Марк Твен во различни периоди од животот чувал и до 19 мачки истовремено. Нивните имиња биле исто толку необични и духовити како и неговата проза. Некои од нивните имиња биле Аполинарис, Вилс, Блатерскајт, Бафало Бил, Беелзебуб, Син, Саур Меш, Тамани, Зороастер, Сопи Сал и дури една по име Чума. Твен велел дека љубовта кон мачките е доволна причина некој веднаш да му стане пријател: „Кога човек сака мачки, тој ми е пријател и другар, без дополнителни објаснувања.“
Посебна приказна е неговата врска со мачето Бамбино. Ова маче му го подарила неговата ќерка Клара, единственото негово дете што го надживеала. По смртта на неговата сопруга Ливи, Клара била пратена во санаториум. Таму не ѝ дозволиле да го задржи мачето што го одгледувала, па Твен го земал Бамбино. Во тој тежок период на жалост и депресија, токму ова маче му помогнало да се справи со болката. Кога Бамбино исчезнал во Њујорк, Твен бил искрено загрижен и дури понудил награда од 5 долари - значајна сума за тоа време. Во огласот што го објавил, мачето го опишува како „големо и интензивно црно, со густо, кадифено крзно и мала бела ресичка на градите“, додавајќи дека при слаба светлина речиси и да не може да се забележи.
Твен бил многу внимателен кон сите мачки што ги среќавал, дури и кога патувал. Бидејќи не можел да ги носи своите миленици додека држел предавања низ земјата, тој едноставно „изнајмувал“ мачки. Најпознат случај, според неговиот биограф, бил во 1906 година во Даблин, Њу Хемпшир, кога изнајмил три мачиња за време на престојот во овој град. Едното го нарекол Саклот, а другите две биле идентични и ги викал Ешис - како заедничко име за двете.
Неговата почит кон мачките се гледа и во многубројни анегдоти. Еднаш, кога две мачиња потрчале пред него до вратата, тој им ја отворил со целосна формалност, им се поклонил и им рекол: „Повелете, господа. Секогаш им давам предност на кралевите“. За Твен, мачките биле благородни суштества, достоинствени и искрени, многу повеќе отколку поголем дел од луѓето што ги познавал.
Види претходно: Успиената мачка на Хемингвеј
