Се работи за тикагрелорот на АстраЗенека против згрутчување на крвта, одобрен во 2011 година, откако испитувања покажаа дека може да спречи еден од пет смртни случаи после срцев удар. Апчето кое се продава како Брилинта а се зема двапати дневно, им се препишува на луѓе со акутен коронарен синдром - што вклучува преживеани од срцев удар и оние со тешка ангина.
Оттогаш, студии фрлија сомнеж дали лекот на АстраЗенека е исто толку ефикасен како неговите конкуренти а некои сугерираа дека може и да ги зголеми ризиците.
Сега, експертите велат дека откриле „докази за сериозно погрешно презентирање резултати“ во две клинички испитувања кои биле клучни за одобрувањето на лекот во Велика Британија и САД.
Меѓу другото, околу една четвртина од отчитувањата од машините што се користат во испитувањата не биле вклучени во збирките податоци што американскиот регулатор за лекови, Администрацијата за храна и лекови ги користел за одобрување на лекот. Накратко, лекот е одобрен врз основа на неточни и нецелосни лабораториски мерења.
Д-р Виктор Серебруани, експерт за кардиоваскуларна фармакологија на Универзитетот „Џонс Хопкинс“ во Мериленд, кој е критичен кон лекот повеќе од една деценија, вели:
„Со години беше очигледно дека нешто не е во ред со податоците“.
