пронајдете го верникот

Кога Ајнштан го сретна Тагоре

На 14. јули 1930, славниот физичар во својот дом близу Берлин го примил индијскиот филoзоф Рабиндранат Тагоре. „Науката и индиската традиција" од Дејвид Л. Гослинг го пренесува разговорот кој притоа го воделе, а кој се однесува на постојаниот судир помеѓу науката и религијата. Веројатно очекувате дека Ајнштајн е оној кој ја велича науката. Епа ќе се изненадите...

Книгата всушност ги истражува пошироките ефекти на средбата на западната наука со древните знаења на Индија, во текот на доцниот 19 и раниот 20. век. Во тој период Индија доживеала интелектуална ренесанса, токму како резултат на тоа мешање на новите идеи од Западот и локалните верски и културни традиции.

Сепак, најинтересниот дел е оној во кој е транскрибиран разговорот помеѓу славниот физичар и поетот. Додека првиот инсистира на реалност независна од човекот и неговата свест, вториот вели дека основните животни и филозофски концепти - Добрината, Вистината и Убавината, се создаваат од човекот, кој е и одговорен за нив. Ако првата концепција ви изгледа порелигиозна од втората, тоа е само заради разликата во западниот и источниот светоглед. Вториот ни е сепак некако поблизок...

Ајштајн: Дали сметаш дека Божественото е изолирано од светот?

Тагоре: Не е. Бескрајната личност на Човекот го вклучува Универзумот. Не постои ништо кое не може да биде познаено од човекот, и тоа докажува дека Вистината на Вселената е човечка вистина.

Ќе се послужам со научен факт за да го објаснам ова - материјата се состои од протони и електрони со празен простор помеѓу нив; но материјата сепак изгледа цврста. Слично, човештвото се состои од поединци, па сепак тие се меѓусебно поврзани, и тоа создава сојуз помеѓу луѓето во светот. Целата вселена е поврзана со нас на сличен начин, тоа е човечка вселена. Ја имам промовирано оваа мисла преку уметноста, литературата и верската свест.

Ајнштајн: Има две различни концепции за природата на универзумот: 1) Светот како ентитет зависен од човештвото, 2) Светот е реалност независна од човечкиот фактор.

Тагоре: Кога нашиот универзум е во хармонија со Човекот, вечното, кое го познаваме како Вистина, го чувствуваме како убавина.

Ајнштајн: Ова е чисто човечка концепција на универзумот.

Тагоре: Не може да има друга. Овој свет е човечки свет - научните гледишта за него се исто така гледишта на научниците, кои се луѓе. Постои некој стандард на разум и радост кој ѝ дава вистинитост, стандардот на Вечниот Човек чии искуства се и наши искуства.

Ајнштајн: Значи Вистината, или Убавината, не се независни од Човекот?

Тагоре: Не се.

Ајнштајн: Се согласувам во врска со Убавината, но не и со Вистината.

Тагоре: Зошто не? Вистината се реализира преку човекот.

Ајнштајн: Не можам да докажам дека моето тврдење е точно, но тоа е мојата религија.

Тагоре: Убавината е идеалот на совршена хармонија, што е всушност Универзалното Битие. Вистината е совршеното разбирање на Универзалниот Ум. Ние, поединците, им пристапуваме на обете преку нашите грешки и пропусти, преку нашите акумулирани искуства, преку нашата просветлена свест - како инаку би ја знаеле Вистината?

Ајнштајн: Не можам научно да докажам дека Вистината мора да биде независна од човекот, но цврсто верувам во тоа. Верувам, на пример, дека Питагорината теорема во геометријата кажува нешто кое е приближно точно, независно од постоењето на човекот. Како и да е, ако има реалност независна од човекот, тогаш исто така постои и Вистина соодветна на оваа реалност; негацијата на првото го негира постоењето на второто.

Тагоре: Вистината, кое е едно со Универзалното Битие, мора во суштина да биде човечка, инаку што и да сметаме како луѓе за вистина никогаш нема да може да биде наречено така - барем кога станува збор за онаа Вистина која се опишува како научна, и која може да се досегне само преку процесот на логика, со други зборови, преку орган на мислите кој е човечки. Според индиската филозофија постои Брама, апсолутната Вистина, која не може да се дофати преку изолација на поединечниот ум, или да се опише со зборови, но може да се дофати преку целосно претопување на поединецот во бесконечноста. Но таквата Вистина не може да припаѓа на Науката. Природата на Вистината која ја дискутираме во нејзиниот појавен облик - односно, она што изгледа дека е вистина за човечкиот ум, и е оттаму човечка, се нарекува маја или илузија.

Ајнштајн: Значи, според твојата концепција, која е можеби индиска, не се работи за илузија на поединецот, туку на човештвото во целина.

Тагоре: Врстата припаѓа на едно цело, на човештвото. Оттаму, целиот човечки ум ја познава Вистината; индискиот и европскиот ум се среќаваат во заедничко сфаќање.

Ајнштајн: Ако нема никој во куќата масата сепак ќе постои - но излегува дека ова не е легитимно од вашата гледна точка - затоа што ние не можеме да објасниме дека масата е таму независно од нас.

Нашата природна гледна точка во однос на постоењето на вистината независно од човештвото не може да биде објаснета или докажана, но тоа е верување кое никому не може да му недостасува - дури ни на примитивните суштества. Ја припишуваме Вистината на супер-човечката објективност, таа ни е потребна, таа реалност која е независна од нашето постоење и искуствата на нашиот ум - иако не можеме да кажеме што тоа точно значи. Вака, излегува дека јас сум порелигиозен од тебе!

Тагоре: Мојата религија е во помирувањето на Супер-Човекот со универзалниот човечки дух, во моето индивидуално битие.

28 април 2012 - 08:53