првите на списокот има и по некој германски.

Од новата серија Masters of Sex до сега сме поминале само неколку епизоди (од вкупно 12-те од првата сезона која ќе заврши во декември), но во тоа веќе гледаме почеток на едно убаво пријателство. Кои биле всушност Вилијам Мастерс и неговата асистентка Вирџинија Џонсон?

Што мислел Крлежа за улогата на ВМРО во македонската историја? Што им замерил на Конески и на Крсте Црвенковски? Зошто најпрвин го одбил Струшкиот венец и воопшто, каков бил неговиот амбивалентен однос кон нашата земја, во која сега има и своја улица?

Има така денови кога ти е мило што си го вклучил компјутерот. Бидејќи си налетал на нешто вакво.

Пред некое време пишувавме за ФБИ досието на Вилијам Волман, американски писател, кој бил следен заради наводни терористички активности. Сега на виделина излегоа уште некои апетити на федералните агенти, од пораната книжевна историја - животот и делата на Сартр и Ками.

Дали и вам ви се чини дека ако во СМС или на чет некој ви стави точка значи дека ви се лути? Еден навидум сосема обичен интерпункциски знак кој означува крај на реченица изгледа дека полека добива сосема нови димензии.

Вчера Шефот ја обелодени насловната песна од новиот албум. И на него, како и на досегашните, сигурно ќе има библиски референци, и некој женски лик кој се вика Мери.

МО_Е_Е Д_ Г_О П_ОЧИ_АТ_ ОВ_? А АКО Е НШПИАНО АВАК? Можеби ќе ви треба повеќе време, но веројатно ќе успеете. Ако замислите како е да го читате секој сајт и секој текст на овој начин, тогаш сте малку поблиску до разбирањето на дислексијата.

Едно попладне во октомври 2005, невронаучникот Џејмс Фалон разгледувал снимки од мозоци на сериски убијци. И открил нешто неверојатно, за што напишал и книга.

Следнава приказна покажува дека сè што можат да направат историските лексикографи е да го регистрираат најстариот доказ за употреба на некој збор, но не и со прст да покажат кој е неговиот автор. Таа исто така покажува дека не треба пијани да се симнувате по скали, барем не без трезна придружба. 

Организацијата Хрватски светски конгрес, која го обединува хрватското иселеништво, наскоро пред судот во Париз ќе почне судски процес против американскиот музичар, но и против списанието кое ја има објавено неговата спорна изјава.

Во последно време објавивме неколку експериментални фотографски проекти, кои ги користат новите технологии за поинакво визуелно „читање“ на добро познати појави. Еве уште еден таков - микроскопски приказ на солзи. Ги има секакви, од радост, од мака, и од кромид. Нашите би биле од зјапање во компјутер.

За филмот на Алфонсо Куарон и неговиот син пишувавме тука. Она што на сите кои го гледаа им остана нејасно е со кого искомуницира главниот лик во една од најсилните сцени. Еве една од можните приказни.

Скоро педесет години по создавањето на Like a Rolling Stone, песната конечно доби свој официјален спот. 

Дорис Лесинг е една од авторките кои би сакале да сме ги познавале, не само преку нејзините книги (особено „Златната тетратка“), туку и лично. Луцидна и тотално кул, таа пред неколку дена почина спокојно во 94-тата година. Меѓу другото ќе остане запаметена по нејзиниот однос кон големите награди и почести кои ѝ ги нудеа.

На 18. мај 1922 Вајолет и Сидни Шиф организирале вечера во хотелот Мажестик во Париз. Гости: Пикасо, Стравински, Џојс и Пруст. Звучи како нечиј хипстерски сон, но вистина е. Џојс се напил, па Пруст морал да го носи до дома со шофер.

За Ким Донг-Кју нема многу информации на интернет. Ако го гуглате најпрвин ќе ви се појави некаков јужно-корејски фудбалер, а дури потоа Тамблер на корејски илустратор и дизајнер со истото име. Негова специјалност - вметнување на современа технологија во најзначајните слики од историјата на уметноста.

Желбата да ви кажеме нешто ново за Вејтс, и така да си го направиме ќефот да го имаме на сајт, од време на време ни се остварува. Еве сега има цел албум со преработки на негови песни на - хебрејски.

Надежда Толоконикова, една од членките на „Пуси рајот", во моментов е во затворска болница во Сибир. Но пред штрајкот со глад кој ѝ го наруши здравјето таа и Жижек неколку месеци се допишувале. На Надежда тој дури ѝ доаѓал и на сон.

Двајца професори од Белгија извеле токсиколошки и бактериолошки испитувања на десетте најпопуларни книги во градската библиотека во Антверп. Резултатите - бљак.