А бе кој да го знае дека вака ќе биде, е генералниот став на функционери од Белата куќа околу последиците што американската економија ги трпи од санкциите наметнати врз Русија.

Во Кина деновиве беше закажан и требаше да се случи масовен протест на стотици Кинези против Народната банка заради замрзнати средства во износ од десетици милиони долари. Ништо од тоа не се случи, и тоа со нула употреба на пендреци и присила, и лагана употреба на тамошната верзија на ковид пасоши.

Само од грузиската Легија на странци, до сега 1.000 волонтери загинале на фронтот во Украина, и не затоа што Русите се поголеми борци од нив, туку заради жален недостаток на опрема.

По зборовите на Зеленски, битката за Северодонецк е една од најтешките битки на целата војна и таа ќе ја одлучи судбината на цел Донбас.

Во првите 100 дена од војната во Украина, од извозот на фосилни горива Русија заработи 93 милијарди евра, а просечната извозна цена беше за околу 60 отсто повисока од минатата година. Најголемиот дел од фосилните горива на Русија ги купија земјите-членки на Европската унија.

Гардијан ги пренесува песимистичките оценки и проценки на вториот човек на украинското воено разузнавање. Артилериските битки на фронтовите ќе ја одредат судбината на териториите зафатени со судири а таму ситуацијата е 1 спрема 15 во корист на Русија.

Ние сакаме да го финансираме мирот а не војната, порача унгарскиот премиер за одлуката да не праќа оружје за Украина. Но вели дека моќни бизнис центри имаат поинаков интерес: војната да продолжи бидејќи тие од неа профитираат. Не е тешко да се погоди на кого мисли Виктор Орбан.

Половина од Германците и сите држави сојузници веруваат дека германскиот канцелар може да направи многу повеќе за да и помогне на Украина. Прашањето на Шпигел е „тогаш зошто не прави?“

Во еден редок пример на добри вести во изминативе месеци беше прифатен турскиот план и понуда да го придружува бродскиот транспорт на украинско жито до остатокот од светот. Затоа што нема зошто да се очекува среќа периодов, излезе дека ќе требаат најмалку 6 месеци да се расчистат сите морски мини поставени во Црното море.

Со секоја додадена ветерница или соларен панел Кина „фрла“ се повеќе и повеќе зелена енергија бидејќи нејзината електрична мрежа нема капацитет да ја искористи истата.

Пред изборите за Конгрес во ноември, кај републиканските кандидати и понатаму најпосакуваниот политички благослов е од Доналд Трамп. Финансискиот е од Питер Тил, еден од основачите на Пејпал и сопственик на Палантир, меѓу другото.

Авторот на Хил ја почнува својата колумна со цитат од Шерлок Холмс кој во една ситуација порачува „Кога ќе го елиминираш невозможното, тоа што ќе остане, без разлика колку неверојатно, мора да е вистината.“

Наместо нови модели на тенкови и оклопни возила за украинската армија, Германија повторно реши да ја третира Украина како еден масовен отпад во кој завршува старата железарија што не би можела да се потроши ако нема војна.

Бидејќи не планираше да се најде во ваква криза во каква што е, Бајден јавно се изнакажа (и со повторување) секакви работи за саудискиот престолонаследник. Сега Бајден е во толкав зорт што веројатно ќе оди во Ријад за да се види со истиот овој престолонаследник.

Секој изминат ден од почетокот на годината во Русија (во просек) се влеваат по околу 800 милиони долари, и тоа е само од нафта и гас, без другите.

Људмила Денисова, жената позната по тврдења од типот „во Буча Русите силуваа 11-годишно момче пред очите на својата мајка која беше врзана за стол и присилена да гледа“ е сменета од украинскиот парламент затоа што нејзините изјави се неосновани и повеќе и штетат на кредибилноста на Украина отколку што и помагаат.

Во првичните вести од масакрот беше објавено дека припадник на Граничната полиција упаднал во училиштето во Увалде го елиминирал убиецот и ги спасил сопругата и ќерката кои биле таму. Излезе дека само половина од ова сторија е точна, што не ја прави ништо помалку јуначка.

Веќе три месеци цел Запад инсистира дека војната во Украина може да заврши само со победа за Украина, тоа што не им е толку строго дефинирано е што точно е „победа“.

Украинките кои некако завршиле во Јапонија како бегалки од војната треба да се воздржат од работење како хостеси и слични професии во естаблишменти за возрасни, бидејќи таквата дејност не им е дозволена со визата што ја имаат.

По поразот што го претрпе во Азовстал баталјонот Азов реши своето закрепнување да го започне со добар ПиАр па се фати со ребрендирање и смени лого.

Речиси два месеца Германија нема испратено никакво позначително оружје во Украина, а во исто време Полска обвинува и дека им ги немаат испорачано и Леопард тенковите кои требаа да ги заменат тенковите што тие и ги пуштија на Украина.

Хенри Кисинџер пред некое време порача дека за крај на војната Украина ќе мора да прифати отстапување територија на Русија. Заради ова доби обвиненија за: учество во информативната спец-операција на Русија против Украина, ширење на наративот на руско-фашистичката пропаганда и уценување и соучесник во руските злосторства против Украина и нејзините граѓани.

На интернет за прв пат протече аудио снимка од состанок на високи кинески воени функционери кои го разговараат планот за напад на Тајван или како што тие го водат „транзиција од нормално кон војна“.

Пукањето во основното училиште во Увалде почнува околу 11:30, а завршува нешто пред 13 часот. Најголемиот дел од жртвите на 18-годишниот убиец се 10-годишни четвртоодделенци кои едноставно се погодиле да се во училницата во која тој се барикадира.