26-годишниот мисионер решава да го посети племето на островот Северен Сентинел во намера таму да ја шири својата вера и покрај забраната од индиската полиција да се приближи до островот, бидејќи изложеноста на надворешни патогени би можела да го убие изолираните домородци, и предупредувањето од истата полиција дека изолираните домородци најверојатно ќе го убијат.

На Тито му извадија таков муабет откако умре, ама претседателот на Нигерија си ја има маката дур е жив и сè уште на функција.

Стотици илјади Евреи од Холандија завршуваат во германските концентрациони логори со помош на возовите на холандската железница, која за оваа услуга на Нацистите им наплаќа милиони во Втората светска војна.

Германската полиција изведе блицкриг операција во франкфуртското седиште на најголемата банка на државата. Се истражуваат сомнежи за перење пари а во акцијата учествувале 170 полицајци.

Вработени во некои од германските конзулати на Блискиот Исток, директно соработуваат со шверцери на луѓе на кои им продаваат фалсификувани визи за мигранти кои сакаат да влезат во Германија како бегалци, открива германски Шпигел.

Делумно изнесување на одбраната, делумно таблоиди, делумно статистика ама муабетот во судењето на Ел Чапо се тера во правец дека „кусиот“ не бил главен во Синалоа картелот, туку само најгаламџија.

Откако автомбилскиот диносаурус најави затворање фабрики и отпуштање работници, Трамп најави укинувања на сите поволности кои ги ужива комpанијата, вклучително и субвенциите за електричните автомобили.

Што се однесува на годинешната Национална климатска проценка изработена од американската администрација, ставот на првиот човек на таа администрација е „не му верувам“ на извештајот.

Во својата намераченост за справување со мафијата, италијанските власти запленија сериозни имоти низ целата земја, од Сицилија до северот. А на толку запленет имот, проценката веројатно е дека е греота нешто да не се сруши.

Словачка стана 8-та земја од ЕУ која најави дека нема да го потпишува тн Глобален компакт за миграција, една рогобатен документ изработен под капата на ОН чии противници сметаат дека е опасен вовед во цензура: говор против миграцијата може да се квалификува како кривично дело а медиуми да бидат затворани на таа основа. Еден естонски актер навежбан на Шекспир го читаше целиот документ и тоа траеше повеќе од два часа.

Организацијата која е во мртва трка сама со себе во бламирање и апсурдност, бара промена на името на британско село старо десетина векови за подобро да им легне на агендата што ја тераат.

За сметководствените разлики кои ги покажа првата сеопфатна финансиска ревизија на американското министерство за одбрана ќе бидат потребни години за да се разрешат.

Малата американска сојузна држава Мејн за првпат оддржа таканаречено рангирано гласање. Модел кој им дава шанса на независни кандидати да го разбијат двопартискиот систем и клетвата дека се бира меѓу змија и магаре. Систем за кој и Македонија би можела да размисли.

Овој цитат на еден советник на американскиот претседател го пренесоа речиси сите американски медиуми, кршејќи ги сопствените правила за забрана на пцости. Велат дека за само десет дена, од победник, Трамп се има претворено во губитник и дека ако досега сме го виделе збеснат, допрва претстои вистинското шоу.

Се очекуваше рускиот кандидат да го земе претседателствувањето со Интерпол и да го замени кинескиот шеф на ова тело кој лани едно време исчезна. Но, американската коалиција издејствува друг претседател. Косово одбиено по четврти пат.

Како што се движеше караванот од Латинска Америка кон САД така еволуираа и заговорите што Трамп ги ширеше околу него. Зовриената само-создадена паника на крај кулминираше со распоредување на 6.000 американски војници (повеќе отколку што моментално имаат во Ирак) на границата со Мексико.

Загадувањето од дизел возилата го спречува развојот на белите дробови кај децата со што тие доживотно се осакатуваат, покажува истражување во кое учествуваат 2000 ученици од Лондон. И ова е паника во Лондон, чиј проблем со квалитетот на воздухот не е ни приближен до тукашната жабокречина што се дише.

Норвешка си потопи еден свој воен брод под команда на НАТО. Бродот се судрил со нафтен танкер при што тој завршил на дното а танкерот ќе мора некогаш да се фарба бидејќи бил изгребан. На Норвежани не им е јасно како брод наменет за опаки воени ситуации не успеал да избегне едно од најбавните пловила на светот.

Останувајќи на својот (здрав) став содржински да не коментираат твитови на Трамп француската влада по повод последната тирада на американскиот претседател, само порача дека Трамп нема „основна пристојност“.

Може не врши никаква работа во моментот, но за сета онаа американска воена армада испратена на гранциата со Мексико ова ќе дојде како добра вежба во случај Мексико некогаш да реши да нападне, барем така изгелда стратегијата во главата на американскиот министер за одбрана Џејмс Матис.

Додека во нашиот галоп кон НАТО не остана дно што не го допревме (се молат надлежните ова да не го сфатат како предизвик), прво Макрон, па сега и Меркел откриваат сепаратистичка наклоност и се амбициираат околу формирање на сопствена европска армија.

Не само што САД им продаваат оружје на Саудијците за да го дотолчат и онака утепаното население на Јемен, туку и директно учествуваат во воздушните напади на земјата снабдувајќи ја саудиската авијација со гориво во лет за овие да не се прекинуваат сред бомбардирање.

Не можејќи да сфати како Британија воопшто заврши на патот на отцепување од Унијата, премиерот на Шпанија, Педро Санчез, повика на второ гласање за брегзит, објаснувајќи дека не му е јасно што чека Тереза Меј за да свика втор референдум.

Кинескиот економски развој и нивните сè помасовни инвестиции во други држави полека го стишуваат некогаш гласниот глобален критицизам за состојбата на човековите права во таа земја.