„Далиленд“ ја имаше својата светска премиера на Филмскиот фестивал во Торонто минатата година, но неговата поширока дистрибуција допрва почнува, со прво прикажување во САД на 9 јуни.
Тоа е биографски филм за славниот каталонски надреалист, Салвадор Дали, кого го играат двајца актери - Езра Милер во младоста и Бен Кингсли во поодмината возраст. Кингсли има изјавено дека при развојот на својата интерпретација на Дали се потпирал на говорот на сликарот, неговото однесување, „неговиот вкус за љубов, живот, храна, вино и сè“, но исто така и на неговата одважност да скрши толку многу правила. Тој исто така имал пофални зборови за режисерката Мери Херон, која е позната по нејзината адаптација на „Американски психо“ на Брет Истон Елис.
Приказната е раскажана низ очите на млад галериски помошник, Џејмс (го игра Кристофер Рини), кој во 1973 започнува авантура помагајќи му на веќе возрасниот гениј Салвадор Дали да се подготви за голема изложба во Њујорк. Притоа, една од клучните наративни точки е фасцинантниот брак помеѓу Дали и неговата сопруга Гала, која ја игра прекрасната Барбара Сукова, во период кога она што изгледа како неуништлива врска почнува да се распаѓа.
