Серијалот на Нетфликс за Јувентус не е само една обична емисија за фудбал или за италијанската префинета уметност или скапа забава во епохата на OTT (Over the Top) методот на видеоуслуги преку Интернет.
За фудбалот во целост ова е нова етапа на созревање во глобалната индустрија на забава. За самиот Јувентус ова е значаен сегмент од новата маркетиншка стратегија.
На „Старата дама“ веќе одамна не ѝ е интересен италијанскиот пазар: Јуве освои 6 шампионски скудета по ред, го освои фан аудиториумот во сите региони на „Чизмата“, зема најголем процент од телевизиски приходи и го достигна „плафонот“.
За да им се приближи на гигантите од Премиер лига и Примера, на Јуве очигледно не му е доволна доминацијата во Италија така што во Торино почнаа тотален рестарт на брендот. За да ја разбереме природата на промените и новите проекти неопходно е да се вратиме во 2017. кога клубот го откри новото лого - без никакви традиционални облици и фудбалски елементи.
„За да одиш напред, треба да излезеш од рамките на фудбалот. Мора да бидеш разбирлив и привлечен за огромен број луѓе од земјите во кои љубовта кон фудбалот не е во ДНК, вели бренд-директорот на Јувентус, Силвио Вигато на една од конференциите и додава: Како можеме да ги заинтересираме жителите на Шангај или Сан Франциско? Размислувавме за тоа, седнавме и составивме план за меѓународни активности за 3-4 години однапред. И скоро сфативме дека сите работи немаат никаква врска со нашиот бренд. Нужно беше да се биде меѓународно попривлечен. Ни требаше промена“.
Обновениот Јувентус храбро се проби и во други земји (од Австралија до САД) и за една година ги зголемил приходите од маркетинг за 42% (од 13,51 милион евра до 19,199). Еден од најдобрите примери за активностите е соработката со големата крузерска компанија Costa Cruises која почна на почетокот на 2017-та.
Сега на големите крузери кои тргнуваат од пристаништата во Шангај, Шензен и Тианцин има ќоше за Јувентус: Додека патуваат по море Кинезите ќе може да влезат во мини-музејот на Јуве, да ги однесат синот или ќерката во детски клуб каде ќе ги забавува маскотата Џеј или да поиграат на мал терен под надзор на тренер, и секако да си купат некој предмет.
Серијалот за Јувентус од Нетфликс идеално лежи во двостраната стратегија на Јувентус: да произведе забава и да привлече внимание на оние кои не се баш по фудбалот (таква публика има Netflix). Јуве и добро заработил зошто американската платформа сама им пришла на „Бјанконерите“ па сама и платила за дозвола за снимање (малку е познато дека Манчестер Сити за слична приказна од Амазон доби околу 10 милиони фунти). Италијанскиот клуб направи неизмерно успешно партнерство.
„Нас не нè заинтересираа парите, туку појавување на платформата во која има околу 110 милиони претплатници во целиот свет при што половина се од САД. Тоа е непроценлива можност да се расне на меѓународно ниво и да се најде нови навивачи. Таквата соработка покажува дека ние се обновивме и сакаме да бидеме спортско-забавен бренд“, вели одговорниот за приходи во клубот, Федерико Паломба.
Јувентус и Netflix успешно ги обединиле општите цели така што серијата е далеку од форматот на клупска телевизија и тешко дека на старите верни навивачи им дава нови сознанија.Серијалов е повеќе наменет за модерната публика на Netflix на кого House of Cards или пресметката на Френк Андервуд со Конгресот им е поблиска од онаа на Гонзало Игуаин со воинствените Наполитанци.
Главната цел на стриминг платформата е да го пополни спортскиот сегмент, да ги запознае луѓето со фудбалот и да дознае колку привлечен може да биде таков контент (содржина). Од друга страна, главна цел на Јувентус е да и ги претстави на непознатата публика своите главни предности: елегантен италијански стил, моќната традиција и хегемонија на клубот од монденскиот север итн. Сите мотиви се вметнати во серијата.
Режисерите не снимале реално шоу и не се стремеле кон обична хронологија. Тие идентификувале неколку интензивни меча на кои може да се осети горчината на евентуален пораз, избезумено биење на срцето и луди радости на големите победи - емоции на препад кои го држат вниманието на гледачот кој нема претстава на кое место е Јувентус а на кое Беневенто.
Половина фудбалска сезона се претвори во серија.
Се почнува со изгрејсонце во тренинг центарот на Јуве во Виново каде газдите на клубот како главна цел го поставуваат трофејот во Лига на шампиони. После неколку минути на екранот блеснува невозможниот Лео Меси. Кошмарни 3:0 од Барселона и тажниот Паоло Дибала во подтрибинскиот простор на „Камп Ноу“. Следно што се случува е првиот пораз после многу многу години од Лацио и Торино падна во мала деперсија. Во кадарот црно-бели налепници на телефонските говорници и тажни навивачи.
Во серијалот следува разгорената омраза кон Игуаин кого Неаполците го нацртале неговиот портрет на тоалетна хартија (а Гонзало го постигна победничкиот гол). После неколку дена Јуве се спремаше за плејофот во Лига на шампиони, а Алегри е даден како пушта снимка од мечот со Наполи и како го води тимот на тест натпревар со екипа од четврта лига.
Со секој нареден меч гледачите стануваат се поблиски до екипата. На пример може да го видат Маркизио како вари кафе во кафемат и се опушта во тишина - Клаудио обожава кога жена му е излезена по работа, а децата уште не се вратени од школо. Според него правите Италијанци пијат само кафе од ѓезве зошто така вкусот повеќе ќе ве засити.
Маркизио раскажува и за Розана, жената која го познава уште од мал во академијата на Јуве и која повеќе од 20 години се грижи за опремата на играчите на Јуве во базата.
Џанлуиџи Буфон во еден кадар признава дека често плаче кога е сам зошто тоа му помага во животот, но „никогаш не плачел за фудбал зошто тоа е повеќе романтика отколку горчина“, вели Џиџи и после неколку мигови во кадар се појавуваат фотографии на кои Буфон во солзи стои на „Сан Сиро“ по мечот против Шведска кога не отидоа на Светско.
Го даваат и Игуаин како се бричи. Аргентинецот раскажува дека ја средува брадата на секои 15 дена но ако му тргне и влезе во гол серија тој ја пушта брадата. Му се гледаат и тетоважите од раката - биле првите букви од имињата на неговите најблиски (Хорхе, Ненси, Николас, Федерико, Лаутаро) и фразата „Заедно сме непобедливи“ на десниот бицепс.
***
Веќе се појавија и првите реакции и бројки за гледачите. Интересно е што за првата серија се заинтересирале многу жени кои напишали повеќе од пола постови на социјалните мрежи со хаштаг #FirstTeamJuventus (51,3%).
После втората епизода, серијата станала глобално позната но и покрај тоа околу 48,9% претплатници биле Италијанци, 12,5% Американци, 7% Австралијци, по 4% Индонезијци и Британци, 3% Канаѓани, 2% Германци.
