Советскиот сојуз уште во Лениново време стана првата модерна држава во која абортусот беше легализиран. Актуелната Америка сега е на сосема другиот крај од приказната, притоа, со некои нови дилеми: ако двојка реши да не искористи оплодена јајце клетка која се чува во фрижидер, дали е тоа убиство?

Чоколадите Тоблероне и натаму се произведуваат екслузивно во Швајцарија, меѓутоа газдите планираат да го шират бизнисот и надвор од земјата. Според швајцарските закони, таа промена си има своја цена.

Демографските трендови е еднa од омилените теми за мозгање на првиот човек на Тесла. Тој ja предупреди Америка дека може да завршат како Јапонија, а Јапонија пак, може да исчезне. Бројките навистина се страшни: само за една година Јапонија има изгубено 600.000 луѓе.

Долгогодишен сенатор од Нигерија, организирал доаѓање на 15 годишно момче од неговата земја во Велика Британија. Единствената причина за организирање транспорт на момчето било  - да му се земат органите, се разбира, без негово знаење. Купувачите се непознати. 

Не само што војната во Украина (и покрај сите себе-честитања) не ја обедини Унијата на некој до сега невиден или трансформативен начин, туку таа има спротивно влијание на продлабочување на поделбите, менување на сојузништва и балансот на моќ. Токму тоа што Франција и Германија не го сакаат.

Американскиот пулен за Венецуела кого Вашингтон не успеа да го инсталира за прв човек во таа држава (американската политика некогаш е заев ама некогаш е заеб) доживува лоши денови во својата политичка кариера. Човекот кој мислеше дека не може да не успее затоа што зад себе ја има поддршката од Запад, денеска го ќофтаат кај што ќе стигнат.

Ако штит е нешто што треба да го одврати и заплаши непријателот, и нешто зад кое што можеш да се скриеш во случај на напад, и да ја симболизира твојата решителност, тогаш што правиме ако тој штит е скршен или има фундаментални мани.

Ситуацијата со која треба да се бори украинскиот генералштаб е: борбени сили кои се премногу развлечени на фронтот, и неможност за стопирање на борбите бидејќи секое паузирање ќе биде од корист на Русија.

Во приказна која личи на овдешните политички реваншизми, Џо Бајден ја поништил нарачката на неговиот претходник околу боите на новите претседателски авиони. За да не испадне поништувањето многу сељачко, тука се медиумите да објаснат дека боите на Трамп носат безбедносни закани.

Канада вели дека фотографиите и предупредувањата на кутиите веќе ја изгубиле својата шокантност и влијание па им треба поддршка, особено заради младите, иако таму само 4% млади пушат. Предлогот е на секоја цигара да има отпечатено „Отров во секое димче“.

Детално проучувајќи биографии на 180 лица кои извршиле масовни пукања и убиства уште од 1966 година, истражувачи дошле до фрапантни сличности меѓу тие луѓе, сознание за кое сметаат дека може да помогне да се заузда овој автохтон американски проблем. Само кога политичарите би слушале.

Службените авиони на корпорациите нема да бидат предмет на оданочување според предложените  мерки за зелена такса на авионското гориво. Предлагач е владата на ЕУ, Европската комисија. Што би се рекло на народен јазик: врана на врана очи не копа.

Кога мислиме на загадување од автомобили, обично мислиме на она што излегува од нивните ауспуси. Гледаме на погрешно место, особено во последно време. Ауспусите на новите коли се толку чисти, што, да се почнува сега, тоа не би се ни регулирало. Ама затоа гумите прават партал. Пар-тал!

За да се избегне дополнително крвопролевање, Кремљ мора да остане без сите парчиња од старата империја кои се уште ги поседува.

Франција своевремено храбро најави 1.000 километри пат составен од соларни панели кој требаше да обезбедува струја за дури 5 милиони домаќинства. Шест години подоцна, признаваат дека ептен го имаат утнато. Меѓу другото, не земале предвид дека таму се возат и трактори.

Не копајте по Земјата, копајте по ѓубриштата. Ова е сосема сериозен совет од научници на кои им е јасна состојбата и залихите на драгоцени метали кои се неопходни за производство на електронски уреди и апарати. Планетава нема доволно ама затоа купишта имаме по депониите.

Пред почетокот на војната Путин прави неколку големи грешки: ја преценува руската воена моќ, ја потценува украинската волја и погрешно смета дека Западот нема да се обедини против него. Исто така Путин погодува една работа: дека „Остатокот“ од светот нема да ја осуди Русија или да воведе санкции.

Во 443-те легислативни страници за имплементација на годинешниов канадски буџет, новинарите открија амандман со кој на канадските астронаути им се забранува да убиваат или крадат додека се на вселенска мисија. Што значи дека до сега можеле.

Британската конзервативна партија го суспендираше Нил Периш а тој поднесе оставка како член на британскиот парламент откако се дозна дека гледал порно на парламентарна сесија. Периш прво се вадеше дека гледал трактори и случајно забегал на погрешна страна. А после му се уарнило.

Она помодарско декларирање на личните заменки се претвора во религиозна хистерија. Капак: и Џо Бајден и Камала Харис решија да ги декларираат нивните заменки. Тој бил „тој“ а таа била “таа“. Небаре некој на светов, замелушениот старец и неговата каранконџула досега ги сметаше за родово флуидни.

Јордан е на пат да го криминализира самоубиството и секој обид да се одземе сопствениот живот на јавно место. Казните се парични ем затворски. Ако е масовно, казните се дупли.

Една од првите институции кои реагираа на веста дека Твитер за 44 милијарди го купи Илон Маск беше Европската Унија. Не да честита или да изрази надеж за соработка туку да го потсети дека неговите визии за слободен говор не проаѓаат туку така во регулираниот простор на Унијата. 

Германците ќе мора да променат некои навики за да ја остварат најновата стратешка цел - енергетска независност од Русија. Ама, поретко туширање, нели е тоа нехигиенски? Напротив, вели Билд, секојдневното користење сапун и онака ѝ штети на вашата кожа.

Најмалку 17 различни банди во Лос Анџелес имаат нов начин да си го вадат лебот. Наместо досадни планирања и подготовки, со автомобили кружат околу местата на кои се собираат луѓе со пари и на лице место ги пљачкаат додека си рекол „гламур“.