Новата верзија на ЧетГПТ со извонреден успех го положи Туринг тестот за мерење на степенот на вештачката интелигенција. Но со стратегиски направена (легална) измама.
Вообичаената верзија 4.5 се покажала просечно, но кога била програмирана да користи сленг, да одвлекува одговори, да прави печатни грешки, се покажала почовечки од вистинските луѓе.
Во паралелни текстуални преписки во реално време, од луѓе во улога на судии било побарано да идентификуваат кој од нивниот соговорник е човек. Во осум круга дискусии учествувале 300 луѓе (случајно распоредени како соговорници или судии) и четири типа на модели со вештачка интелигенција. Во дури 73% од разговорите со специјална верзијата на ЧетГПТ, повеќето судии се определиле дека комуницираат со човек.
Тоа не било случаи со другите три модели. Само во 36% од случаите ЧетГПТ бил препознаен како човек кога не бил активирана специјалната функција „персона“.
Оваа верзија била хуманизирана да поттикне емоционални дразби, да заобиколува директни одговори, да прави печатни грешки, да користи сленг и да изразува емоции. Била дефинирана како „социјално незгодна млада личност“.
Резултатот е импозантен зашто судиите, во обид да го откријат човекот ретко поставувале фактички или логични прашања, туку се потпирале на емотивниот тон и течноста на одговорите. Објаснувајќи го својот избор, тие одговориле дека се определиле за „соговорникот што зборувал поприродно“ или „го чувствувале како пореален“.
Со други зборови, ова не беше класичен Туринг тест, туку дуел на социјална хемија. Не се мереше интелигенцијата, туку емоционална флуентност. И вештачката интелигенција ги закова, заклучуваат авторите.
Предавачот Џон Носта забележува дека суштината на интелигенцијата полека се префрла од пресметување кон разговор, од резонирање кон резонантност.
На прашањето дали успехот на ЧатГПТ е опасен, тој вели дека можеби нема да знаеме дека сме заменливи, бидејќи нема да ни биде ни важно.
Почнуваме да претпочитаме рефлексии наместо врски. И ако не бидеме внимателни, може да ја дадеме нашата доверба не на интелигенцијата, туку на илузијата на хуманоста, вели Носта.
