Најголемата дождовна шума на планетата испушта милијарди тони јаглерод-диоксид годишно, и наместо досегашното забавување на глобалното затоплување таа почна да го забрзува истото.

66-годишниот претседател на Бразил е примен во болница да биде под надзор на докторите, откако повеќе од 10 дена не може да се запре со икање.

Звучи како заклучок за Англија од пред 60-70 години, меѓутоа е од пред некој ден и е дел од извештајот за расната нееднаквост на островот испратен до Обединетите нации, во кој се алармира дека начинот на кој Владата се справува со расизмот може да доведе до прекршување на меѓународните човекови права.

Италијанската влада ја прогласи лагуната околу Венеција за национален споменик, со што во пракса во водите на Венеција им се забранува пристап на гигантските крстосувачки патнички бродови.

Владата на Австралија сака да ја крене свесноста околу вакцинирањето со реклама со млада девојка врзана на машина за кислород која се бори да земе здив, и тоа е баш како не треба.

Човечки е од пратениците да се очекува исто ниво на пристојност во пратеничките клупи како што се очекува од првоодделенец во ученичка клупа, на пример, да не зјапаат/скролаат во телефон додека во тек е парламентарна седница.

Земјата со месеци е во хаос што заради протести, што заради немање основна власт, а сето тоа значително помогнато од земјотресот во 2010 кој речиси го срамни со земја Хаити. Вчера по 2-часовна битка пред претседателската резиденција беше убиен и претседателот на земјата.

Што беше поентата на целото уништување, убивање и мизерија која ни ја донесоа? Тоа ги праша новинарите на Ројтерс еден механичар од авганистанскиот град Баграм. „Поарно ќе беше ич да не дојдоа.“ 

Американците останаа во Авганистан катаљарда години со алиби дека ја подготвуваат домашната војска и другите институции сами да ја контролираат ситуацијата во земјата. Војската сега покажува дека е спремна за она што никогаш го нема вежбано со Американците; да бега по комшии.

Самата напнатост меѓу САД и Кина прави да е невозможно истрага спроведена од СЗО да дојде до кредибилни одговори.

Може за сега не сакаат да ја наречат робовладетел, ама за тоа персоналот во кабинетот на американската потпретседателка јавно кажува дека атмосферата постојано е напната и дека „тоа не е место на кое луѓе чувствуваат дека имаат поддршка туку дека се третирани како го*на“.

Добрата вест е што постои начин како да си легнеш како обичен човек а да се разбудиш како милијардер, лошата вест е што тоа може да се случи само и само ако банката згреши.

Калифорнија додаде уште пет американски сојузни држави во кои на своите службеници им забранува да патуваат затоа што имале лоши ЛГБТ закони. Ама затоа , службено да се патува и понатаму може во Саудиска Арабија.

Пофаќајќи по најстариот одбранбен механизам на Македонецот „има и бетер“ треба да знаете дека во град во Пакистан летно време знае да биде измерена горештина од 52 степени Целзиусови.

Кога после пауза од месец дена се појави ослабен во јавност, коментарите беа дека новата килажа на Ким Џонг Ун е заради здравствени проблеми. Откако малку подлабоко анализираа, сега експертите се на став дека владетелот на Северот ослабел заради поголема допадливост и корист за пропагандата.

Не биле обучувани конкретно за да го елиминираат и распарчат 60-годишниот новинар, и не биле обучувани директно од американските безбедносни сили, меѓутоа имале обука во САД од поранешни американски војници и тоа со дозвола од американскиот Стејт департман.

Живописниот лик Роберто Дутерте, од функцијата претседател на Филипини, се закани дека ќе ги апси оние кои не сакаат да се вакцинираат. А кога се веќе уапсени, лесно ќе биде да се имунизираат.

На севернокорејските хакери им останаа уште 81 милион долари да бидат префрлени од Националната банка на Бангладеш пред комплетирање на трансферот од речиси милијарда долари кога од чиста случајност операцијата била прекината заради расипан принтер.

Мнозинството гласачи на Швајцарија, на референдум гласаа против воведувањето на мерките со кои владата планираше да ги постигне целите од Парискиот климатски договор. Мерките ќе вклучуваа нови такси на бензинот и авионските карти, ќе предизвикаа поскапување на превозот и на другите поврзани производи и услуги.

Доналд Трамп има дадено најмалку 22 интервјуа за 17 различни книги од моментот кога излезе од Белата куќа, и уште има автори што чекаат на ред за разговор.

Бразил надмина 500.000 жртви од ковид, првенствено заради задоцнетото набавување вакцини. Против човекот кој се смета за највиновен се протестира во преку 40 градови во државата.

Околу 30 германски војници се отповикани од воените вежби во Литванија заради обвинување за расистичко и антисемитско однесување, надополнето со сексуално насилство.

Проблемот со сајбер-напади САД за сега го решија со предавање на Путин на список на 16 круцијални инфраструктурни „ентитети“ кои не смеат никако да бидат допрени од сајбер-напад, под закана дека САД ќе возврати на свој начин.

Австралијанка добила исплата од Ербиенби во износ од 7 милиони долари откако под закана со нож била силувана во стан во Њујорк во 2015 изнајмен преку платформата.