На човек познат по пораки од 140 карактери, Папата му даде есеј од 38.000 зборови

Во посетата која ќе се памети по антологиската фотографија на нелагодност, Трамп и Папата по протокол разменија и неколку подароци, без разлика колку никој од нив него сакаше тоа.

Како што за време на претседателската кампања во САД Папата беше гранично индиректен во своите критики кон Трамп, така Франциско продолжи и за време на посетата на американскиот претседател на Ватикан, па во пакетот поклони му спакува медал на мирот и есеј од 38.000 зборови на тема климатски промени и животна средина.

Есејот е истото папско писмо (енциклика) што тој го напиша во 2015. Освен ова во пакетот литература Папата  вклучил и потпишана верзија од својот говор по повод Светскиот ден на мирот. За возврат Трамп на Папата му поклонува колекција книги од Мартин Лутер Кинг јуниор.

Иако подарувањето папски писма не е никаква новост ниту кон американските, ниту кон кој било друг претседател, во конкретниов случај симболиката доаѓа од претходниот однос меѓу Папата Франциско и тогаш само претседателскиот кандидат Доналд Трамп.

Запрашан околу Трамп за време на кампањата во 2016, Франциско на новинарите им изјавува: "човек кој мисли само околу градење ѕидови, каде и да се тие, а не на градење мостови, не е христијанин. Тоа не е во евангелието".

Одговорот на Трамп беше критикување на Папата дека "ниту еден лидер, посебно не религиски лидер, не би требало да ја доведува во прашање религијата или верата на друг човек. Ако и кога Ватикан ќе биде нападнат од ИСИС, што сите знаат е најпосакуваниот успех на ИСИС, можам да ви ветам дека Папата само ќе посакува и ќе се моли Доналд Трамп тогаш да е претседател."

Нетрпеливоста меѓу двајцата продолжува и по изборот на Трамп. Во февруари Папата ги повика сите христијани "да не градат ѕидови туку мостови, да не одговараат на зло со зло, и злото да го надминат со добро".

Во едно од подиректните закачувања на Трамп, неговиот ѕид и кој ќе го плати, Папата порачува дека: "христијанин никогаш не вели: 'ќе те натерам да платиш за тоа.' Никогаш! Тоа не е христијански однос. Навреда се надминува со простување, со живеење во мир со сите."