Bookbox › Набрзинка

Фестивал на нем и класичен филм (со музика во живо) во Кинотека

29 август 2022

Со проекција на „Носферату, симфонија на стравот“, филм на Фридрих Вилхелм Мурнау од 1922 година, во музичка придружба на Џијан Емин, на 31 август (среда) во 20 часот, во летното кино „Мирно лето“, Кинотеката го почнува годинешното издание на Фестивалот на нем и класичен филм, што ќе трае до 7 септември.
Во 14 термини ќе бидат презентирани три филма на типичниот претставник на германскиот експресионизам, Мурнау, два со Бастер Китон – „човекот со каменото лице што го засмејуваше светот“ од ерата на немиот филм, мини-циклус на Рајнер Вернер Фасбиндер, по еден филм на француските авторски ведети Луј Мал и Клод Соте, како и домашното документарно наследство – „Филмски новости“ (1945-1948).
На последната вечер на фестивалот, во летното кино ќе бидат прикажани три етнолошки филмови во чест на проф. д-р Вера Кличкова, по повод 111 години од нејзиното раѓање. Проекцијата на филмовите „Русалиски обичаи во Гевгелиско“, „Велигденски обичаи“ и „Мариовска свадба“ е дел од проектот „Сезона на филмски класици“ на Асоцијацијата на европски кинотеки, со чија финансиска помош истите беа дигитализирани и дигитално реставрирани.
Во живо ќе настапи бендот „Д Ролинг Етнос“ составен од студенти од Институтот за етнологија и антропологија при Природно-математичкиот факултет.

извор

„Лабораториум“ со ментори, промоција и хонорар за млади уметници

7 април 2026

Културниот центар Лабораториум ги повикува сите млади кои што создаваат и стремат да се развијат и афирмираат, да се приклучат на иницијативата Градски ѕид – за Нови лица на македонската културна сцена, која до крајот на годината ќе поддржи артисти од повеќе сфери. Музичари, сликари, вајари, поети, писатели, аниматори, актери, режисери, филмаџии, танчери, фотографи, дизајнери – графички и модни… сите се добредојдени.
Ако имате од 18 до 25 години, пријавете се на конкурсот, а Лабораториум на 8 македонски артисти од целата држава ќе им обезбеди стручен ментор, комплетна поддршка и логистика за реализација на нивните проекти, кои ќе бидат претставени во Лабораториум и на пошироката јавност. Осумте одбрани артисти ќе добијат и авторски хонорар за својот ангажман.

Пријавување до 26.4. тука

извор

Почина Родољуб Анастасов, доајен на македонското сликарство

5 април 2026

Еден од најважните автори во современата македонска уметност, Родољуб Анастасов, почина вчера, во Скопје. Фондацијата „Родољуб и Јустина Анастасов“ соопшти дека тој починал во 91. година од својот живот.
Анастасов беше професор од првата генерација на Факултетот за ликовни уметности (ФЛУ). Тој бил ученик на Лазар Личеноски, Димитар Пандилов и Васил Коџоман, а во 1962 дипломирал на Уметничката академија во Белград. Од 1980 година до пензионирањето беше професор на Факултетот за ликовни уметности (ФЛУ) во Скопје.
Во 2011 година, Анастасов му подари на Музејот на Град Скопје збирка од вкупно 389 дела, a Музејот именуваше една од галериите „Јустина и Родољуб Анастасов“, каде што секоја година се отвора поставка со дела од колекцијата и која често и самиот ја посетувал. Последната изложба на Анастасов со нови дела беше во Музејот на Град Скопје, во јули 2023, насловена „Визии – глава полна со луѓе“, со над 200 портрети, насликани во периодот 2016-2022.

извор