Како „нов здравствен геноцид“ се оценуваат последните официјални предлози за реформирање на здравствената политика во Бугарија. Еден од нив е своевиден здравствен таксиметар: државата да покрива - и тоа не во целост -  здравствени трошоци до максимум 700 лева (357 евра). Сè што е над таа цифра фондот не го занима.

После 10 годишно членство во Северноатлантската алијанса, Албанија успева да привлече само една десетина од директните странски инвестиции кои доааѓат во регионот. Помалку и од Босна и Херцеговина а неспоредливо со Србија која голта дури 55% од сите пари кои доаѓаат на западен Балкан. Проблемот со високата стапка на луѓе кои ја напуштаат Албанија, башка.

По неодамнешното фатално страдање на двајца градежни работници и повторното актуелизирање на српските стандарди за заштита при работа, Александар Вучиќ проба да ја спушти тензијата со податок дека во САД на секои 10 секунди гине по еден перач на прозроци. Од надлежно место брзо му беа пребришани наочарите преку кои гледа податоци.

Бугарскиот вице-премиер смета дека не е фер младите масовно да одат на Запад по работа а да ги оставаат своите родители на грбот на Бугарија и на оние кои останале да живеат и работат во неа.

Влегувањето во НАТО и ЕУ ќе значи создавање услови младите и образувани луѓе да останат во земјава, гласи една од мантрите на актуелната политичката религија која од нас бара курбан да го приложиме името и најбазичното достоинство а потоа птиците ќе пеат повесело а тревата ќе биде позелена. Ај важи.  

Пишувајќи дека Владата започна со официјалниот дел од убедувањето на сопствениот народ да го смени името на сопствената држава, Грикрепортер не е ни најмалку воодушевен како сето тоа уште почеток изгледа издишано.

Грчки автор пишува дека додека Сиријци учествуваа во барање исчезнати во страшните пожари, Курди и Палестинци даваа крв а македонската (да, македонската) влада понуди и парична помош, Карл Билт ладнокрвно твиташе „еве ПАК ги спасуваме Грците “.

Хелсиншки и Хјуман рајтс пишуваат детален извештај за скандалозната состојба со човековите права во Грција. Сосе одења во затвор затоа што некој се чувствувал за Македонец. Но, 1993-та година е тоа, си мислиме дека дури и младата македонска држава да се покаже неука во одбрана на тие луѓе, самата Европа нема да дозволи тоа така да помине. Европа е тоа, човекови права, вредности, цивилизација! Во 2018 е јасно како тоа помина: потпишавме дека нема што таму некој да се чувствува како Македонец. Освен ако е Грк.

Над 4.000 грчки компании што го користат зборот македонски, македонско, македонска и сл. во името на своите производи ќе мора истото да го регистрираат во европските и меѓународните агенции и тоа што е можно побрзо пред изгласувањето на договорот од Преспа.

Пред 28 години во Хрватска на Велебит се снима документарец за волци, а на кратко дел од приказната е и еден 5-годишен пастир кој го собира своето стадо и го носи дома. Детево, речиси 3 децении подоцна ќе игра за Хрватска во финалето на Светското првенство во фудбал.

Не затоа што мислиме дека нема што да бара Македонија во Европа, туку заради оние наивни души (платените не ги рачунаме) кои искрено сè убедуваат дека сè им ќе биде подобро само што ќе нè примеле во ЕУ. Оние кои наместо денес да си ја поправат чешмата, денес да си го средат балконот, денес да возат попристојно и денес да висат помалку на Фејсбук, си прават бајрам на паметот дека пред „историска шанса“ утре да им се поправи чешмата, утре да им се среди балконот....

Повикот за што поскоро раскрстување „со премиерот и партијата што го издадоа својот народ и своите принципи“ објавен во Гардијан доаѓа од Зои Константопулу поранешна претседателка на грчкиот парламент која на позицијата доаѓа токму како пратеник на Сириза.

„Биди прв дипломиран диџеј на светот“ е понудата што деновиве ја објави српскиот приватен Универзитет Мегатренд. Дипломата по „диџејство“ ја доделува нивниот Факултет за култура и медиуми.

Во крајните северни делови на грчките региони на западна и централна Македонија, сите ора се инструментални. Стиховите се заменети со гласни, лимени и дувачки инструменти, како труба, тромбон и кларинет. Ова не е некој особен аспект на локалното музичко наследство. Традиционалните мелодии во овие региони имаат свои стихови, но тие се на јазик кој грчката држава се обидува да го избрише речиси цел еден век: македонскиот словенски јазик.

Грција ќе се соочи со четврти финансиски колапс доколку пред средбата во Брисел во четврток не потпише договор со ЕУ за простување на дел долгот што го влече веќе десетина години, пишува Гардијан.

Градоначалникот на Солун кој пред неколку дена беше физички нападнат од банда националистички хулигани, на таквите кругови им боде очи по разни основи: Кемал Ататурк, Македонија, ЛГБТ, па дури и за кремирањето покојници. Зошто тогаш Солун на двапати го гласа? Главно, затоа што не краде.

Додека светската дипломатија и јавност се зафатени со проблемите околу Иран и Северна Кореја, овие два проблематични соседа ползат кон опасна зона во која и најмалото погрешно толкување, проценка или потег би можеле да доведат до вооружен судир, оценува американскиот магазин Крисчн Сајенс Монитор. 

Александар Вучиќ е радо виден гостин во Берлин. Се разбира, во Германија не го гледаме како додека мафта со рацете им се дере на министри и новинари, туку како говори смирено, со споени прсти, прекумерно заблагодарувајќи ѝ се на Ангела Меркел за сè и сешто. Целиот нивен однос, меѓутоа, може да се сведе на едно: Косово.

Откако се закани со тужба против Стејт департментот, американска организација која се бави со транспарентност и отчетност на трошењето државни пари, ги доби документите за тоа каде отишле 9 милиони долари од даночните обврзници на САД.

Во исто време додека во Брисел добиваше признание од Европската организација за ретки болести, Новартис, една од најголемите светски фармацевтски компании, на другата страна од континентот го собра вниманието благодарејќи на длабоките врски што успева да ги создаде со грчката политичка елита, посебно со таа што моментално не е на власт.

Деновиве хашкиот трибунал ги објави резултатите на истрагата за тоа како хрватскиот генерал Праљак воопшто стигнал до отровот со кој што се самоуби и како успеал да го прошверцува во судница. Одговорот е: за органите на Обединетите Нации е невозможно да откријат како човек сместен во нивен затвор успеа да дојде до отров, и како истиот тој човек успеа да го прошверцува отровот за да се самоубие сред нивна судница. Во меѓувреме Дневник.хр ги добива двете писма кои генералот ги напишал на два дена пред самоубиството.

Бугарија како најсиромашна држава во ЕУ (барем до 2025) со БДП кој речиси е половина од просекот на Унијата, е решена до средината на годинава да поднесе официјално барање за влез во Европскиот механизам за девизен курс, првиот чекор до целосно членство во еврото. На потег е Европа.

Автор на плеј-листи на Спотифај наплати околу 1 милион долари од музичкиот сервис, за луѓе што преслушувале песни од неговите плејлисти. Авторот е Бугарин и веројатно тој е единствен човек меѓу тие што слушале музика.