Компанијата основана во 1994, против себе има најмалку 129 големи корпорации само на големите пазари, а бројката постојано се зголемува секој пат кога ќе влезат во нов бизнис како мода, храна или лекови.
Она што го прави Амазон без конкуренција во историјата на глобалната трговија е „до сега незабележаната логистика и инфраструктура за испорака, во комбинација со пристап до личните податоци за навиките за купување на Американците“.
„До сега ниту една компанија во свои раце немала ваква комбинација на инсајдерски информации за потрошувачите и ваква инфраструктура, што значи дека компанијата со секое купување станува посилна и помалку погодна за напади,“ пишува Мајкл Корен во Кварц.
Покрај ваквите бројки Амазон успева да избегне статус на монопол затоа што на секој пазар на кој се натпреварува може да посочи голем број конкуренти. Дури и во главниот бизнис, е-трговија, на Амазон отпаѓа само 23% од 395-те милијарди долари што Американците во 2016 ги потрошиле на купување на интернет. Исклучок се книгите каде Амазон контролира околу 65% од пазарот. Ова изгледа уште позанемарливо ако се крене целата работа на макро ниво, каде потрошувачката на Американците во малопродажба изнесува 4800 милијарди долари годишно, од кои на онлајн продажба отпаѓаат само 8%. Притоа Амазон, и Џеф Безос, крајно успешно галамат на цел глас дека во секој бизнис во кој влегуваат постојано ги симнуваат цените, што е спротивно искористување на монопол.
„Државата не може ни да обвини дека Амазон има монопол во продажбата, и тоа е неговата најсилна позиција. На крај ти мораш да го земеш предвид пазарниот удел и дали тие ја злоупотребуваат својата позиција,“ објаснува професорот по менаџмент на МИТ и автор на книга за монополот на Микрософт, Мајкл Кусумано.
Во втората четвртина од годинава во 10% од сите квартални извештаи на големите компании, вклучувајќи ги Мекдоналдс, Џонсон и Џонсон, и 3М, се споменува Амазон како еден од проблемите кои и наштетиле на заработувачката. Германски Баер кој во третиот квартал од 2017 има пад на профитот од 17% заради затворање на аптеки, во извештајот зборува за „Амазон ефектот“.
„Стратегијата на Амазон ги симнува цените искористувајќи го директниот однос меѓу потрошувачите и нивната огромна е-комерц и логистичка операција. Ова тркало привлекува уште повеќе лојални потрошувачи кои се враќаат заради угодноста на користењето и ниските цени. Обемот на Амазон значи дека тој може да ги субвенционира големите загуби со пари од другите бизниси, притоа враќајќи ги профитите во бизнисите што успеваат.
Целта не е да се направи профит на кој било конкретен сервис; Амазон минатата година најверојатно загуби 7,2 милијарди долари само на испорака на производи и продава хардвер за нивниот виртуелен асистент Алекса под цената на производство. Целта е додавање на вредност на самиот систем. Амазон е загубар низ бројни индустрии во кои се натпреварува. За компаниите кои мора да заработуваат од она што го продаваат ова е ужасна глетка,“ пишува Корен.
