- Младиот ликовен уметник од Кочани, Давид Јосифов, во културниот и едукативен центар Лабораториум ќе го претстави своето дело „Змејот од Плачковица“, триптих од скулптури во акрил на метал Отворањето на изложбата ќе се одржи во четврток на 12 ноември во 20 часот.
- Давид е студент на Факултетот за ликовни уметности во Скопје и последниве неколку години се фокусирал во ѕидното сликарство. Со „Змејот од Плачковица“, тој се впушта во тродимензионален израз. Идејата од самиот почеток на резиденцијата беше да се работи со разновидни рециклирани и индустриски материјали кои упатуваат на еколошки и општествени прашања, со посебен фокус на ликот на змејот како заштитник на природата.
- Делото е развиено во рамки на резиденцијалната програма „Нови Лица“, во соработка со менторот Владимир Благојевиќ, дипломиран етнолог, музејски едукатор, истакнат уметник, илустратор и автор на медиумски програми од областа на уметноста.
- Ова е нова резиденција во рамки на програмата „Нови Лица“ во Лабораториум, во која претходно Јана Наскова имаше изложба на фотографии „Од шкафот“, Канита Кеј Зеќировиќ го промовираше фанзинот „Наши“, Кристина Таневска работеше мурал во Лабораториум, а Дамјан Чемерски, Давид Станковиќ и Лука Петковски го презентираа мултимедијалниот музички проект „Dаvidian“.
- Романот „Крајот на сè“ од британскиот писател М. Џон Харисон е добитник на Букероватата награда за 2026 година. Прогласувањето се случи вечерва, 9 ноември, на свеченост во Лондон.
- Романот е постапокалиптична приказна за Филип Тенент, човек кој собира предмети што морето ги исфрла на брегот на Кент. Еден ден пронаоѓа необично суштество кое постојано ја менува формата. Бидејќи не може да го задржи, тргнува да го однесе во внатрешноста на земјата, а патувањето постепено ги доведува во прашање неговите претстави за светот и за границите на човечкото разбирање. Книгата е опишана како вознемирувачка, суптилно сатирична постапокалиптична авантура.
- Во финалето, покрај Харисон, беа и „The Disappearers“ од Марлон Џејмс, „Black Bag“ од Лук Кенард, „May We Feed the King“ од Ребека Пери, „The Things We Never Say“ од Елизабет Страут и „John of John“ од Даглас Стјуарт.
- На доделувањето, кое беше пренесувано во живо и личеше на Оскарите, водителката направи лапсус и му ја честиташе Нобеловата на Харисон.
- Новото издание на Скопскиот филмски фестивал (СФФ), што ќе се одржи од 4 до 9 ноември, се враќа по тригодишна пауза со богата програма и македонската премиера на филмот „17“ на Косара Митиќ.
- Во главната конкурентска програма под насловот „Дијалози“ се осум филмови - „Тинејџерски секс и смрт во кампот Мијазма“, „Спирала“, „Изабел“, „Нема рај ако ти убие жена“, „Отфрлен“, „Чувство на дом“, „Мизерна мајка“ и „Тивки ноќи“. Во рамите на програмата ќе бидат прикажани и филмовите „Фјорд“ и „17“ и „Електричен бакнеж“, кои се надвор од конкуренцијата. Во програма насловена „А1 Кинотека“ со почеток од 13 часот ќе бидат прикажани филмови од богатата српска кинематографија.
- Затворањето на фестивалот и поголем дел од проекциите ќе се одвиваат во киното „Фросина“ при Младинскиот културен центар. Целосната програма тука, карти достапни на МКТикетс.
