Завршната сцена од неодамнешниот воен удар во Боливија стварно личеше на сцена од филм на Серџо Леоне. Преку централниот плоштад Ла Паз, неколку воени возила упаднаа во просторот на претседателската палата на чии порти, водачот на пучот, сега сменетиот и уапсен генерал Хуан Хозе Зунига, се соочи очи в очи со претседателот по чие рушење беше дојден.
„Јас сум ваш командант и ви наредувам веднаш да ги повлечете војниците, генерале!“, решително в лице му нареди претседателот Луис Арсе.
Гле чуда, кратко потоа, генерал Зунига навистина се повлече, влезе во возило и замина од таму.
Сцената траеше само неколку минути а целата фертутма, од почеток до крај, траеше само три часа, без ниедна жртва и без ниеден испукан куршум, малку необично за воени удари секаде, особено во Латинска Америка.
Таа држава со 12,5 милиони луѓе има видено околу 190 државни удари, воени диктатури и револуции, откако се стекна со независност во 1825 година.
Веднаш штом работите се вратија во нормала, започнаа гласини дека тука нешто изгледа бааги наместено. Непосредно пред да биде приведен, главниот заговорник Зунига самиот посеа семе на сомнеж, велејќи им на новинарите дека Арсе му наредил да изврши лажен државен удар во обид да ја зголеми својата популарност.
Ваквите сомнежи ги прифати и опозицијата која сега бара парламентарна истрага дали Арсе сам инсценираше воен удар.
„Има индикации, докази и изјави кои ни даваат за право да се сомневаме дека овој пуч е однапред смислен со учество на извршната власт“, рече опозициониот пратеник Алехандро Рејес.
Она што е несомнено е дека Арсе води земја со економија која пропаѓа. Во услови на пад на извозот на гас и намалени девизни резерви, се зголемуваат протестите поради зголемувањето на цените на храната и недостигот на гориво и американски долари.
А во владеачката партија постојат длабоки поделби и жестока борба за контрола меѓу Арсе и поранешниот претседател Ево Моралес, кој беше сменет во 2019 година поради обвинувањата за изборна измама, што тој ги негираше.
Моралес беше меѓу првите што го осуди обидот за државен удар, но подоцна се посомнева во неговата автентичност:
„Не знам за каков државен удар се работи? Пуч со нула повредени, нула истрели од огнено оружје, нула смртни случаи“, рече Моралес.
