- Израелски суд привремено го блокираше планот на министерот за национална безбедност, Итамар Бен-Гвир, да постави ровови со крокодили околу затвори со Палестинци поради загриженост за нехуман однос кон - рептилите.
- Правната постапка против планот на Бен-Гвир ја покрена организацијата „Нека живеат животните“, која тврди дека тоа би претставувало нехумано малтретирање на крокодилите и би го загрозил затворскиот персонал. „Наводите во врска со очекуваната штета за крокодилите заслужуваат истрага“, објави судијата Аврам Рубин. Ниту во претставката, ниту во одлуката на судијата не се спомнува заканата за палестинските затвореници.
- Бен-Гвир тврди дека рововите со крокодили ќе ја зајакнат безбедноста во затворите, ќе ги одвратат затворениците од обиди за бегство и ќе го намалат потребниот бројот на чувари. „Проклет терористу, дали размислуваш да избегаш? Размисли двапати“, порача министетот на социјалните мрежи на генерирана слика на која се гледа како држи крокодил на узда.
- Израелската влада во јули одобри прекласификација на нилските крокодили од „заштитени диви животни“ во „животни одгледувани во заробеништво“. Тоа им овозможи на затворските власти да чуваат крокодили под строг надзор согласно упатствата од Управата за природа и паркови. Планот требаше да се спроведе во затворот „Кециот“ во пустината Негев, каде што веќе почна копање ровови околу дел од објектот.
- Палестинска комисија тврди дека Израел моментално држи во затвор околу 9.600 Палестинци, вклучувајќи жени и деца. Илјадници од нив се во „административен притвор“. Комисијата документирала смрт на 89 палестински затвореници во израелски притвор од почетокот на геноцидот во Газа во 2023 година. Уште десетици се водат како „присилно исчезнати“.
- „Улцињ е албански град, заробен од корумпирани политичари“ и ќе биде „ослободен“ на локалните избори во 2027 година, објави на својот профил на Инстаграм потпретседателот на Владата на Црна Гора и министер за економски развој Ник Ѓелошај.
- Соочен со лавина осуди, вицепремиерот одговори дека не изразил територијални претензии кон земјата во која извршува висока функција, туку ја опишувал „историската и демографската посебност на градот“.
- Скандалозната порака е поттикната од вжештената дебата во црногорскиот парламент меѓу претставниците на две албански политички групи: Албанскиот форум – на кој му припаѓа Ѓељошај – и Албанската алијанса, во врска со предлог-законот со кој се воведува статусот „град“ како посебна единица на локалната самоуправа.
- Албанската алијанса тврди дека со новиот закон Улцињ би го изгубил статусот на град. Пратеникот Артан Чоби од Албанскиот форум во расправата изјави дека Улцињ е „древен илирски град со кој се гордеат Албанците ширум светот“ и дека бил „албански град“ кога станал дел од Црна Гора во 1878 година.
- „Многу политичари во Црна Гора јавно се залагаат за граѓанска држава, но зад таа реторика честопати се кријат национални интереси“, забележа политичкиот аналитичар Стефан Ѓукиќ.
- Копнените сили на САД во петмесечната војна против Иран ги потрошиле „практично сите“ залихи на ракети од типот ATACMS (армиски тактички ракетни системи) и PrSM (ракети за прецизни удари), изјавиле за Ројтерс тројца упатени извори од Вашингтон. Тие не наведуваат колку точно ракети земја-земја ѝ останале на располагање на Армијата на САД.
- Ракетите ATACMS испорачани од САД ѝ помогнаа на Украина да напаѓа цели длабоко на руска територија. Ракетите PrSM се од понапредна генерација, со уште поголем дострел. Секоја од нив чини над 1 милиони долари.
- Залихите на PrSM биле мали уште на почетокот на војната, бидејќи тие се релативно нова муниција, но американската војска има нарачано голема количина од нив за 2027 година. Ракетите ATACMS постепено се повлекуваат од употреба и од производство за да бидат заменети со поновите ракети PrSM.
- Изворите на Ројтерс тврдат дека залихите се намалени поради одлуката на администрацијата на Трамп да избегне класични бомбардирања цели во Иран за да не се загрозат пилотите и авионите. Долгострелното оружје е побезбедно, но во исто време е незаменливо за евентуален судир со земји со многу помоќна противвоздушна одбрана, како што е Кина.
- „САД поседуваат далеку повеќе муниција од кој било друг во светот и далеку повеќе отколку што ни е потребно. Нашите одбранбени компании во овој момент произведуваат повеќе муниција од кога било досега и ги прошируваат своите погони и капацитети на рекордно ниво“, изјави неодамна претседателот Трамп.
