Вести › Набрзинка

Уапсена е Федерика Могерини поради корупција

2 декември 2025

Федерика Могерини, поранешната шефица на дипломатијата на ЕУ, е уапсена во врска со истрага за злоупотреба на средства од Унијата за Колеџот на Европа и Европската служба за надворешни акции (ЕЕАС) при воспоставувањето на академија за обука на дипломати.
Могерини од 2020 година е ректор на Колеџот на Европа и е директорка на Академијата за дипломати, основана во 2022 година.
Белгиската полиција го уапси и Стефано Санино, еден од највисоките европски дипломати, и заплени документи од Колеџот на Европа во Бриж и од приватни домови. Санино бил на висока позиција во ЕЕАС, а сега е во Европската комисија, како генерален директор задолжен за Блискиот Исток, Северна Африка и Персискиот Залив.
Обвинителството на ЕУ има „цврсти сомневања“ дека Могерини го наместила тендерот за купување дом за Академијата во Бриж. Таа дала информации за критериумите и процедурата за избор уште пред да биде распишан официјалниот конкурс.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор