Приказната ни доаѓа од Италија, земјата на фудбалот, каде стратегот Еуџенио Берселини ги мразел новогодишните и божиќните празници. Поради очајните партии и слабите резултати, како предводник на Фиорентина тој ги казнил своите фудбалери и не им дозволил да го прослават дочекот на новата година.
„Виолетовите" во првиот дел од сезоната имале освоено само 9 бода, што било премалку за тим кој воопшто не ни размислувал за испаѓање во втората лига. Екипата тренирала на 31 декември и 1 јануари, во пресрет на најтешкиот натпревар во сезоната против тимот на Наполи кој се одиграл на 4 јануари.
Иако тоа беше време кога кај Наполитанците настапуваше Диего Армандо Марадона кој веќе наредната сезона го освои скудетото, "жртвата" на фудбалерите на Фиорентина се исплатела. Конечниот резултат завршил 3:1 за играчите кои наместо тој ден да наздрават со шампањ, ја подготвувале тактиката против силниот противник.
На крајот на првенството (1986/1987) Фиорентина завршила на 10 место на табелата, а во тоа време претседател на клубот бил Пјер Џезаре Барети, кој му дал целосна поддршка на строгиот тренер.
