Бордот за мониторирање на податоци и безбедност, кој е задолжен да ја осигура безбедноста и прецизноста на испитувањето на Астразенека, изразил загриженост пред Националниот институт за алергија и заразни болести дека информациите објавени околу резултатите од тестирањето на вакцината содржат застарени податоци.
„Ја поттикнуваме компанијата да работи со Бордот за мониторирање за да ги ревидираат податоците за ефикасноста и да се осигура дека најпрецизните, и најнови податоци околу ефикасноста ќе бидат што е можно побрзо јавно објавени,“ порачува групата со која раководи главниот американски инфектолог, Ентони Фаучи.
Бордот својата загриженост ја пренел и кај производителот и кај Агенцијата за биомедицински напредни истражувања и развој, кој делумно го финансираше развивањето на вакцината.
Астразенека во понеделникот објави дека го минала тестирањето во САД со 79% ефикасност во спречување на ковид-19. Ова требаше да биде последен чекор пред да биде побарано одобрение од ФДА за користење на вакцината во САД. Новата информација најверојатно ќе го одложи пуштањето во оптек во САД.
