Деловеј, Њујорк
Според романот на Вирџинија Вулф „Госпоѓица Деловеј" од 1925, со камин и коктели преку ден и познати ди-џеи навечер. „Намигнувањето" е врската на Вулф со Вита Саквил-Вест, бидејќи во барот најчесто се собираат лезбејки. Во моментов oној на оригиналната локација во Сохо е затворен, но ќе се отвори повторно на ново место во 2014.
Хобит хаус, Манила
Отворен многу пред „Господар на прстените" да стане филмски хит, овој ресторан е сопственост на поранешен волонтер на Peace Corps и фан на Толкин. Не е нешто луксузно, но послугата е составена исклучиво од „мали луѓе" кои не се лутат ако ги нарекувате хобити.
Кривулестите скалила, Даблин
Комбинација на ресторан, кафуле и книжарница, го добила името според вистински скали кои водат кон спратот, но и според познатата песна на Јејтс. Книжарницата е посетувана заради ретките изданија кои ги содржи, а храната е по многу пристапни цени.
Алиса во магичниот свет, Токио
Секоја просторија во овој ресторан е поврзан со сцена од книгата. Не знаеме дали на мени има и зајаци.
Oнегин, Њујорк
Лоциран во срцето на Гринич Вилиџ, ресторан-трибјут на Пушкин, кој нуди руски специјалитети (блини, кавијар, рибина чорба што се вика „Уха!“) со можност за приватна вечера. Забележите ги брезите во ентериерот.
Chinaski's, Глазгов
Од надвор не изгледа кој знае како, но има голема „пивска градина", и исто толку голем избор на бурбони и цигари. Со вакво мени не е многу тешко да се погоди по кого е именуван - Хенри Кинаски, главниот лик/алтер его на Буковски.
Ќелавата пејачка, Скопје (карши Универзална)
И целиов преглед за ваквите кафани низ светот беше за да ве донесеме на наше тло - кафе бар именуван според драмата на Ежен Јонеско во Скопје. Не знаеме кој е мотивот на кумот, дали неговата склоност кон апсурд или љубов кон театарот, но нека биде поттик за и други кафани во земјава да добијат книжевни имиња. Најубаво според домашни дела - „Пиреј" за вегетаријански ресторан?
